சென்னை,அக்.23–

கழகத்துக்கும் நாம் தமிழர் கட்சிக்கும் இடையே எந்தக் கூட்டணியும் இல்லை. நாம் தமிழர் கட்சி வேட்பாளர் கைதுக்குக் கழகம் கண்டனம் தெரிவித்தது முழுக்க முழுக்க மனிதாபிமான அடிப்படையில் மட்டும்தான்.

திராவிட முன்னேற்றக் கழகம் மட்டுமா இந்த ஜனநாயக விரோதச் செயலுக்குக் கண்டனம் தெரிவித்தது? தமிழ்நாட்டில் உள்ள பெரும்பாலான கட்சிகள் இதனைக் கண்டித்தனர். த.வெ.க. அரசில் அங்கம் வகிக்கும் காங்கிரஸ் கட்சி நாடாளுமன்ற உறுப்பினரே கண்டித்தார். அவர்களெல்லாம் நா.த.க.வோடு கூட்டணியில் இருப்பவர்களா, கொள்கையை மறந்தவர்களா, அல்லது விலைபோனவர்களா?வன்னி அரசு அவர்களின் சொற்களில் சொன்னால், வெட்கம் இல்லாதவர்களா?

உண்மையில் வெட்கம் கெட்ட செயல் எது? ’RSS பெற்றெடுத்த பிள்ளைகள்’ என்றும், ’விசிலடிக்கும் கூட்டம் தியேட்டருக்குச் செல்லலாமே தவிர, சட்டமன்றத்துக்குச் செல்லக் கூடாது’ எனவும் கொக்கரித்து விட்டு, இன்று அதே த.வெ.க கூட்டணியில் சேர்ந்து தொடர்வதுதானே?இதே வன்னியரசு அவர்களே ‘கரூரில் 41பேர் இறந்தபோது ஓடிப்போன கோழை’ என்று எத்தனைமுறை விமர்சித்திருப்பார்,அந்த கோழையை இப்போது புகழ்வது வெட்கம் கெட்ட செயல்தானே? விஜய்யின் திரைப்பட பாடல்களை லயோலா மணி என்பவர் புரட்சிகரப்பாடல்களாக சிலாகித்தபோது கடுமையாக விமர்சித்த வன்னி அரசு அவர்களே இப்போது லயோலா மணி 2.0 ஆக மாறியது வெட்கம் கெட்ட செயலில்தானே வரும்?

திருச்சியில் வி.சி.க. சார்பில் 2019–ஆம் ஆண்டு நடத்தப்பட்ட மாநாட்டில் எங்கள் கழகத்தலைவர் மு.க.ஸ்டாலின் அவர்கள் கலந்துகொண்டு சனாதன ஆதிக்க சக்திகளுக்கு எதிராகப் பேசினார். எங்கள் இளைஞர் அணி செயலாளர் உதயநிதி ஸ்டாலின் அவர்கள் சனாதன ஒழிப்பு மாநாட்டில் கலந்துகொண்டு பேசிய பேச்சில் இருந்து பின்வாங்காமல், இன்று வரை துணிச்சலாக நின்று எத்தனை வழக்குகள் தொடரப்பட்டாலும் எதிர்கொண்டு வருகிறார்.

வன்னி அரசு அவர்களால், அவர்களது கூட்டணி அரசின் முதலமைச்சர்நடிகர் விஜய்–யை இதுபோலப் பேச வைக்க முடியுமா?

வி.சி.க. இப்படி ஒரு மாநாட்டை ஏற்பாடு செய்தால் அவர் முதலில் கலந்துகொள்வாரா? மதுராந்தகம் இடைத்தேர்தல் பரப்புரையில் அவர்கள் கட்சி பரப்புரை மேடையில் கூட, விஜய் அவர்களுடன் விசிக தலைவர் திருமாவளவன் உள்ளிட்ட எந்தக் கூட்டணிக் கட்சித் தலைவரும் ஏறக் கூடாது என்ற சாதியப் பார்வையோடு செயல்பட்ட அரசுக்குச் சாமரம் வீசுவதுதான் வன்னி அரசு அவர்களின் சனாதன எதிர்ப்பா?

இதுதான் வி.சி.க.வின் முற்போக்கா?

ஆரிய திராவிடப் போர் குறித்து வாய் கிழியப் பேசும் வன்னி அரசு அவர்களால், முதலமைச்சர் விஜய் அவர்களை ‘ஆரியத்தை வேரறுப்போம்’ எனப் பேச வைக்க முடியுமா? வன்னி அரசு அவர்கள் சட்டமன்றத்தில் பா.ஜ.க. என்றோ, மோடி, அமித்ஷா என்றோ, RSS என்றோ சொன்னாலே, பேச விடாமல் தடுத்து, அவைக்குறிப்பில் இருந்து நீக்கும் பா.ஜ.க அடிமைக்கூட்டம்தானே த.வெ.க!

சாக்கடைக்குள் அமர்ந்துகொண்டு, சாலையில் செல்வோரைப் பார்த்து நாற்றம் அடிக்கிறது என்று சொல்வதற்கும், த.வெ.க. கூட்டணியில் இருந்துகொண்டு அறிக்கை என்ற பெயரில் விசிக.வின் வன்னி அரசு அவர்கள் மேற்கொள்ளும் அவதூறுக்கும் பெரிய வேறுபாடு எதுவும் இல்லை.

பா.ஜ.க.வுக்கும் பார்ப்பனியத்துக்கும் கட்டுப்பட்டு நடக்கும் த.வெ.க. அரசில் பனையூர் பண்ணையாரை எதிர்த்துப் பேச முடியாமல் தி.மு.க மீது சேற்றை வாரி வீசும் வன்னி அரசு அவர்கள், வார்த்தைகளை அளந்து பேச வேண்டும்.

இவ்வாறு அதில் குறிப்பிடப்பட்டுள்ளது.