சென்னை, அக்.23–
வங்கக்கடலில் புதிய காற்றழுத்த தாழ்வு பகுதி உருவாக உள்ளதாக சென்னை வானிலை ஆய்வு மையம் தெரிவித்துள்ளது. இது புயலாக மாறும் வாய்ப்புள்ளதாகவும் தெரிவித்துள்ளது.
இது குறித்து சென்னை வானிலை ஆய்வு மைய இயக்குநர் துரை நேற்று நிருபர்களிடம் கூறியதாவது:–
இன்று (23–ஆம் தேதி) உருவாகும் புதிய காற்றழுத்த தாழ்வு பகுதி, புயலாக மாற வாய்ப்பு இருக்கிறது. தற்போதைய நிலவரப்படி அது புயலாக மாறினால் அதன் தாக்கம் தமிழ்நாட்டிற்கு குறைவாக உள்ளது. அக்டோபர் மாதத்தை விட நவம்பர் மாதத்தில் அதிகமான புயல் சின்னங்கள் உருவாவது இயல்பு. அந்த வகையில் வரும் நவம்பர் மாதத்தில் புயல்கள் உருவாகும் என எதிர்பார்க்கிறோம். நவம்பர் மாதத்தில் மழைப்பொழிவு மிக அதிகமாக இருக்கும்.
இவ்வாறு அவர் கூறினார்.
முன்னதாக சென்னை வானிலை ஆய்வு மையம் வெளியிட்டுள்ள செய்திக்குறிப்பு வருமாறு:
தமிழக கடலோர பகுதிகளுக்கு அப்பால் உள்ள தென்மேற்கு வங்கக்கடல் பகுதிகளில் உருவான காற்றழுத்த தாழ்வு பகுதி அதே இடத்தில் நிலவுகிறது. இதன் காரணமாக, இன்று தூத்துக்குடி, திருநெல்வேலி, கன்னியாகுமரி, தென்காசி, விருதுநகர், ராமநாதபுரம், தேனி, திண்டுக்கல், மதுரை, கோயம்புத்தூர், நீலகிரி, சிவகங்கை, புதுக்கோட்டை, தஞ்சாவூர், திருவாரூர், நாகப்பட்டினம் மற்றும் மயிலாடுதுறை மாவட்டங்களில் ஓரிரு இடங்களிலும், காரைக்கால் பகுதிகளிலும் இடி மின்னல் மற்றும் பலத்த காற்றுடன் கூடிய கன முதல் மிக கன மழை பெய்யக்கூடும்.
மேலும், திருச்சி, ஈரோடு, அரியலூர், பெரம்பலூர், கடலூர், நாமக்கல், விழுப்புரம், திருப்பூர் மற்றும் கரூர் மாவட்டங்களில் ஓரிரு இடங்களில் இடி மின்னல் மற்றும் பலத்த காற்றுடன் கன மழை பெய்யக்கூடும். வருகிற 26ம் தேதி வரை தமிழகத்தின் பல்வேறு மாவட்டங்களில் மழை பெய்யக்கூடும். சென்னை மற்றும் புறநகர் பகுதிகளில் வானம் இன்று பொதுவாக மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய மிதமான மழை பெய்ய வாய்ப்புள்ளது. அதிகபட்ச வெப்பநிலை 31 முதல் 32 டிகிரி செல்சியஸை ஒட்டியும், குறைந்தபட்ச வெப்பநிலை 25 முதல் 26 டிகிரி செல்சியஸை ஒட்டியும் இருக்கக்கூடும். இவ்வாறு அதில் குறிப்பிடப்பட்டுள்ளது.
புதிய புயலின் பெயர் - ‘முரசு’?
கடந்த 2004ம் ஆண்டு முதல், புயல்களுக்கு பெயர் சூட்டப்பட்டு வருகிறது. ஒரே நேரத்தில் 2 புயல்கள் உருவாகும்போது, அதை மக்கள் மத்தியில் அடையாளப்படுத்தவே அதற்கு பெயர் வைக்கப்படுகிறது. டெல்லியை தலைமையகமாக கொண்டு செயல்படும் இந்திய வானிலை ஆய்வு மையம், வங்காள விரிகுடா, அரபிக்கடல், இந்திய பெருங்கடலின் வடக்குப் பகுதியில் உருவாகும் புயல்களுக்கு பெயர் சூட்டும் அதிகாரம் பெற்றுள்ளது. தென்மேற்கு வங்கக் கடல் பகுதிகள் மற்றும் அதனையொட்டிய தமிழக கடலோரப் பகுகளின் மேல் ஒரு குறைந்த காற்றழுத்த தாழ்வுப் பகுதி நேற்று உருவாகியது. இதேபோல், நாளை (23ம் தேதி) தென்கிழக்கு மற்றும் அதனையொட்டிய கிழக்கு மத்திய வங்கக்கடலில் ஒரு குறைந்த காற்றழுத்த தாழ்வு பகுதி உருவாக வாய்ப்பு உள்ளது.
தாய்லாந்து மற்றும் மியான்மர் பகுதிகளின் மேல் நிலவிய வளிமண்டல சுழற்சி நேற்று காலை நிலவரப்படி அதே பகுதியில் நீடிக்கிறது. இது, இன்று வடக்கு அந்தமான் கடற்பகுதிக்கு நகர்ந்து வரக்கூடும். அதன்பிறகு இது மேற்கு வடமேற்கு திசையில் நகரக்கூடும். இதன் தாக்கத்தால் நாளை தென்கிழக்கு மற்றும் அதனையொட்டிய கிழக்கு மத்திய வங்கக் கடல் பகுதியில் காற்றழுத்த தாழ்வு பகுதி உருவாக வாய்ப்பு உள்ளது. இது வடமேற்கு திசையில் நகர்ந்து மேலும் வலுவடைய கூடும் என்று வானிலை ஆய்வு மையம் தெரிவித்துள்ளது. இது புயலாகவும் மாறக்கூடும் என்று எதிர்பார்க்கப்படுகிறது. அவ்வாறு புயலாக மாறினால், அடுத்து வரும் புயலுக்கு ‘முரசு’ என்று தமிழ் பெயர் வைக்கப்பட உள்ளதாக தெரிகிறது
எனினும் புயல் பெயர் பட்டியலில், முரசுக்கு முன்னதாக வங்கதேசம் வழங்கிய ‘அர்னாப்’ என்ற பெயர் இடம்பெற்றுள்ளது. கடந்த செப்டம்பர் மாதம் வங்கக்கடலில் ஆழ்ந்த காற்றழுத்தம் உருவானது. அதற்கு அர்னாப் என்று பெயர் சூட்டப்பட்ட தாக சமூக ஊடகங்களில் செய்திகள் வெளியானது. ஆனால் அதிகாரபூர்வமாக அப்பெயர் சூட்டப்படவில்லை. இதனால் அடுத்த புயலின் பெயர் அர்னாப்பா அல்லது முரசா என்ற குழப்பம் உள்ளது. இதை தொடர்ந்து வரும் புயல்களுக்கு அக்வன் (ஈரான்), கானி (மாலத்தீவு) என்று பெயரிடப்பட்டுள்ளன.