ஓ
ர் இரவில் 30 சென்ட்டி மீட்டரைக் கடந்து சென்னையில் மழை பெய்து ஓய்ந்தது. மறுநாள் பகலில் சமூக வலைத்தளச் செயல்பாட்டாளரான பாபு ஈ.வெ.ரா. என்ற தோழர் இப்படி எழுதியிருந்தார், “விஜய் அதிர்ஷடசாலி. மற்றவர்களுக்கு உடம்பில் மச்சம் இருக்கும். விஜய்க்கு மச்சத்தில் உடம்பு இருக்கிறது” என்று! அவர் அப்படி எழுதியதற்குக் காரணம், திராவிட மாடல் ஆட்சியில் மேற்கொள்ளப்பட்ட மழை நீர் வடிகால் பணிகளால், கன மழை பெய்த போதும், காலையில் தண்ணீர் தேங்காமல் இருந்ததையும், போக்குவரத்தும் மக்களின் இயல்பு வாழ்க்கையும் பாதிக்கப்படாமல் இருந்ததையும்தான்.
த.வெ.க.வின் விர்ச்சுவல் வாரியர்ஸ் எனப்படும் புளுகு மூட்டைகளோ, மழை பெய்த இரவு முழுவதும், சாலைகளில் தண்ணீர் வெள்ளம் போல ஓடிக் கொண்டிருப்பதாகவும், தி.மு.க ஆட்சியில் மழைநீர் வடிகால் பணிகளுக்காக செலவிடப்பட்ட 4000 கோடி ரூபாய் எங்கே போனது என்று கேட்டும் ரீல்ஸ் போட்டுக் கதறிக் கொண்டிருந்தனர். மழை தொடர்ந்து பெய்யும்போது சாலையில் தண்ணீர் தேங்கித்தான் இருக்கும். தமிழ்நாட்டின் தலைநகரில் மட்டுமல்ல, இந்தியாவின் பிற நகரங்களிலும் மழை பெய்யும்போது சாலையில் தண்ணீர் ஓடிக் கொண்டிருக்கும். அப்படி ஓடினால்தான் அதற்குப் பெயர் கன மழை. வளர்ந்த நாடுகளான அமெரிக்கா, இங்கிலாந்து உள்ளிட்ட எல்லா நாடுகளிலும் இதே நிலைதான். மழைவிட்ட பிறகு, எவ்வளவு நேரத்தில் தண்ணீர் வடிகிறது என்பதே மழை நீர் வடிகால்
திட்டத்தின் தன்மையை உணர்த்தும்.
பொழுது விடிந்தபோது சென்னையின் பெரும்பாலான முதன்மைச் சாலைகளிலும், உட்புறச் சாலைகளிலும் தண்ணீர் தேங்காமல் வடிந்திருந்தது. இரவு முழுவதும் விழித்திருந்து பொய்யையும் வன்மத்தையும் கக்கிய த.வெ.க.வின் விர்ச்சுவல் வாரியர்ஸ் ஏமாந்து போனார்கள். மூளையும் உணர்ச்சியும் உள்ள கூட்டம் என்றால் உண்மையைச் சொல்லும். இல்லையென்றால் மௌனமாக இருந்துவிடும். த.வெ.க.விடம் அவற்றை எதிர்பார்க்க முடியுமா? தண்ணீர் வடிந்ததற்கு
த.வெ.க அரசின் நிர்வாகம்தான் காரணம் என்று மறுபடியும் பொய்களைத் தொகுத்து ரீல்ஸ் போடத் தொடங்கிவிட்டார்கள்.
சென்னையை மழைக் காலப் பேரிடர்களிலிருந்து மீட்பதற்காகத் திராவிட மாடல் அரசு மேற்கொண்ட பணிகளின் விளைவாகவே, ஓர் இரவு முழுவதும் பெய்த கன மழைக்குப் பிறகும், தண்ணீர் வடிந்து, மக்கள் தங்கள் இயல்பு வாழ்க்கையைத் தொடர முடிந்தது என்கிற எளிய உண்மையை த.வெ.க.வின் விர்ச்சுவல் வாரியர்ஸ்களால் மட்டுமல்ல, த.வெ.க. ஆட்சி நிர்வாகத்தில் உள்ளவர்களாலும் ஏற்றுக் கொள்ள முடியவில்லை.
மழை நேரத்தில் மேற்கொண்ட முன்னெச்சரிக்கை நடவடிக்கைகளாலும், மோட்டார் பம்பு வைத்து தண்ணீரை இறைத்ததாலும்தான் இந்த நிலைமை என்பதாக அமைச்சர்களே ஊடகங்களிடம் பச்சைப் பொய் சொன்னார்கள். பேரிடர் மேலாண்மைக்குப் பொறுப்பு வகிக்கும் அமைச்சர் செங்கோட்டையன், பொய் சொல்வதிலும் த.வெ.க கேபினட்டில் நான்தான் சீனியர் என்பதை நிரூபிக்கும் வகையில், தி.மு.க. ஆட்சியில் 40% பணிகள்தான் நிறை வடைந்தன. த.வெ.க ஆட்சியில்தான் மிச்சப் பணிகள் முடிந்தன என்று கூச்சமேயில்லாமல் ஊடகங்களிடம் பேசினார்.
சென்னை மாநகராட்சி ஆணையர் சமீரன் ஐ.ஏ.எஸ் அரசியல் காரணங்களுக்கு ஆட்பட்டு மாநகர மேயரின் ஆய்வுப்பணிகளுக்குத் துணை நிற்காமல், அமைச்சர்கள் போகும் இடங்களுக்கு மட்டுமே வால் பிடித்தபடி போனதுடன், “மழை நீர் வடிகால் பணிகளை விமர்சிக்கவும் முடியாது-சாத னையாகவும் பார்க்க முடியாது. இயற்கையுடன் மனிதன் போராட வேண்டும்” என்ற தத்துவத்தை உதிர்த்து தனக்குள்ள நெருக்கடியான சூழலை உணர்த்தினாலும், ஓர் அதிகாரியாக அவருடைய மனசாட்சி உண்மையை உதட்டின் வழியாக வரவைத்துவிட்டது.
“சென்னையில் 2021ஆம் ஆண்டுக்கு முன்பு தண்ணீர் தேங்க வாய்ப்புள்ள இடங்கள் 700ஆக இருந்தது. அது இப்போது (2026) 291ஆக குறைந்துள்ளது” என்று சமீரன் ஐ.ஏ.எஸ். தெரிவித்திருக்கிறார். மழைக்காலச் சென்னையை மனதிற்கொண்டு, ரூ.6,495 கோடி ரூபாய் மதிப்பில் 1,422.28 கி.மீ. நீளத்திற்கு மழை நீர் வடிகால் பணிகள் மேற்கொள்ளப்பட்டு, அதில் 1,076 கி.மீ.நீளத் திற்குப் பணிகளை நிறைவு செய்தது திராவிட மாடல் அரசு. இதில் எந்தப் பகுதியில் எந்தளவு தண்ணீர் தேங்கும் என்பதையும் கவனத்தில்கொண்டு, அதற்கேற்ப மழை நீர் வடிகால்களின் அகலம், நீளம், உயரம் ஆகியவை அமைக்கப்பட்டன.
திராவிட மாடல் ஆட்சியில் மழை நீர் வடிகால் பணிகளுக்காக ஒதுக்கப்பட்ட தொகை எப்படி செலவிடப்பட்டது? எந்தளவுக்குப் பணிகள் நிறைவடைந்தன? அதனால் ஏற்பட்டுள்ள பலன்கள் என்னென்ன? என்பவை குறித்து சமூக வலைத்தளச் செயல்பாட்டாளரான விமல் மணி ஆய்வுப்பூர்வ மானப் புள்ளிவிவரங்களைப் பதிவிட்டுள்ளார்.
“2021 முதல் 2026 வரையிலான தி.மு.க. ஆட்சியில் வடசென்னைக்கான 3,059 கோடி ரூபாய் செலவிலான கொசஸ்தலையாறு வடிநிலத் திட்டம், தென் சென்னைக்கான 1,357.6 கோடி ரூபாய் செலவிலான கோவளம் வடி
நிலத்திட்டம் ஆகியவற்றின் பணிகள் ஒவ்வொரு கட்டமாக மேற்கொள்ளப்பட்டு ஏறத்தாழநிறைவு செய்யப்பட்டது. மத்திய சென்னைக் கான வடிகால் பணிகள் சிங்காரச் சென்னை 2.0, வெள்ள நிவாரண நிதி, உலக வங்கி நிதி, மூலதன நிதி ஆகியவற்றின்
மூலமாக ஏறத்தாழ 699 கோடி ரூபாய் மதிப்பிலான 225 கி.மீ. பணிகள் முழுமையாக நிறைவடைந்து, 276.54 கோடி ரூபாய்க்கான 70.26 கி.மீ. பணிகள் நடைபெற்று வரு
கின்றன. இவைபோக, வடசென்னை வளர்ச்சித் திட்டத்தில் 5.51 கி.மீ. பணிகளும், சென்னை மாநகராட்சியின் சொந்த மூலதன நிதியிலான 760.7 கோடி ரூபாயில் 199.2 கி.மீ பணிகளும், கால்வாய் மேம்பாடு மற்றும் தூர்வாருதலுக்கான 302.38 கோடி ரூபாய் மதிப்பிலான பணிகளும் மேற்கொள்ளப்பட்டதன் விளைவே சென்னையில் மழை நீர் தேங்காமல் இருப்பதற்குக் காரணம்” என்று விரிவாகவும் எல்லாருக்கும் புரியும்படியான செயற்கை நுண்ணறிவின் துணையுடன் உருவாக்கப்பட்ட படத்தின் மூலமாகவும் விளக்கியுள்ளார்.
சமூக வலைத்தளச் செயல்பாட்டாளர் விமல் மணி இந்தத் தரவுகளைப் பதிவிட்டிருப்பதுடன், 5 மாத த.வெ.க. ஆட்சியில் மேற் கொள்ளப்பட்ட பணிகள் என்ன, ஒதுக்கிய நிதி எவ்வளவு என்று வெளிப்படையாக அறிவிக்க முடியுமா என்றும் கேட்டிருக்கிறார். மோட்டார் பம்ப் செட் வைத்து மழைத் தண்ணீரை வெளியேற்றினார்கள் என்றால், அந்தத் தண்ணீரை எங்கே கொண்டு போய் கொட்டினீர்கள்? அதுவும் திராவிட மாடல் ஆட்சியின் முதல்வர் மு.க.ஸ்டாலின் அமைத்த மழை நீர் வடிகால்களில்தானே என த.வெ.க.வினரை நோக்கி கேள்வி எழுப்புகிறார்கள் நெட்டிசன்கள்.
சென்னையின் உள்கட்டமைப்புக்காக
திராவிட நாயகர் மு.க.ஸ்டாலினுக்குத்தான் நன்றி சொல்ல வேண்டும் என்று பலரும், தி.மு.க. தலைவரின் நிர்வாகத் திறன் மிக்க ஆட்சியைத் தக்க வைத்துக்கொள்ள சென்னை தவறிவிட்டது என்று சிலரும் சமூக வலைத்தளங்களில் பதிவிட்டு வருகிறார்கள். விஜய்யின் த.வெ.க. அரசு என்னதான் ஸ்டிக்கர் ஒட்டும் வேலைகளைப் பார்த்தாலும், மழை-வெள்ள மேலாண்மைப் பணிகளில் தி.மு.க. அரசு மேற்கொண்ட அக்கறையையும், தி.மு.க.வின் அமைச்சர்கள், எம்.எல்.ஏக்கள், மேயர், கவுன்சிலர்கள் உள்ளிட்டோர் மக்களுக்குத் துணையாகக் களத்தில் நின்றதையும் மக்கள் அறிவார்கள். சென்னையில் மட்டுமல்ல, தமிழ்நாடு முழுவதுமே பெரிய நகரங்களில் தி.மு.க. ஆட்சியில் தொலை நோக்குப் பார்வையுடனான மழை நீர் வடிகால் பணிகள் சிறப்பாக முன்னெடுக்கப் பட்டன.
ஆட்சியில் இருந்தாலும் இல்லாவிட்டாலும் மக்களின் துயரத்தில் துணை நிற்கின்ற இயக்கம், தி.மு.கழகம். 1952ஆம் ஆண்டு நாகையில் புயல் வீசியது. தி.மு,க தொடங்கப்பட்ட மூன்று ஆண்டுகள்தான் ஆகியிருந்தது. பொதுத் தேர்தலிலும் கூட பங்கேற்கவில்லை. ஆனாலும், பேரறிஞர் அண்ணா அவர்கள் நாகை உள்ளிட்ட கீழத்தஞ்சை மாவட்ட மக்களுக்கான நிவாரணம் வழங்குவதற்காகக் கழகத்தின் சார்பில் ஒரு குழு அமைத்தார். அந்தக் குழுவுக்குப் பொறுப்பு வகித்தவர் கலைஞர். பொதுக்கூட்டம், நாடகம், உண்டியல் வசூல் எனப் பல வழிகளிலும் நிதி திரட்டினார். 1953ல் கைத்தறி நெசவாளர்கள் துயர் துடைப்பதற்காகக் கைத்தறி துணி விற்கும் இயக்கத்தை தி.மு.க நடத்தியது. திருச்சியில் அண்ணாவும், சென்னையில் கலைஞரும், மற்ற நகரங்களில் கழக முன்னோடிகளும் கைத்தறித் துணி களைக் கூவிக்கூவி விற்றார்கள். அந்தக் காலத்திலேயே ஒரு இலட்ச ரூபாய்க்கு மேல் கைத்தறித் துணிகள் விற்பனை யாயின.
புயலால் பாதிக்கப்பட்ட நாகை பகுதி மீனவர்கள், விவசாயிகள், உழைக்கும் மக்களுக்கான உடைகளுக்காக, கழகம் வசூலித்த புயல் நிவாரண நிதியிலிருந்து கைத்த றித் துணிகளை வாங்கி அவர்களுக்கு வழங்கினார் கலைஞர். ஒரு நிதியில், புயலால் பாதிக்கப்பட்டவர்களுக்கும் உடை கிடைத்தது. நெசவாளர்களுக்கும் துணி விற்றது. இரு தரப்புக்கும் பயன் கிடைத்தது. இதுதான் கலைஞரின் நிர்வாக மேலாண்மைத் திறன்.
1978ஆம் ஆண்டு நாகைப் பகுதியில் மீண்டும் ஒரு புயல் வீசிய போது, அ.தி. மு.க. ஆட்சியால் கைது செய்யப்பட்டு சிறையில் இருந்தார் கலைஞர். சிறையிலிருந்தபடியே உடன்பிறப்புகளுக்கு கடிதம் எழுதி, நிவாரணப் பணிகளைக் கழகத்தினர் மேற்கொள்ள வேண்டும் என்றும், நிதி திரட்ட வேண்டும் என்றும் கோரிக்கை வைத்து, நிதி அனுப்பிய விவரங்களைத் தனக்குத் தெரிவிக்கும்படியும் கேட்டுக் கொண்டார். நிவாரண நிதி குவிந்தது.
நிவாரணப் பணிகளைக் கழகத்தினர் மேற்கொண்டனர்.
2015ஆம் ஆண்டு அ.தி.மு.க. ஆட்சியில் உருவாக்கப்பட்ட செயற்கை வெள்ளத்தால் சென்னை தத்தளித்தபோது, தி.மு.க. தலைமையும் உடன்பிறப்புகளும் களத்தில் இறங்கி உணவு, உடை, மருந்து போன்ற அத்தியாவசியப் பொருட்களை சென்னை மக்களுக்கு வழங்கினார்கள். தலைமைக் கழகம் சார்பில் 1 கோடி ரூபாய் வழங்கப்பட்டது. அண்ணா அறிவாலயத்தில் வார் ரூம் எனப்படும் மீட்புப் பணி மையம் அமைக்கப்பட்டதுடன், அங்கு லாரி லாரிகளாக உடன்பிறப்புகள் வழங்கியப் பொருட்கள் வந்து குவிந்தன. அவற்றை சென்னையில் தேவைப் படும் மக்களுக்கு வழங்கியது கழகம்.
2015 சென்னை வெள்ளத்தின்போது, தி.மு.க. உள்ளிட்ட பலரது உதவிகள் மீது ஸ்டிக்கர் ஒட்டிக் கொண்டது அ.தி.மு.க. அரசு. இப்போது மழை நீர் வடிகால் பணிகளுக்காக திராவிட மாடல் அரசு ஆற்றிய பணிகளின் மீது ஸ்டிக்கர் ஒட்டிக் கொள்ளப் பார்க்கிறது
த.வெ.க அரசு.
தி.மு.க.வின் சாதனைகளை மற்றவர்கள் அபகரித்துக் கொள்வது புதிதல்ல. தி.மு.க. அதைப் பற்றி அலட்டிக் கொண்டதுமில்லை. மக்களுக்குத் துணையாக நிற்பதே தி.மு.க.வின் முதன்மையானப் பணி. கஜா, ஒக்கி, வர்தா புயல்கள் பாதிப்பின்போதும் மக்களுடன் நின்றது. கேரளா, ஒடிசா போன்ற மாநிலங்களில் மழை-வெள்ள-புயல் பாதிப்புகளின்போதும் தி.மு.கழகம் நிவாரண நிதி வழங்கி உதவிக்கரம்
நீட்டியது.
உலகமே முடங்கிக் கிடந்த கொரோனா லாக்டவுன் போதும் , கழகத் தலைவரின் கட்டளையை ஏற்று, ‘ஒன்றிணைவோம் வா’ என உடன்பிறப்புகள் தங்கள் உயிரைப் பற்றிக் கவலைப்படாது, மக்களின் உயிர் காக்கவும், அவர்களுக்குத் தேவையான அடிப்படைத் தேவைகளை நிறைவேற்றவும் களமிறங்கிச் செயல்பட்டனர். வரலாற்றில் தி.மு.க.வின் பங்களிப்பை எவராலும் ஸ்டிக்கர் ஒட்டி மறைத்து விடமுடியாது.
ஒவ்வொரு மழைக்காலத்திலும் தங்கள் பகுதி எப்படி இருந்தது என்பதையும், தி.மு.க. ஆட்சியில் மழை நீர் வடிகால் பணிகள் எப்படியெல்லாம் மேற்கொள்ளப்பட்டது என்பதையும் அறிந்துள்ள மக்கள் தி.மு.க.வையும் அதன் தலைவரையும் நன்றியுடன் நினைத்துப் பார்க்கிறார்கள். சென்னை மக்களுக்காக மழை நேரத்தில், கழகத் தலைவரின் அறிவுரைப்படி இப்போதும் களத்தில் நிற்கிறார்கள் தி.மு.க.வினர்.
எல்லாருக்கும் பெய்யும் மழைக்கு மற்றொரு பெயர், தி.மு.க.