தூத்துக்குடி, அக். 24–
சட்டம் ஒழுங்கு சீர்குலைவு, பெண்கள் மற்றும் குழந்தைகளுக்குப் பாதுகாப்பின்மை, போதைப்பொருள் புழக்கம், விலைவாசி உயர்வு என அனைத்திலும் தோல்வியடைந்த தவெக அரசின் அவலங்களை மறைக்க ரீல்ஸ் மட்டுமே போதாது. மக்கள் பாதுகாப்பாக வாழ்வதற்கான ஆட்சியை நடத்த வேண்டும் என கனிமொழி ராஜாத்தி கருணாநிதி எம்.பி ஆவேசத்துடன் குறிப்பிட்டார்.
தூத்துக்குடியில் நேற்று செய்தியாளர்களைச் சந்தித்த தி.மு.க. துணைப் பொதுச் செயலாளரும், நாடாளுமன்ற தி.மு.க. குழுத் தலைவருமான கனிமொழி ராஜாத்தி கருணாநிதி எம்.பி, அவர்கள் கூறியதாவது:–
த.வெ.க. ஆட்சிப் பொறுப்புக்கு வந்த பிறகு, தினமும் பல்வேறு கொலைக் குற்றச் சம்பவங்கள், பெண்கள் குழந்தைகளுக்கு எதிரான குற்றங்கள் எனத் தொடர்ந்து நடைபெற்று வருகின்றன. தினமும் இதைப் பற்றிப் பேசி எங்களுக்கே மனவேதனை ஏற்படும் அளவுக்கு, தொடர்ந்து இதுகுறித்து ட்வீட் செய்தும் பேசியும் வருகிறோம்.
ஆனால், அரசுப் பொறுப்பில் இருக்கக்கூடிய யாரையும் இத்தகைய சம்பவங்கள் பாதிப்பதாகத் தெரியவில்லை. இது தொடர்பாக இதுவரை எந்த நடவடிக்கையும் எடுப்பதில்லை. இவர்கள் என்ன ஆட்சி நடத்துகிறார்கள் என்பதே எனக்குப் புரியவில்லை. சட்டம் ஒழுங்கைக்கூடச் சீர்செய்ய முடியாத அளவுக்குத் திறமையின்றி, இன்று ஆட்சிப் பொறுப்பில் இருப்பவர்கள் பெரிய வாக்குறுதிகளையும் வசனங்களையும் பேசி ஆட்சிக்கு வந்தார்கள். அனைவருக்கும் நான் பாதுகாப்பாக இருப்பேன் என்று முதலமைச்சர் கூறினார். ஆனால், இன்று யாருக்குமே பாதுகாப்பு இல்லாத நிலை தமிழ்நாட்டில் உருவாகியுள்ளது. இது எங்கு போய் முடியும் என்று எனக்குத் தெரியவில்லை.
ஏனென்றால், ஒவ்வொரு சம்பவமும் வெளியில் வரும்போது கேள்விகள் அதிகமாக எழுகின்றன. அதனால், எல்லாவற்றையும் மூடி மறைத்துவிடலாம் என்று நினைக்கிறார்கள். செஞ்சியில் ஒரு குழந்தை காணாமல் போய் எத்தனை நாட்களாகின்றது. ஆனால் இன்னும் காவல்துறை என்ன செய்துகொண்டிருக்கிறது. அந்தக் குழந்தைக்கு என்ன ஆனது என்பது கூட யாருக்கும் தெரியவில்லை.
இது ஆட்சியா; அலங்கோலமா?
இப்படித்தான் இன்று அரசாங்கம் செயல்பட்டுக் கொண்டிருக்கிறது. முதலமைச்சருக்கு மக்கள் மீது அக்கறை இருக்கிறதா, இல்லையா என்பதுகூடத் தெரியவில்லை. ஏனென்றால், இது நேரடியாக முதலமைச்சரின் கட்டுப்பாட்டில் வரக்கூடிய துறை காவல்துறை. ஆனால், இத்தனை குற்றச் சம்பவங்கள் தினமும் நடைபெறுகின்றன. ஒரு நாளைக்குஒரு குற்றச் சம்பவம் என்றுகூட இல்லை. ஒரு நாளில் எத்தனை குற்றச் சம்பவங்கள் நடைபெறுகின்றன. சில நேரங்களில், 24 மணி நேரத்திற்குள் 10 கொலைகள் மற்றும் பல்வேறு குற்றச் சம்பவங்கள் நடைபெறுகின்றன.
ஆனால், இதுகுறித்து எந்தக் கவலையும் இல்லாமல், இந்த ஆட்சியில் இருப்பவர்கள் வீர வசனங்களைப் பேசிக்கொண்டிருக்கிறார்கள். இதற்கு முன்பு ஆட்சிப் பொறுப்பில் இருந்தவர்களைக் குறை சொல்வதை மட்டுமே தங்களுடைய பணியாக வைத்திருக்கிறார்களே தவிர, தங்களுடைய பொறுப்புகளைத் தட்டிக் கழிக்கிறார்கள். தங்களுடைய பொறுப்பு என்ன என்பதைக்கூட உணராமல் செயல்படக்கூடிய ஓர் ஆட்சிதான் இன்று நடைபெற்று வருகிறது.
இவர்கள் ஆட்சிக்கு வருவதற்கு முன்பு என்னென்ன வாக்குறுதிகளைக் கொடுத்தார்களோ, அவை அனைத்தும் பொய்யாகியுள்ளன. இங்கு ரீல்ஸ் கவர்மெண்ட்தான் நடைபெற்றுக் கொண்டிருக்கிறது. ரீல்ஸில் மட்டுமே ஆட்சி நடத்திவிடலாம் என்று நினைக்கிறார்களே தவிர, அவர்கள் கொடுத்த எந்தவொரு வாக்குறுதியையும் நிறைவேற்றுவதில்லை.
இன்று விலைவாசி உயர்ந்துள்ளது, குற்றச் சம்பவங்கள் அதிகரித்துள்ளன. போதைப்பொருட்கள் அவர்களுடைய கட்சி நிர்வாகிகளின் வீடுகளி லிருந்தே கைப்பற்றப்படுகின்றன. இன்று போதைப்பொருள் பிரச்சினை என்பது நமது சமூகத்தில் மிகப்பெரிய பிரச்சினையாக மாறிக்கொண்டிருக்கிறது.
யாருக்குமே பாதுகாப்பு இல்லாத சூழல் நிலவுகிறது. மின்வெட்டு அந்த அளவுக்கு மோசமாக இருக்கிறது; மின்சாரமே இல்லை. விவசாயிகள் ஒருபுறம் மிகப்பெரிய அளவில் பாதிக்கப்பட்டுள்ளனர். மதுப்பழக்கத்தைக் குறைப்போம், மது அருந்துவதைக் குறைக்க நடவடிக்கை எடுப்போம் என்று கூறினார்கள். அதையும் செய்யவில்லை. அதனால் ஏற்படக்கூடிய குற்றங்களையும் கட்டுப்படுத்துவதில்லை. இது ஆட்சியா, அலங்கோலமா என்றே தெரியவில்லை.
இவ்வாறு அவர் குறிப்பிட்டார்.