தூத்துக்குடி, அக். 24 –
‘‘த.வெ.க.வை எதிர்த்து செயல் படும் பெண்களைத் தரக்குறைவாக விமர்சிப்பதா?’’ என்று கழகத் துணைப் பொதுச் செயலாளர்
கனிமொழி ராஜாத்தி கருணாநிதி எம்.பி. கண்டனம் தெரிவித்துள்ளார்.
தூத்துக்குடி விமான நிலை யத்தில் தி.மு.க. துணைப் பொதுச் செயலாளரும், நாடாளுமன்ற தி.மு.க. குழுத் தலைவருமான கனிமொழி ராஜாத்தி கருணாநிதி செய்தியாளர்களை சந்தித்தார்.
அப்போது அவர் கூறியதாவது:–
ஆட்சிப் பொறுப்பில் இருக்கக்கூடிய த.வெ.க. அரசு பருவமழையை எதிர்கொள்ள எந்தவித முன்னேற் பாடுகளையும் செய்ததாகத் தெரியவில்லை. சென்னையின் பல இடங்களில் சிறிதளவு மழை பெய்ததற்கே தண்ணீர் தேங்குவதை நாம் கண்கூடாகப் பார்க்கிறோம். இவ்வாறான சூழலில் தூத்துக்குடியில்மழை பெய்தால் அதிகளவு தண்ணீர் தேங்கும்.
ஏனெனில், கடல் மட்டத்தைவிடக் கீழே இருக்கக்கூடிய நகரமாகத் தூத்துக்குடி இருப்பதால், தண்ணீர் தேங்கக்கூடிய வாய்ப்பு அதிகமாக உள்ளது. எனவே, இங்கு கூடுதலாகக் கவனம் செலுத்த வேண்டியிருக்கிறது. அதனால், தண்ணீர் தேங்காமல் இருப்பதற்கான நடவடிக்கை களைப் பார்வையிட தூத்துக்குடி மேயர் ஜெகன் அவர்களோடு சென்று பருவமழை முன்னேற்பாடு பணிகளைப் பார்வையிட்டோம்.
தற்போது பருவமழையை எதிர்கொள்ள எங்களால் முடிந்த வரை பணிகளைச் செய்கிறோம். இதைத்தாண்டி தேவையுள்ள நேரத்தில் அரசு ஒத்துழைப்பு கொடுக்க வில்லை என்றால், நிச்சயமாக அதற்கு எதிர்வினையாற்றுவோம்.
த.வெ.க.வினரின்
தரக்குறைவானப் பதிவுகள்!
முன்னதாக, பெண்களைத் தரக்குறைவாகப் பேசுவதாகக் கூறி தொடர்ந்து கைது நடவடிக்கைகளை மேற்கொள்ளும் த.வெ.க. அரசு, தங்கள் கட்சியினரை எதிர்த்துப் பேசும் பெண்கள் மீது த.வெ.க. வினர் சமூக வலைதளங்களில் நடத்தும் அவதூறுத் தாக்குதல்களைக் கண்டுகொள்வதில்லை. மேயர் பிரியா உள்ளிட்ட தி.மு.க. வைச் சேர்ந்த பெண்கள், த.வெ.க. வினரின் செயல்பாடுகளை விமர்சிக்கும் பெண்கள், சமூக வலைதளங்களில் இயங்கும் பெண்கள் எனப் பலரையும் குறிவைத்து, த.வெ.க.வினர் மீண்டும் மீண்டும் தரக்குறைவான பதிவுகளைப் பதிவிட்டு வருகின்றனர்.
இவ்வாறு பெண்களை அவமதிக்கும் இத்தகைய செயல்களுக்கு எதிராகவும் அரசு பாரபட்சமின்றி நடவடிக்கை எடுக்க வேண்டும்.
நேற்று தாராபுரத்தில் போட்டியிட்ட நாம் தமிழர் கட்சி வேட்பாளர் கார்த்திகாவைக் கைது செய்திருக்கிறார்கள். தங்களுக்கு எதிராகப் பதிவிடும், எதிர்த்துச் செயல்படும் பெண்களைக் குறிவைத்து, அக்கட்சியினர் சமூக வலைதளங்களில் தொடர்ந்து மிகத் தரக்குறைவான பதிவுகளைப் பதிவிட்டு வருகின்றனர். பெண்களை மதிப்பதாகவும், பாதுகாப்பதாகவும் கூறிக்கொள்ளும் இவர்களின் லட்சணம் இதுதானா?
இவ்வாறு கழகத் துணைப் பொதுச் செயலாளர் கனிமொழி ராஜாத்தி கருணாநிதி எம்.பி. பேட்டியளித்தார்.