#Title

பள்ளிகள் சாதிவெறிக்கான களமாக்கப்படுவதா? கோவை மாணவனை தற்கொலைக்குத் தூண்டிய உண்மைக் குற்றவாளிகளை உடனே கைது செய்ய வேண்டும்! ‘டம்மி’ த.வெ.க. அரசுக்கு – எதிர்க்கட்சித் தலைவர் உதயநிதி ஸ்டாலின் கண்டனம்!

சென்னை, அக். 25 –

கோவை பீளமேட்டைச் சேர்ந்த மாணவர் அகிலன்,அதே பகுதியில் உள்ள அரசு உதவிபெறும் பள்ளியில் 11ஆம் வகுப்பு பயின்று வந்தார். பள்ளியில், மாட்டுக்கறி சாப்பிடுவது பற்றியும், சாதி பற்றியும் ஆசிரியரும், சக மாணவர்களும் அவரை கேலி செய்ததாகக் கூறப்படுகிறது. இந்த நிலையில் வீட்டில் தனியாக இருந்தபோது மாணவர் அகிலன் தூக்கிட்டுத் தற்கொலை செய்து கொண்டார்.

இந்நிகழ்வையடுத்து வலைதளத்தில் பதிவிட்டுள்ள சட்டமன்ற எதிர்க்கட்சித் தலைவர் உதயநிதி ஸ்டாலின் அவர்கள், ‘‘பள்ளிகள் சாதிவெறிக்கான களமாக்கப்படுவதை இந்த அரசு உடனே தடுத்து நிறுத்துவதோடு, இந்தச் சம்பவத்தில் மாணவனை தற்கொலைக்குத் தூண்டிய உண்மைக் குற்றவாளிகளை உடனே கைது செய்ய வேண்டும்!’’ என்று குறிப்பிட்டுள்ளார்.

அதன் விவரம் வருமாறு:–

தமிழ்நாடு த.வெ.க. ஆட்சியில் கொலை நாடாக மாற்றப்பட்டுள்ளது. சிறுமிகள் பாலியல் கொலைக்கு உள்ளாகிறார்கள். இளம்பெண்கள் முதல் மூதாட்டிகள் வரை பாலியல் கொடுமைக்கும் படுகொலைக்கும் ஆளாகிறார்கள். மருத்துவமனைகளில் பணியாற்றும் நர்சுகள், பள்ளிகளில் பணி யாற்றும் ஆசிரியைகள் உள்ளிட்ட யாரும் பாதுகாப்பாக வாழ முடிய வில்லை.

செஞ்சியில் காணாமல் போன 7 வயது சிறுமி எங்கே என்று 12 நாட்களாகத் தெரியவில்லை.

குற்றச்செயல் பலவற்றில் த.வெ.க. நிர்வாகிகள் நேரடியாகத் தொடர்பு கொண்டிருப்பது குறித்துப் புகார் தெரிவிக்கப்பட்டாலும் விஜய் அரசு எந்த நடவடிக்கையும் எடுப்பதில்லை. குற்றவாளிகளைத் திட்டமிட்டுக் காப்பாற்றும் வேலையே தொடர்கிறது.

குற்றம் செய்பவர்கள் பயப்படுவது இல்லை. குற்றவாளிகள் தங்களுக்கான அரசாக இதைப் பார்க்கிறார்கள். பொதுமக்களின் அச்ச உணர்வு என்பது அவர்களின் உயிருக்கே ஆபத்தாக முடிந்து விடுகிறது.

பெருந்துறை அருகேசுடுகாட்டில் பட்டியல் இனச் சமூகத்தவரின் உடலை எரித்ததற்காக சாதிய ஒடுக்குமுறை காரணமாக, காலில் விழச் செய்து மன்னிப்பு கேட்க வைத்த கொடூர நிகழ்வு ஏற்படுத்திய அதிர்வு குறைவதற்குள் கோவையில் சாதியப் பாகுபாட்டால் பள்ளி மாணவன் தற்கொலை செய்து மாய்ந்திருக்கிறார்.

இந்தக் கொடூர நிகழ்வைக் கண்டித்து எதிர்க்கட்சித் தலைவரும் - கழக இளைஞர் அணிச் செயலாளருமான உதயநிதி ஸ்டாலின்அவர்கள் தனது கண்டனத்தை சமூக வலைதளத்தில் வெளியிட்டுள்ளார்.

எதிர்க்கட்சித் தலைவர் அவர்களின் சமூக வலைதளப் பதிவு வருமாறு:–

கோவையில் பள்ளியில் ஏற்பட்ட சாதியப் பாகுபாட்டினால் 15 வயதுடைய ஒடுக்கப்பட்ட சமூக மாணவன் தற்கொலை செய்து கொண்ட சம்பவத்தில் இதுவரை குற்றவாளிகளைக் கைதுசெய்யாத இந்த டம்மிஅரசை வன்மையாகக் கண்டிக்கிறேன்.

அந்தப்பள்ளியில் மாணவர்களின் உணவு பழக்க வழக்கங்கள் குறித்து எழுப்பப்பட்ட கேள்விக்கு, மாட்டிறைச்சி உண்பதாகக் கூறிய சம்பந்தப்பட்ட மாணவன், சாதி ரீதியாகப் பாகுபாட்டை எதிர்கொண்டு இருக்கிறார். இதனால் ஏற்பட்ட மன உளைச்சலில் அவர் தற்கொலை செய்து கொண்டிருக்கிறார்.

இந்தச் சூழலில் மாணவனின் பெற்றோர்கள்– உறவினர்களின் போராட்டத்துக்குப் பிறகு வழக்கு மட்டுமே பதிவு செய்துள்ள காவல்துறை, இதுவரை மாணவனின் மரணத்துக்குக் காரணமானவர்களை கைது செய்ய வில்லை.

பள்ளிகள் சாதிவெறிக்கான களமாக்கப்படுவதை இந்த அரசு உடனே தடுத்து நிறுத்துவதோடு, இந்தச் சம்பவத்தில் மாணவனை தற்கொலைக்குத் தூண்டிய உண்மைக் குற்றவாளி களை உடனே கைது செய்ய வேண்டும்.

இவ்வாறு அப்பதிவில் சட்டமன்ற எதிர்க்கட்சித் தலைவர் அவர்கள் குறிப்பிட்டுள்ளார்.