கோவை, அக். 25 –
கோவையில் அரசு உதவி பெறும் பள்ளியில் மாட்டுக்கறி சாப்பிடுவது பற்றியும், சாதி பற்றியும் கேலி பேசியதால் மாணவன் தூக்கிட்டு தற்கொலை செய்து கொண்டார். இந்த வழக்கில், அப்பள்ளி ஆசிரியர் கைது செய்யப்பட்டார். மேலும், தலைமை ஆசிரியர், 2 மாணவர்கள் மீதும் வழக்குப் பதிவு செய்யப்பட்டுள்ளது. மாணவன் சடலத்தை வாங்க மறுத்து உறவினர்கள் சாலைமறியல் போராட்டம் நடத்தி காவல்நிலையத்தை முற்றுகையிட்டதால் பரபரப்பு ஏற்பட்டது.
கோவை பீளமேடு லால்பகதூர் காலனியை சேர்ந்தவர் அசோக்குமார் (45). கேரள மாநிலம் மூணாறில் உள்ள ஒரு தனியார் விடுதியில் சலவை தொழிலாளியாக பணியாற்றி வருகிறார். இவரது மனைவி கவுசல்யாதேவி (41). இவர், அப்பகுதியில் உள்ள குடி யிருப்புகளில் தூய்மை பணியாளராக வேலை செய்து வருகிறார். இத்தம்பதிக்கு நேத்ரா (19) என்ற மகளும், அகிலன் (15) என்ற மகனும் உள்ளனர். நேத்ரா, கோவையில் உள்ள ஒரு தனியார் கல்லூரியில் படித்து வருகிறார். அகிலன், பீளமேடு பகுதியில் உள்ள ஒரு அரசு உதவிபெறும் பள்ளியில் பிளஸ்-1 படித்து வந்தார்.
இந்நிலையில், அகிலன் பள்ளிக்கு செல்ல விருப்பம் இல்லாமல் தொடர்ந்து விடுமுறை எடுத்து வந்துள்ளார். இதுகுறித்து அவரது தாயார் கேட்டபோது பள்ளியில் சாதியப்பாகுபாடு காரணமாக சக மாணவர்கள் தன்னிடம் பேசுவதில்லை என கூறியதாக தெரிகிறது. இதனிடையே கிரிக்கெட் விளையாட்டில்ஆர்வமாக இருந்த அகிலனை, முறையான பயிற்சி வகுப்பில் சேர்த்துவிடுவதாக அவரது தாய் ஆறுதல் கூறியுள்ளார். இதையடுத்து, சரஸ்வதி பூஜை, ஆயுதபூஜை விடுமுறைக்கு பிறகு அகிலன் நேற்று முன்தினம் வழக்கம்போல் பள்ளிக்குசென்றார்.
தூக்கிட்டு தற்கொலை!
மதிய உணவு இடைவேளையின்போது வீடு திரும்பினார். படுக்ைக அறையை உள்பக்கமாக பூட்டிக் கொண்டு, அந்த அறையில் தூக்குபோட்டு தற்கொலை செய்துகொண்டார். இந்த விவரம் அறியாமல், தாய் கவுசல்யா வழக்கம்போல் மதியம் 1 மணியளவில் உணவருந்த வீட்டுக்கு வந்தார். ஆனால், வீட்டின் பிரதான கதவு தாழ்போடாமல் வெறுமனே சாத்தி வைக்கப்பட்டிருந்ததை பார்த்து அதிர்ச்சி அடைந்தார். உள்ளே சென்று பார்த்தபோது பெட்ரூம் பூட்டப்பட்டி ருந்தது.
இதனால், அக்கம் பக்கத்தினர் உதவியுடன் அறை கதவை திறந்து பார்த்தபோது, அகிலன் தூக்கில் பிணமாக தொங்கியதை கண்டு அலறி துடித்தார். தகவல் அறிந்ததும் பீளமேடு போலீசார் வந்து அகிலன் சடலத்தை மீட்டு, பிரேத பரிசோதனைக்காக சிங்காநல்லூர் இ.எஸ்.ஐ. மருத்துவமனைக்கு அனுப்பி வைத்தனர். இதற்கிடையே அகிலன் தற்கொலைக்கு காரணமான பள்ளி நிர்வாகம் மீது நடவடிக்கை எடுக்க வேண்டும் என அகிலனின் பெற்றோர் மற்றும் குடும்பத்தினர் நேற்று முன்தினம் இரவு பீளமேடு போலீஸ் ஸ்டேஷனில் குவிந்தனர்.
காவல்நிலையத்தை முற்றுகையிட்டு கோஷம் எழுப்பினர். சாதிய பாகுபாடு குறித்து பேசிய ஆசிரியர், இதற்கு உடந்தையாக இருந்த தலைமை ஆசிரியர் மற்றும் சக மாணவர்கள் மீது நடவடிக்கை எடுக்க வேண்டும் என வலியுறுத்தினர். இதையடுத்து, போலீசார், அப்பள்ளியின் தலைமை ஆசிரியர், ஆசிரியர் மற்றும் இரண்டு மாணவர்கள் என 4 பேர் மீது வழக்கு பதிவுசெய்தனர். முதல்கட்ட விசார ணைக்கு பிறகு, நேற்று காலை அப்பள்ளி ஆசிரியர் பீளமேட்டை சேர்ந்த விஜயகுமாரை (45) கைது செய்தனர்.
உறவினர்கள் போராட்டம்!
தொடர்ந்து தலைமை ஆசிரியர் அருண்குமார் (45) மற்றும் 2 மாணவர்களை பிடித்து விசாரணை நடத்தி வருகின்றனர்.
ஆனாலும், அகிலன் குடும்பத்தினர், தலைமை ஆசிரியர் அருண்குமார் மற்றும் இதர மாணவர்களை கைது செய்து சிறையில் அடைத்தால்தான் அகிலன் சடலத்தை வாங்குவோம் எனக்கூறி தொடர்ந்து போராட்டத்தில் ஈடுபட்டனர். நேற்று இரண்டாவது நாளாக போராட்டம் தொடர்ந்தது. உறவினர்களும், முற்போக்கு இயக்கத்தினரும் காவல்நிலையத்தை முற்றுகையிட்டு போராட்டம் நடத்தினர். இதனால் நேற்று பிரேத பரிசோதனை நடத்தப்படவில்லை.
இந்நிலையில், பள்ளி தலைமை ஆசிரியர் அருண்குமாரை கைது செய்ய வலியுறுத்தி உறவினர்கள் நேற்று காலை திடீரென அவினாசி சாலையில் அமர்ந்து மறியல் போராட்டத்தில் ஈடுபட்டனர். இதனால் போக்குவரத்து பாதிப்பு ஏற்பட்டது. இதையடுத்து, அங்கிருந்த போலீசார் உறவினர்களை சமாதானப்படுத்தினர். கோவை மாநகர வடக்கு துணை கமிஷனர் தங்கதுரை தலைமையில் பேச்சுவார்த்தை நடத்த காவல் நிலையத் திற்கு அழைத்துச்சென்றனர்.
அப்போது, தலைமை ஆசிரியரை கைது செய்த பின்னரே உடற்கூறாய்வு மேற்கொள்ள ஒப்புதல் வழங்குவோம் என உறவினர்கள் கூறினர். இதுகுறித்து மாணவரின் தந்தை அசோக்குமார் கூறுகை யில், ‘‘ஆசிரியர் வகுப்பறையில் ஸ்காலர்ஷிப் குறி த்து கேட்டபோது எனது மகனின் சாதி அடையாளம் தெரிந்துள்ளது. அப்போது ஆசிரியர் மாட்டு இறைச்சி உண்பது குறித்தும், சக மாண வர்கள் முன்பு கேலி செய்யும் வகையில் கேட்டுள்ளார்.
எனது மகனின் சாதி அடையாளம் குறித்து தெரிந்த பின்னர், சக மாணவர்கள், எனது மகனுடன் பேசுவதை தவிர்த்து வந்துள்ளனர். இதுகுறித்து பள்ளியில் முறையிட்டபோது அப்படி எதுவும் இல்லை, நாங்கள் விசாரிக்கிறோம்.. எனக்கூறினர். ஆனால், பள்ளி ஆசிரியர்கள், சாதிய மனோநிலையில் இருந்துள்ளனர். எனது மகன் அகிலன் இறப்பு குறித்து முழுமையான விசாரணை நடத்தப்பட வேண்டும்.
தற்கொலைக்கு காரணமான அனைவர் மீதும்கடும் நடவடிக்கை எடுக்க வேண்டும். இல்லையெனில், எனது மகனின் உடலை வாங்க மாட்டோம்’’ என்றார். இந்த சம்பவம் கோவையில் பெரும் பரபரப்பை ஏற்படுத்தியுள்ளது. பள்ளி மாணவர்கள் வட்டாரத்தில் பெரும் பீதியை கிளப்பியுள்ளது.
சாதியால் மகனை தனிமைப்படுத்தினர்: போலீசில் தாய் புகார்
மாணவன் அகிலனின் தாய் பீளமேடு போலீசில் அளித்த புகார் மனுவில் கூறியிருப்பதாவது: என் மகன் அகிலன் பள்ளியில் சேர்ந்ததில் இருந்து அடிக்கடி விடுமுறை எடுப்பதும், பள்ளிக்கு செல்ல பிடிக்க வில்லை என்றும் கூறியும் வந்தார். இரண்டு மாதம் முன்பு பள்ளியில் ஸ்காலர்ஷிப் சம்பந்தமாக விசா ரித்தபோது சாதி பற்றி தெரிந்துக்கொண்டு என்னிடம் யாரும் பேசுவதில்லை எனக்கூறி, எனது மகன் என்னிடம் அழுதான்.
கிரிக்கெட் விளை யாட்டில் ஆர்வம் இருந்ததால் பயிற்சியில் சேர்த்து விடுவதாக கூறி சமாதானம் செய்தேன். நேற்று முன்தினம் நான், பணிக்கு சென்று திரும்பியபோது மகன் அகிலன் தூக்கிட்டு தற்கொலை செய்துகொண்டது தெரியவந்தது. எனது மகன் நேற்று முன்தினம் பள்ளிக்கு சென்றானா? என்று தெரியவில்லை. ஏற்கனவே வகுப்பில் பிரச்னையால் மன வேதனையுடன் இருந்து வந்துள்ளான். எனது மகன் இறப்பு குறிந்து உரிய நடவடிக்கை எடுக்க வேண்டும். இவ்வாறு புகார் மனுவில் கூறியுள்ளார்.
த.வெ.க. எம்.எல்.ஏ.வைமுற்றுகையிட்ட உறவினர்கள்!
கோவை பீளமேடு போலீஸ் ஸ்டேஷனில், மாணவன் தற்கொலை விவகாரம் குறித்து விசாரிக்க, சிங்காநல்லூர் தொகுதி த.வெ.க., எம்.எல்.ஏ ஸ்ரீகிரிபிரசாத் நேற்று மதியம் வந்தார். அப்போது, மாணவன் அகிலன் உறவினர்கள் அவரை முற்றுகையிட்ட னர். கேள்வி மேல் கேள்வி கேட்டு துளைத்து எடுத்தனர். அவர், பதிலளிக்க முடியாமல் திணறினார். பின்னர், வேறு வழியின்றி அவசரம் அவசரமாக காரில் ஏறி தப்பிச்சென்றார்.
விசாரணை அதிகாரியை மாற்ற கோரிக்கை
போராட்டம் நடத்தும் மாணவனின் உறவினர்களிடம் போதிய முகாந்திரம் இருந்தால், தலைமை ஆசிரியரை கைது செய்கிறோம் என்று போலீசார் தெரிவித்தனர். ஆனால், மாணவனின் பெற்றோர் தலைமை ஆசிரியரையும் கைது செய்ய வேண்டும் என்பதில் உறுதியாகஇருந்தனர். போலீசார் கடும் அழுத்தம் கொடுப்பதை உணர்ந்த அகிலனின் உறவினர்கள், போலீசாருடன் கடும் வாக்குவாதம் செய்தனர். மேலும், விசாரணை அதிகாரியை மாற்ற வேண்டும் என வலியுறுத்தி கோஷம் எழுப்பினர்.
போலீஸ் கமிஷனருக்கு ஆணையம் நோட்டீஸ்
மாணவர் தற்கொலை தொடர்பாக தமிழ்நாடு ஆதிதிராவிடர் மற்றும் பழங்குடியினர் மாநில ஆணையத் தலைவர் (பொ) அண்ணாமலை, உறுப்பினர்கள் செல்வக்குமார், இளஞ்செழியன், ஆனந்தராஜா ஆகியோர் கொண்ட சிறப்பு அமர்வு கோவை மாநகர கமிஷனர் (பொ) ரமயா பாரதி, ஒரு வாரத்திற்குள் அறிக்கை சமர்ப்பிக்குமாறு நோட்டீஸ் அனுப்பி உள்ளனர்.