சென்னை, அக்.26–
கழகத் தலைவர் மு.க.ஸ்டாலின் அவர்கள், நேற்று (25.10.2026) விடுத்த வலைதளப் பதிவில், ‘‘தி.மு.க. கட்டமைத்த தமிழ்நாடு, இன்று த.வெ.க. ஆட்சியில் கொடுங்காடாகி விட்டது’’ என்றும் ‘‘கொலைக்களமாகவும் குற்றவாளிகளின் வேட்டைக்காடாகவும் தமிழ்நாடு மாறி வருகிறது!’’ என்றும் கடும் கண்டனம் தெரிவித்துள்ளார்.
நமது மாநிலத்திற்கு ‘தமிழ்நாடு’ எனப் பெயர் சூட்டி, அதன் உள்கட்டமைப்பையும் வளர்ச்சியையும் மேம்படுத்தியது தி.மு.க. ஆட்சி. விஜய் தலைமையிலான த.வெ.க ஆட்சியில் நமது தமிழ்நாடு, மனிதர்கள் வாழத் தகுதியில்லாத மாநிலமாக மாறி
வருகிறது.
கடந்த இரண்டு மாதங்களில் தமிழ்நாட்டில் தொடர்ச்சியாக நடைபெற்று வரும் கொலைகள், கொள்ளைகள், போதைப் பொருள் விவகாரங்கள், பெண்கள் மீதான பாலியல் குற்றங்கள், சிறுமிகளுக்கும்கூட பாதுகாப்பில்லாத நிலை, மோசமாகச் சீரழிந்துள்ள சட்டம்–ஒழுங்கு நிலவரம் ஆகியவற்றைப் பட்டியலிட்டு கழகத் தலைவர் அவர்கள் தனது சமூக வலைத்தளப்பக்கத்தில் பதிவிட்டுள்ள செய்தியில், ‘‘இது நாடா? இல்லை காடா? என்று தேர்தலுக்கு முன் விஜய் பேசியது இதைத்தானா?’’ எனக் கேள்வி எழுப்பியுள்ளார்.
கழகத்தலைவரின் வலைதளப் பதிவு வருமாறு:–
த.வெ.க. ஆட்சியில் Wild Wild Tamil Nadu..!
கடந்த இரு மாதங்களாகத் தமிழ்நாட்டில்
முன்னெப்போதும் இல்லாத அளவுக்கு நடைபெற்று வரும் கொலை, கொள்ளை, பாலியல் வன்கொடுமை மற்றும் சிறுவர்கள் மாயமாகும் சம்பவங்களால் பொதுமக்கள் பீதியில் உறைந்து போயுள்ளனர். இதை முன்பே கணித்துத்தான், “இது என்ன நாடா இல்லை காடா?” என நாஸ்ட்ரடாமஸ் போல தேர்தலுக்கு முன்பு விஜய் அவர்கள் பேசினாரா?
‘துப்பாக்கி ஹீரோ’ எனத் திரையில் பார்த்ததை நம்பி வாக்களித்த மக்களே, குற்றங்களைத் தடுக்கத் ‘துப்பில்லாத ஹீரோ’ எனப் பேசத் தொடங்கிவிட்டனர். கோட் சூட் – பட்டு வேட்டி சட்டை அணிவதும், கான்வாயில் வந்து செல்வதும் மட்டும்தான் முதலமைச்சரின் பணி என்ற மூடநம்பிக்கையில் இருந்து எப்போது விடுபடுவார் திரு. விஜய்?
முதமைச்சருக்கான அலுவலகத்தையும்,
இல்லத்தையும் தயார் செய்வது தொடர்பான வேலைகளைத் தவிர, ஆறு மாத த.வெ.க.
ஆட்சியில் உருப்படியாக வேறு ஒன்றுமே நடந்ததாகத் தெரியவில்லை.
தனது சொகுசைப் பற்றி இருக்கும் அக்கறையில் சிறிதேனும் பொதுமக்கள், குழந்தைகளின் பாதுகாப்பில் முதலமைச்சருக்கு இருக்க
வேண்டும்.
கொலைக்களமாகவும் குற்றவாளிகளின் வேட்டைக்காடாகவும் தமிழ்நாடு மாறி வருவது தடுத்து நிறுத்தப்பட வேண்டும்.
இவ்வாறு கழகத் தலைவர் குறிப்பிட்டுள்ளார்.