சென்னை, அக். 26 –
தமிழ்நாடு முழுவதும் அரசின் நில அளவை பணிகளை தனியார்மயமாக்க த.வெ.க. அரசு முடிவு செய்துள்ளதால்,நூற்றுக்கணக்கானோர் வேலையிழக்கும் அபாயம் ஏற்பட் டுள்ளதாக ‘தினத்தந்தி’ நாளேடு விமர்சித்துள்ளது.
அரசு நிர்வாகத்தில் ஒரு தாய் துறை போல் இயங்கி வந்த நில அளவை துறை தற்போது தமிழகத்தை பொறுத்த வரை வருவாய் மற்றும் பேரிடர் மேலாண்மை துறையில் ‘நில அளவை மற்றும் தீர்வு பிரிவு’ என்ற பெயரில் ஒரு தனிபிரிவாக இயங்கி வருகிறது.
நிலம் தொடர்பான பட்டா, சிட்டா, அடங்கல் உள்ளிட்ட ஆவணங்களை கையாளும் கிராம நிர்வாக அலுவலர்கள் வருவாய் துறையின் முதுகெலும்பு போன்றவர்கள்என்றால், அதற்கு அடுத்த நிலையில் நிலத்தை அளவீடு செய்து அவற்றை உறுதி செய்பவர்களாக நில அளவையர்கள் உள்ளனர் என்று குறிப்பிட்டுள்ளது.
இந்த நிலையில், இவர்கள் தங்களை பணி நிரந்தரம் செய்ய வேண்டும், ஊதிய உயர்வு வழங்க வேண்டும் என்ற கோரிக்கைகளை வலியுறுத்தி அரசின் உயர் அதிகாரிகளை அணுகிய போது வருகிற டிசம்பர் மாதத்துடன் இவர்களை பணி நீக்கம் செய்து விட்டு, தற்காலிகமாக தேர்ந்தெடுக்கப்பட்டு பயிற்சியில் இருப்பவர்கள் உள்ளிட்ட ஒட்டுமொத்த சர்வே பணிகளையும் ஒப்பந்த அடிப்படையில் தனியாருக்கு கொடுக்க போவதாக வெளியான தகவல் உரிமம் பெற்ற சர்வேயர்களை அதிர்ச்சி அடைய வைத்துள்ளது.
திடீர் என பணி நீக்கம் செய்தால் நாங்கள் வாழ்வாதாரத்திற்காக எங்கே செல்வது? நாங்கள் செய்த பணிகளால், தற்போது நில அளவை பிரிவில் தேங்கிக்கிடந்த கோப்புகள் குறைந்து, பொதுமக்கள் கொடுக்கும் மனுக்களுக்கு 30 நாட்களில் தீர்வு காணும் வகையில் மேம்பாடு ஏற்பட்டுள்ளது என்று நில அளவர் சங்கத்தினர் தெரிவித்துள்ளனர்.
பொதுமக்கள் நலன் கருதி தங்களை பணி நிரந்தரம் செய்து, கால முறை ஊதியம் வழங்க உத்தரவிட வேண்டும் என்று உரிமம் பெற்ற நில அளவர் சங்கத்தினர் கோரிக்கை விடுத்துள் ளதை குறிப்பிட்டு ‘தினத்தந்தி’ நாளிதழ் விரிவாக எடுத்துரைத்துள்ளது.