சென்னை,அக். 27 –
வங்கக்கடலில் நிலவிய ஆழ்ந்த காற்றழுத்தத் தாழ்வுப் பகுதி, காற்றழுத்தத் தாழ்வு மண்டலமாக வலுப்பெற்றுள்ளதாக இந்திய வானிலை ஆய்வு மையம் தெரிவித்துள்ளது. இது மேலும் வலுப்பெற்று அக்டோபர் 26–ஆம் தேதி புயலாக மாறக்கூடும் என்றும், அக்டோபர் 28–ஆம் தேதி மிகத் தீவிரப் புயலாக ஆந்திர பிரதேச கடற்கரையைக் கடக்கக்கூடும் என்றும் இந்திய வானிலை ஆய்வு மையம் தெரிவித்துள்ளது.
இதற்கிடையே, தமிழ்நாட்டின் பல்வேறு மாவட்டங்களில் நேற்று முன்தினம் (அக்டோபர் 25) கனமழை முதல் அதி கனமழை வரை பெய்ய வாய்ப்புள்ளதாக சென்னை வானிலை ஆய்வு மையம் எச்சரித்துள்ளது.
குறிப்பாக புதுக்கோட்டை, தஞ்சாவூர், அரியலூர், பெரம்பலூர் மற்றும் திருச்சிராப்பள்ளி மாவட்டங்களில் ஓரிரு இடங்களில் அதி கனமழை பெய்யக்கூடும் என்பதால் ரெட் அலர்ட் எச்சரிக்கை விடுக்கப்பட்டுள்ளது.
சென்னை உள்ளிட்ட வடதமிழக மாவட்டங்களிலும் கனமழைக்கு வாய்ப்புள்ளது.
மத்திய கிழக்கு மற்றும் அதையொட்டிய தென்கிழக்கு வங்கக்கடலில் நிலவிய ஆழ்ந்த காற்றழுத்தத் தாழ்வுப் பகுதி, சனிக்கிழமை (அக்டோபர் 24) மாலை5.30 மணியளவில் காற்றழுத்தத் தாழ்வு மண்டலமாக வலுப்பெற்றது.
அப்போது விசாகப்பட்டினத்தில் இருந்து கிழக்கு–தென்கிழக்கே சுமார் 820 கி.மீ. தொலைவில் மையம் கொண்டிருந்த இந்த அமைப்பு, அடுத்த ஆறு மணிநேரத்தில் மணிக்கு 8 கிலோமீட்டர் வேகத்தில் தென்கிழக்கு திசையில் நகர்ந்துள்ளது.
இந்திய வானிலை ஆய்வு மையம் வெளியிட்ட சமீபத்திய அறிவிப்பின்படி, சனிக்கிழமை இரவு 11.30 மணியளவில் இந்தக் காற்றழுத்தத் தாழ்வு மண்டலம் விசாகப்பட்டினத்தில் இருந்து 860 கி.மீ. தொலைவிலும், காக்கிநாடாவில் இருந்து 950 கி.மீ. தொலைவிலும், மச்சிலிப்பட்டினத்தில் இருந்து 1,060 கி.மீ. தொலைவிலும் நிலைகொண்டிருந்தது.
நேற்று முன்தினம் (அக்டோபர் 25) இந்த அமைப்பு தெற்கு நோக்கிநகர்ந்து ஆழ்ந்த காற்றழுத்தத் தாழ்வுமண்டலமாக வலுப்பெற்றது.
பின்னர் படிப்படியாக மேற்கு–வடமேற்கு திசையில் திரும்பும்
என்றும் கணிக்கப்பட்டுள்ளது.
அதன்பிறகு வடமேற்கு திசையில் நகர்ந்து அக்டோபர் 28ஆம் தேதி காலையில் மிகத் தீவிரப் புயலாக ஆந்திர பிரதேச கடற்கரையை நெருங்கும் என்று இந்திய வானிலை ஆய்வு மையம்
தெரிவித்துள்ளது.
அக்டோபர் 28–ஆம்தேதி முற்பகலில் ஆந்திர பிரதேசம் மற்றும் ஏனாம் கடலோரப் பகுதிகளில், பாபட்லாவுக்கும் விசாகப்பட்டினத் திற்கும் இடையே இந்தப் புயல் கரையைக் கடக்கக்கூடும் என்று கணிக்கப்பட்டுள்ளது.
அப்போது மணிக்கு 115 முதல் 125 கி.மீ. வேகத்தில் பலத்த காற்று வீசக்கூடும். இடையிடையே காற்றின் வேகம் மணிக்கு 140 கி.மீ. வரை அதிகரிக்கக்கூடும் என்றும் எச்சரிக்கப்பட்டுள்ளது.
ஆந்திர பிரதேசம் மற்றும் அதை ஒட்டிய தெற்கு ஒடிஷா கடலோரப் பகுதிகளுக்குப் புயல் உருவாவதற்கு முந்தைய மஞ்சள் நிற முன்னெச்சரிக்கையையும் இந்திய வானிலை ஆய்வு மையம் வெளியிட்டுள்ளது.
கடலூர், மயிலாடுதுறை, நாகப்பட்டினம், திருவாரூர், தஞ்சாவூர், புதுக்கோட்டை, அரியலூர், பெரம்பலூர், திருச்சி, கரூர், நீலகிரி, கோவை, திருப்பூர், சிவகங்கை ஆகிய மாவட்டங்களிலும் காரைக்கால் பகுதியிலும் ஓரிரு இடங்களில் கனமழை முதல் மிக கனமழை வரை பெய்ய வாய்ப்புள்ளது.
சென்னை, திருவள்ளூர், செங்கல்பட்டு, காஞ்சிபுரம், விழுப்புரம், கள்ளக்குறிச்சி, வேலூர், ராணிப்பேட்டை, திருப்பத்தூர், திருவண்ணாமலை, நாமக்கல், சேலம், தர்மபுரி, கிருஷ்ணகிரி, ஈரோடு, விருதுநகர், கன்னியாகுமரி உள்ளிட்ட மாவட்டங்களிலும் புதுச்சேரி யிலும் ஓரிரு இடங்களில் கனமழை பெய்யக்கூடும்.
மழையின்போது சில பகுதிகளில் இடி, மின்னல் மற்றும் பலத்த காற்றும் வீசக்கூடும் என்பதால் பொதுமக்கள் எச்சரிக்கையுடன் இருக்குமாறு அறிவுறுத்தப்பட்டுள்ளது.
நேற்று அக்டோபர் 26–ஆம் தேதி சிவகங்கை, ராமநாதபுரம் மற்றும் புதுக்கோட்டை மாவட்டங்களில் ஓரிரு இடங்களில் கனமழை முதல் மிக கனமழை வரை பெய்யக்கூடும் என்று வானிலை ஆய்வு மையம் தெரிவித்துள்ளது.
நீலகிரி, கோவை, தேனி, மதுரை, திண்டுக்கல், விருதுநகர், தென்காசி, திருநெல்வேலி, கன்னியாகுமரி, தூத்துக்குடி, கரூர், திருவாரூர் மற்றும் நாகப்பட்டினம் ஆகிய மாவட்டங்களிலும் ஓரிரு இடங்களில் கனமழை பெய்ய வாய்ப்புள்ளது.
அக்டோபர் 27–ஆம் தேதி ராமநாதபுரம் மாவட்டத்தில் ஓரிரு இடங்களில் கனமழை பெய்யக்கூடும்.
அக்டோபர் 28–ஆம் தேதி தென்தமிழகத்தில் ஓரிரு இடங்களில் லேசானது முதல் மிதமான மழை வரை பெய்ய வாய்ப்புள்ளது. தமிழகத்தின் பெரும்பாலான பிற பகுதிகளில் மழையின் தீவிரம் குறையக்கூடும் என்று வானிலை ஆய்வு மையம் கணித்துள்ளது.