#Title

சிங்கப்பூர் லீ குவான் யூ பொதுக் கொள்கைப் பள்ளியின் ‘பெண்கள் மற்றும் தலைமைத்துவம்’ பயிலரங்கில் பங்கேற்க முனைவர். தமிழச்சி தங்கபாண்டியன் எம்.பி. சிங்கப்பூர் பயணம்! கழகத் தலைவர் மு.க.ஸ்டாலினிடம் வாழ்த்துப் பெற்றார்!

சென்னை, அக். 28 –

தென்சென்னை மக்களவைத் தொகுதி உறுப்பினர் முனைவர். தமிழச்சி தங்கபாண்டியன் அவர்கள், சிங்கப்பூரில் உள்ள தேசியப் பல்கலைக்கழகத்தின் (National University of Singapore) அங்கமாகச் செயல்படும், பொதுக் கொள்கைக்கல்வியில் உலகின் முன்னணி நிறுவனங்களில் ஒன்றான லீ குவான் யூ பொதுக் கொள்கைப் பள்ளியில் (Lee Kuan Yew School of Public Policy) நடைபெறவுள்ள ‘பெண்கள் மற்றும் தலைமைத்துவம்’ (Women and Leadership) பயிலரங்கில் பங்கேற்கச் சிங்கப்பூர் சென்றார்.

இதனையொட்டி, கழகத் தலைவர் மு.க. ஸ்டாலின் அவர்களைச் சந்தித்து வாழ்த்துப் பெற்றார்.

சிங்கப்பூர் குடியரசின் சென்னையிலுள்ள துணைத் தூதரகம் (Consulate-General of the Republic of Singapore), இப்பயிலரங்கில் பங்கேற்க டாக்டர் தமிழச்சி தங்கபாண்டியன் அவர்களுக்கு அழைப்பு விடுத்துள்ளது. பொதுக் கொள்கை, ஆளுகை மற்றும் தலைமைத்துவத் துறைகளில் பெண்களின் பங்களிப்பை மேம்படுத்தும் நோக்கில் இந்தப் பயிலரங்கு ஏற்பாடு செய்யப்பட்டுள்ளது.

பெண் தலைவர்களின் தலைமைத்துவத் திறன்களை மேம்படுத்துவதோடு, பல்வேறு நாடுகளைச் சேர்ந்த பெண் தலைவர்கள் தங்களது அனுபவங்களையும் கருத்துகளையும் பகிர்ந்துகொள்வதற்கான சர்வதேசத் தளமாகவும் இப்பயிலரங்கு அமைகிறது. ஆளுகை சார்ந்த பொதுவான சவால்கள், பெண்களின் தலைமைத்துவ வளர்ச்சி மற்றும் சமூக முன்னேற்றத்திற்கான கூட்டு முயற்சிகள் குறித்து இதில் கலந்துரையாடப்பட உள்ளது.

இப்பயிலரங்கில் பங்கேற்கச் சிங்கப்பூர் செல்வதற்கு முன்னதாக, சென்னையில் உள்ள சிங்கப்பூர் குடியரசின் துணைத் தூதர் வில்லியம் சிக் (Mr William Chik) அவர்களை முனைவர். தமிழச்சி தங்கபாண்டியன் சந்தித்தார்.

இப்பயிலரங்கில் பங்கேற்கத் தமக்கு அழைப்பு விடுத்தமைக்காகவும், ஆதரவளித்தமைக்காகவும் துணைத் தூதரகத்திற்கு அவர் தனது நன்றியைத் தெரிவித்துக்கொண்டார்.

சர்வதேச அளவில் பல்வேறு நாடுகளைச் சேர்ந்த பெண் தலைவர்களுடன் கலந்துரையாடும் இந்த வாய்ப்பில் பங்கேற்பதில் தமக்குள்ள ஆர்வத்தையும் அவர் வெளிப்படுத்தினார்.

இப்பயிலரங்கின் முக்கியத்துவம் குறித்து முனைவர். தமிழச்சி தங்கபாண்டியன் கூறுகையில்,

“வெவ்வேறு நாடுகளையும், பல்வேறு பின்னணி களையும் சேர்ந்த பெண் தலைவர்கள் ஒரே தளத்தில் சந்திப்பது, எல்லைகளைக் கடந்த சிந்தனைகளையும் கருத்துப் பரிமாற்றங்களையும் முன்னெடுப்பதற்கான வாய்ப்பை உருவாக்கு கிறது. நாடாளுமன்ற உறுப்பினர்கள், கொள்கை வகுப்பாளர்கள், தொழில் துறையைச் சேர்ந்த தலைவர்கள் எனப் பல்வேறு தரப்பினரும் ஒன்றிணையும்போது, பெண்கள் எதிர்கொள்ளும் பொதுவான சவால்களுக்குத் தீர்வு காணவும், கல்வி, திறன் மேம்பாடு, பொருளாதாரப் பங்கேற்பு ஆகிய துறைகளில் கருத்துகளைப் பகிர்ந்துகொள்ளவும், பாலினச் சமத்துவத்தை முன்னெடுப்பதற்கான கூட்டு முயற்சிகளை உருவாக்கவும் முடியும்.

தமிழ்நாட்டு மேனாள் முதலமைச்சர் அண்ணன்மு.க.ஸ்டாலின் அவர்களின்தலைமையில், பெண்கள் முன்னேற்றம் மற்றும் சமூகநீதிக்கு தமிழ்நாடு தொடர்ந்து முக்கியத்துவம் அளித்து வந்துள்ளது. தமிழ்நாட்டின் அனுபவங்களை இந்தச் சர்வதேசத் தளத்தில் பகிர்ந்துகொள்வதோடு, தெற்காசிய நாடுகளைச் சேர்ந்த பெண் தலைவர்களின் அனுபவங்களிலிருந்தும் கற்றுக்கொள்ள ஆவலுடன் காத்திருக்கிறேன்” என்றார்.

தென் சென்னை மக்களவைத் தொகுதியைப் பிரதிநிதித்துவப்படுத்தி, பெண்களின் தலைமைத்துவம், அனைவரையும் உள்ளடக்கிய ஆளுகை மற்றும் சமூக மேம்பாடு குறித்த தமிழ்நாட்டின் அனுபவங்களையும் பார்வைகளையும் சர்வதேச அரங்கில் பகிர்ந்துகொள்வதற்குக் கிடைத்துள்ள இந்த வாய்ப்பை டாக்டர் தமிழச்சி தங்கபாண்டியன் நன்றியுடன் வரவேற்றுள்ளார்.

இந்தப் பங்கேற்பு இந்தியா – சிங்கப்பூர் இடையிலான உறவுகளை மேலும் வலுப்படுத்தவும், பிராந்திய ஒத்துழைப்பை மேம்படுத்தவும், பல்வேறு நாடுகளைச் சேர்ந்த பெண் தலைவர்களிடையே நீடித்த தொடர்புகளை உருவாக்கவும் உதவும். மேலும், கல்வி, திறன் மேம்பாடு, பொருளாதார வாய்ப்புகள் மற்றும் பெண்களின் பிரதிநிதித்துவம் ஆகியவை அனைவரையும் உள்ளடக்கிய சமூகங்களை உருவாக்குவதில் வகிக்கும் பங்கு குறித்த ஆக்கபூர்வமான கருத்துப் பரிமாற்றங்களுக்கும் இப்பயிலரங்கு வழிவகுக்கும்.