சென்னை, அக்.28–
மேனாள் பள்ளிக்கல்வித்துறை அமைச்சர் அன்பில் மகேஸ் பொய்யாமொழி கைது செய்யப்பட்டு புழல் சிறைச்சாலையில் அடைக்கப்பட்டுள்ள நிலையில், அவரைச் சென்னை கிழக்கு மாவட்டக் கழகச் செயலாளரும், மேனாள் அமைச்சருமான பி.கே. சேகர்பாபு
எம்.எல்.ஏ. நேற்று (27.10.2026) நேரில் சந்தித்துப் பேசினார்.
அதனைத் தொடர்ந்து, சிறைச்சாலைக்கு வெளியே செய்தியாளர்களைச் சந்தித்த அவரிடம், “அன்பில் மகேஸ் பொய்யாமொழி மீதான கைது நடவடிக்கை சரியான நடவடிக்கைதான்; தமிழக அரசு சரியான நடவடிக்கையைத்தான் எடுத்திருக்கிறது என்று நிதி அமைச்சர் தெரிவித்திருக்கிறாரே?” எனச் செய்தியாளர்கள் கேள்வி எழுப்பினர்.
அதற்குப் பதிலளித்த பி.கே. சேகர்பாபு எம்.எல்.ஏ., கைது நடவடிக்கைகளால் திராவிட முன்னேற்றக் கழகத்தை ஒருபோதும் மிரட்ட முடியாது என்றும், இதுபோன்ற அடக்குமுறைகளுக்கெல்லாம் அஞ்சுகின்ற இயக்கம் தி.மு.க. அல்ல என்றும் தெரிவித்தார்.
மேலும் அவர் செய்தியாளர்களிடம் கூறியதாவது:
அன்பில் மகேஸ் பொய்யாமொழி ஓடி ஒளியக்கூடியவர் அல்ல. மூன்றாவது தலைமுறையாகத் திராவிட முன்னேற்றக் கழகத்தில் பாரம்பரியமாகப் பயணித்து வருபவர். காவல்துறை விசாரணைக்கு அழைத்தபோது முழுமையான ஒத்துழைப்பு வழங்கியதோடு, எப்போது அழைத்தாலும் விசாரணைக்கு ஆஜராகத் தயாராக இருப்பதாகவும் உறுதிபடத் தெரிவித்தவர்.
இவ்வளவு விளக்கங் களையும் அளித்து, விசாரணைக்கு முழுமையாக ஒத்துழைத்து வந்த நிலையிலும், எந்தவிதமான அடிப்படை முகாந்திரமும் இல்லாமல் இந்தக் கைது நடவடிக்கை மேற்கொள்ளப்பட்டுள்ளதாகக் கருதுகிறோம்.
இதுபோன்ற கைது நடவடிக்கைகளின் மூலம் திராவிட முன்னேற்றக் கழகத்தை மிரட்டிப் பார்க்கலாம் என்று நினைக்கிறார்கள். ஆனால், இத்தகைய மிரட்டல்களுக்கெல்லாம் அஞ்சுகின்ற இயக்கம் திராவிட முன்னேற்றக் கழகம் அல்ல.
“உங்களிடம் சொன்னவரிடம் போய்ச் சொல்லுங்கள்!”
சொந்தக் குடும்பத்தின ரையே உருட்டுக்கட்டையால் தாக்குகின்ற இயக்கம் அல்ல எங்கள் இயக்கம். குடும்பப் பாசத்தோடும், கொள்கை உறவோடும், உடன்பிறப்புகள் என்ற உணர்வோடும் ஒன்றிணைந்து செயல்படுகின்ற இயக்கம்தான் திராவிட முன்னேற்றக் கழகம்.
அன்பில் மகேஸ் பொய்யாமொழி அவர்கள் சிறைச்சாலையில் எந்தவிதமான கூடுதல் வசதிகளையும் கேட்க மாட்டார். சிறைத்துறை விதிகளின்படி அனுமதிக்கப்படும் வசதிகளைத் தவிர, எந்தவொரு சிறப்புச் சலுகையையும் எதிர்பார்க்க மாட்டார்.
இந்தக் கைது நடவடிக்கை அவரைத் தளர்த்திவிடவில்லை. மாறாக, மேலும் உறுதியானவராகவே மாற்றியிருக்கிறது.
எங்கள் உயிரினும் மேலான அன்புத் தலைவர் தளபதி மு.க. ஸ்டாலின் அவர்கள் எங்களோடு இருக்கிறார். கழக இளைஞரணிச் செயலாளரும், சட்டப்பேரவை எதிர்க்கட்சித் தலைவருமான உதயநிதி ஸ்டாலின்அவர்கள் உறுதியோடு களத்தில் நிற்கிறார். அவர்கள் எங்களோடு இருக்கின்றவரை எங்களைப் போன்ற கழகத் தொண்டர்களுக்கு எந்தவிதமான அச்சமும் இல்லை.
“மாங்குயில் கூவிடும் பூஞ்சோலை – நமை மாட்ட நினைக்கும் சிறைச்சாலை!”
என்ற புரட்சிக்கவிஞர் பாரதிதாசனின் வரிகள்தான் இந்த நேரத்தில் நினைவுக்கு வருகின்றன.
சிறைச்சாலையைக் காட்டி எங்களை மிரட்ட முடியாது. கைது நடவடிக்கைகளாலும், அடக்குமுறைகளாலும் திராவிட முன்னேற்றக் கழகத்தை ஒருபோதும் அசைத்துவிட முடியாது.
இவ்வாறு சென்னை கிழக்கு மாவட்டக் கழகச் செயலாளரும், மேனாள் அமைச்சருமான பி.கே. சேகர்பாபு எம்.எல்.ஏ. செய்தியாளர்களிடம் தெரிவித்தார்.
சென்னை, அக்.28–
கம்பம் கே.எஸ். அப்பாஸ் மறைவுக்கு – கழகத் தலைவர் மு.க.ஸ்டாலின் அவர்கள் விடுத்துள்ள இரங்கல் செய்தி வருமாறு:–
முல்லைப் பெரியாறு அணையில் தமிழ்நாட்டின் உரிமைகளை நிலைநாட்டுவதற்காகத் தன்னையே அர்ப்பணித்துக் கொண்ட கம்பம் கே.எஸ். அப்பாஸ் அவர்கள் மறைந்த செய்தி மிகுந்த துயரமளிக்கிறது.
உழவர்களின் வாழ்வாதாரம், நீர்வளப் பாதுகாப்பு உள்ளிட்ட பல தளங்களில் களப்பணியையும் கருத்தியல் தெளிவையும் இணைத்துச் செயலாற்றிய அவரது பிரிவால் துயருற்றுள்ள குடும்பத்தினருக்கும், உடனிருந்து களமாடிய தோழர்களுக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்.
இவ்வாறு கழகத் தலைவர் மு.க.ஸ்டாலின் அவர்கள் தெரிவித்துள்ளார்.