சென்னை, அக்.28–
சென்னை மாவட்ட வளர்ச்சி ஒருங்கிணைப்பு மற்றும் கண்காணிப்புக் குழுக் (DISHA) கூட்டம், குழுவின் தலைவர் – கழக நாடாளுமன்றக் குழுத் துணைத் தலைவரும் கழக விளையாட்டு மேம்பாட்டு அணிச் செயலாளருமான தயாநிதி மாறன் எம்.பி. தலைமையில் இன்று (28.10.2026 புதன்கிழமை) காலை 10.00 மணியளவில், பெருநகர சென்னை மாநகராட்சி ரிப்பன் கட்டிட வளாகத்தில் அமைந்துள்ள அம்மா மாளிகையில் நடைபெறுகிறது.
இக்கூட்டத்தில் சென்னை மாவட்ட ஆட்சித் தலைவர் திருமதி.எஸ்.மாலதி ஹெலன், வரவேற்புரை ஆற்றுகிறார். கூட்ட நிகழ்வை மத்திய சென்னை நாடாளுமன்ற உறுப்பினர் – கழக நாடாளுமன்ற குழு துணைத் தலைவர் தயாநிதி மாறன் எம்.பி தலைமை ஏற்று நடத்துகிறார்.
குழுவின் துணைத் தலைவர்கள் – வடசென்னை நாடாளுமன்ற உறுப்பினர் டாக்டர் கலாநிதி வீராசாமி மற்றும் தென் சென்னை நாடாளுமன்ற உறுப்பினர் திருமதி தமிழச்சி தங்கபாண்டியன், சென்னை கிழக்கு மாவட்டக் கழகச் செயலாளரும் துறைமுகம் சட்டமன்ற உறுப்பினருமான பி.கே.சேகர்பாபு, மேயர் திருமதி.ஆர்.பிரியா, துணை மேயர் மு.மகேஷ்குமார், சென்னை மேற்கு மாவட்டக் கழகச் செயலாளரும் பெருநகர சென்னை மாநகராட்சி பணிகள் நிலைக்குழுத் தலைவருமான நே.சிற்றரசு, சட்டமன்ற உறுப்பினர்கள், பெருநகர சென்னை மாநகராட்சி ஆணையாளர் ஜி.எஸ்.சமீரன், மாவட்ட வருவாய் அலுவலர் திருமதி.ப.கீதா பிரியா குழு உறுப்பினர்கள் அழகிரி சதாசிவம், மரு.யாழினி, செல்வி.நிவேதா ஜெஸிகா, திருமதி.நவநீதம் இளமந்தா மற்றும் அரசு உயர் அலுவலர்கள் பங்கேற்கின்றனர்.
இக்கூட்டத்தில், சென்னைமாவட்டத்தில் பெருநகர சென்னை மாநகராட்சி, சென்னைப் பெருநகர் குடிநீர் வழங்கல் மற்றும் கழிவுநீரகற்று வாரியம், தமிழ்நாடு மின் உற்பத்தி மற்றும் மின் பகிர்மானக் கழகம், மாவட்ட சமூக நல அலுவலகம், ஒருங்கிணைந்த குழந்தைகள் மேம்பாட்டுத் துறை, தேசிய நெடுஞ்சாலை ஆணையம், சென்னை மெட்ரோ இரயில் நிறுவனம், இந்தியன் ரயில்வே, தேசிய சமூக இணைத் திட்டம், டிஜிட்டல் இந்தியா நிலப் பதிவுகள் நவீனமயமாக்கல் திட்டம், அனைவருக்கும் கல்வி இயக்கம் (SSA), மாவட்ட ஆதிதிராவிடர் நலத்துறை (பிரதம மந்திரி முன்னோடி கிராமத் திட்டம்), பி.எஸ்.என்.எல் உள்ளிட்ட பல்வேறு துறைகளில் ஒன்றிய அரசின் மூலம் மேற்கொள்ளப்பட்டு வரும் திட்டங்கள் குறித்தும், மேற்கொள்ளப்பட உள்ள திட்டங்கள் குறித்தும், திட்டத்தின் பலன்கள் மக்களுக்கு விரைந்து சென்றடையும் வகையில் செயல்படுத்த ஆய்வு செய்கின்றனர்.