சென்னை, அக்.28–
அடிக்கடி செயலிழந்துப்போகும் சென்னையின் ‘எஸ்பேண்ட் டாப்ளர்’ வானிலை ரேடாரை துரித கதியில் சரிசெய்யக் கோரி, கழகத் தலைவர் திரு.மு.க.ஸ்டாலின் அவர்களின் வழிகாட்டுதலின்படி கழக நாடாளுமன்றக் குழு துணைத் தலைவரும், கழக விளையாட்டு மேம்பாட்டு அணிச் செயலாளருமான தயாநிதி மாறன் எம்.பி. ஒன்றிய அரசை வலியுறுத்தியுள்ளார்.
இதுகுறித்து பிரதமர் மோடி அவர்களுக்கு எழுதியுள்ள அக்கடித்தத்தில் குறிப்பிட்டுள்ளதாவது:
சென்னை துறைமுக அறக்கட்டளை நூற்றாண்டு கட்டிடத்தில் நிறுவப்பட்டுள்ள ‘எஸ்பேண்ட் டாப்ளர்’ வானிலை ரேடார் மீண்டும் செயலிழந்துள்ள விவகாரம் குறித்து உங்களுக்கு மீண்டும் கடிதம் எழுதுகிறேன். இந்த ரேடார் மீண்டும் செயல்பாடின்றிப் போயிருப்பது, மோசமான வானிலை முன்னறிவிப்புகள் வரவிருக்கும் சூழலில், சென்னையின் வானிலை கண்காணிப்பு மற்றும் பேரிடர் முன்னெச்சரிக்கை திறன்கள் குறித்த கவலையை தீவிரமாக்கியுள்ளது.
இது குறித்து, 2–12–2020 மற்றும் 12–11–2021 ஆகிய தேதிகளில் கடிதங்கள் வாயிலாக உங்கள் கவனத்திற்குக் கொண்டு வந்துள்ளேன்.
மேலும் 08–12–2021, 16–03–2022, 20–07–2022, 07–08–2024 ஆகிய தேதிகளில் மக்களவையிலும் நான் கேள்வி எழுப்பியுள்ளேன்.
எனது தொடர்ச்சியான முறையீடுகளே இந்தச் சிக்கலின் தீவிரத்தையும், அது நீண்டகாலமாக நீடித்து வருவதையும் உணர்த்துகின்றன. நாடாளுமன்றத்தில் அளிக்கப்பட்ட பதில்களில், புவி அறிவியல் அமைச்சகம் (Ministry of Earth Sciences), இந்த ரேடாரில் ஏற்பட்டுள்ள இயந்திரக் கோளாறுகள், உதிரிபாகங்களைப் பெறுவதில் உள்ள சிரமங்கள் மற்றும் 24 மணிநேரமும் தடையின்றிச் செயல்படுவதில் உள்ள தடைகள் ஆகியவற்றை ஒப்புக்கொண்டிருந்தது. தற்போது மீண்டும் இந்த ரேடார் செயலிழந்துள்ளதிலிருந்து நம்பகமான மற்றும் தடையற்ற செயல்பாட்டை உறுதி செய்வதற்கான அடிப்படைச் சிக்கல் இன்னும் முறையாகத் தீர்க்கப்படவில்லை என்பதையே காட்டுகிறது.
சென்னை மாநகரம், கனமழை, நகர்ப்புற வெள்ளம் மற்றும் சூறாவளி போன்ற வானிலை நிகழ்வுகளால் அதிகம் பாதிக்கப்படக்கூடிய ஒரு பகுதியாகும். ஷிBand ரேடார் என்பது இப்பகுதியின் வானிலை கண்காணிப்பு வலையமைப்பில் ஒரு முக்கியமான அங்கமாகும். இது வானிலை அமைப்புகளின் நகர்வு மற்றும் தீவிரத்தன்மை குறித்த மிக முக்கியமான தகவல்களை வழங்குகிறது. செயற்கைக்கோள் கண்காணிப்புகள் மற்றும் எண்முறை வானிலை மாதிரிகள் (numerical weather models)பயனுள்ளவையாக இருந்தாலும், நம்பகமான, நிகழ்நேர ரேடார் கண்காணிப்பின் தேவையை அவை ஈடுசெய்ய முடியாது.
பொதுப் பாதுகாப்பிற்கான ஒரு முக்கியமான உள்கட்டமைப்பு வசதி, பல ஆண்டுகளாக விடுக்கப்பட்ட கோரிக்கைகள், நாடாளுமன்றத்தில் எழுப்பப்பட்ட கேள்விகள் மற்றும் பழுதுபார்ப்பு அல்லது மாற்றீடு குறித்த வாக்குறுதிகள் இருந்தபோதிலும், மீண்டும் மீண்டும் செயலிழந்து போவது என்பது ஏற்றுக்கொள்ள முடியாத ஒன்றாகும். ஒவ்வொரு பருவமழைக் காலத்திலும், வானிலை கண்காணிப்பு உள்கட்டமைப்பில் ஏற்படும் இத்தகைய தொடர்ச்சியான தடங்கல்களைச் சென்னை மக்கள் எதிர்கொள்ள வேண்டிய சூழல் இருக்கக்கூடாது.
எனவே, இந்த விவகாரத்தில் நீங்கள் உடனடியாக தலையிட்டு கீழ்க்கண்ட நடவடிக்கைகளை உறுதி செய்யக் கோருகிறேன் :
1. உடனடி சீரமைப்பு: புவி அறிவியல் அமைச்சகம் (Ministry of Earth Sciences) மற்றும் இந்திய வானிலை ஆய்வுத் துறை (IMD) ஆகியவற்றிற்கு உத்தரவிட்டு, தற்போதைய செயலிழப்பிற்கான துல்லியமான தொழில்நுட்பக் காரணத்தைக் கண்டறிந்து, எவ்விதத் தாமதமுமின்றி ரேடாரை மீண்டும் முழுமையாகச் செயல்பாட்டிற்குக் கொண்டு வர நடவடிக்கை எடுக்க வேண்டும்.
2. காலக்கெடுவுடன் கூடிய மாற்றீடு: புதிய S–Band டாப்ளர் வானிலை ரேடாரை நிறுவுவதற்கான காலக்கெடுவை நிர்ணயித்து, அதை பொதுவெளியில் அறிவிக்க வேண்டும். இதில் ரேடாரை வாங்கும் விவரம்,நிறுவுதல், சோதனை செய்தல் மற்றும் பயன்பாட்டிற்குக் கொண்டு வருதல் ஆகிய நிலைகள் குறித்த விவரங்கள் இடம்பெற வேண்டும்.
3. நம்பகமான இடைக்கால ஏற்பாடு: புதிய ரேடார் பயன்பாட்டிற்கு வரும் வரை, சென்னை மற்றும் அதனைச் சுற்றியுள்ள கடலோர மாவட்டங்களுக்குத் தேவையான மாற்று ரேடார் கண்காணிப்பு வசதியை உறுதி செய்ய வேண்டும். முக்கியமான வானிலை கண்காணிப்புகளில் எந்தவிதத் தடங்கலும் ஏற்படாதவாறு தெளிவான ஏற்பாடுகளைச் செய்ய வேண்டும்.
4. பொறுப்புக்கூறல் மற்றும் பராமரிப்பு: மீண்டும் மீண்டும் ஏற்படும் செயலிழப்புகள், பராமரிப்பு ஏற்பாடுகளின் தரம் மற்றும் எனது முந்தைய கோரிக்கைகள் மற்றும் நாடாளுமன்ற நடவடிக்கைகளுக்குப் பிறகு எடுக்கப்பட்ட நடவடிக்கைகள் குறித்து ஒரு தொழில்நுட்ப மறுஆய்வை மேற்கொள்ள வேண்டும்.
5. எழுத்துப்பூர்வ நிலை அறிக்கை: ரேடாரின் தற்போதைய செயல்பாட்டு நிலை, சமீபத்திய செயலிழப்பிற்கான காரணங்கள், மேற்கொள்ளப்பட்டு வரும் சீரமைப்பு நடவடிக்கைகள் மற்றும் தடையற்ற செயல்பாட்டை அடைவதற்கான காலக்கெடு குறித்த விரிவான அறிக்கையை, சம்பந்தப்பட்ட அமைச்சகம் வழங்க உத்தரவிட வேண்டும்.
இந்த விஷயத்தை நான் மீண்டும் மீண்டும் எழுப்புவதற்குக் காரணம், போதிய வானிலை கண்காணிப்பு இல்லாதது சென்னை மற்றும் அண்டை மாவட்ட மக்களின் பாதுகாப்பு மற்றும் வாழ்வாதாரத்திற்குப் பெரும் பாதிப்பை ஏற்படுத்தக்கூடும் என்பதால்தான். மீண்டும் மீண்டும் பழுதுபார்ப்பதும், அதன் பிறகு மீண்டும் செயலிழப்பதும் ஒரு நீண்டகாலத் தீர்வாக இருக்க முடியாது.
இந்த விவகாரத்தில் நீங்கள் உடனடியாக தலையிட்டு சம்பந்தப்பட்ட அமைச்சகம் ஒரு குறிப்பிட்ட காலக்கெடுவுக்குள் பதில் அளிக்கும் வகையில் நடவடிக்கை எடுக்க வேண்டும். சென்னையின் பேரிடர் தயார்நிலை என்பது, பழுதடைந்த உள்கட்டமைப்பை அவ்வப்போது அவசரகால அடிப்படையில் சரிசெய்வதை மட்டும் சார்ந்திருக்கக் கூடாது.
இவ்வாறு அவர் குறிப்பிட்டுள்ளார்.