வேலூர், அக். 28 –
தமிழகத்தில் சட்டம் – ஒழுங்கு கொஞ்சம் கூட கிடையாது என காட்பாடியில் கழகப் பொதுச் செயலாளர் – முன்னாள் அமைச்சர் துரைமுருகன் அவர்கள் கூறினார்.
வேலூர் மாவட்டம், காட்பாடி காந்தி நகரில் உள்ள தனது இல்லத்தில் தி.மு.க. பொதுச்செயலாளரும், முன்னாள் அமைச்சருமான துரைமுருகன் நேற்று முன்தினம் நிருபர்களுக்குப் பேட்டி அளித்தார்.
அப்போது அவர் கூறியதாவது:–
முன்னாள் அமைச்சர் அன்பில் மகேஸ் பொய்யாமொழியை கைது செய்தது கடும் கண்டனத்திற்குரியது.
பருவமழை தொடர்பாக த.வெ.க அரசு எவ்வளவு பாதுகாப்பு செய்திருந்தாலும் கட்டுக்கடங்காத மழை வந்தால் ஒன்றும் செய்ய முடியாது. ஆனால் அதனைக் கட்டுப்படுத்தும் அளவிற்கு நிர்வாகத்தை செய்ய வேண்டும். அதுதான் முறை. இந்த ஆட்சியில் அனைத்துமே மறைமுகமாக உள்ளது. எதுவுமே வெளிப்படைத் தன்மையோடு இல்லை. இது ஒரு மர்மமான அரசாங்கமாக உள்ளது.
சட்டம் ஒழுங்கு கொஞ்சம் கூட கிடையாது. காரணம் போலீசாரிடம் சரியான அணுகுமுறை உள்ளதா எனத் தெரியவில்லை. ஆளும் கட்சியினர் தான் அதிக போதைப்பொருள் வைத்திருப்பதாக பத்திரிகைகளில் பார்க்கிறோம். ஆளும் கட்சிக்கு கொஞ்சம், கொஞ்சமாக பயம் விட்டு போய்விட்டது. நாம் தான் ஆளும் கட்சி. நம்மை ஒன்றும் செய்ய முடியாது என்ற நிலைக்கு வந்து விட்டார் கள். அதனுடைய விளைவு, சட்டம் ஒழுங்கு கெட்டுப் போய்விட்டது அதைப் பற்றி இவர்கள் கவலைப்படவில்லை.
புதிய அரசு ஆட்சிக்கு வந்த பிறகு தான் சென்னையில் மழை வெள்ளம் விரைவாக வடிகிறது. அதற்கு நாங்கள் எடுத்த நடவடிக்கையே காரணம் என அமைச்சர்கள் கூறுகிறார் கள்.
இவர்கள் ஒரு மண்வெட்டி மண்ணைக் கூட எடுக்கவில்லை. இன்றைக்கு சென்னையில் ஓரளவுக்கு வெள்ளம் வடிந்துள்ளது என்றால் அது நாங்கள் செய்து விட்டுப் போன பணிகளால் தான். இவர்களை தைரியமாக சொல்லச் சொல்லுங்கள் இத்தனை கால்வாய்களைக் கட்டியுள்ளோம், இவ்வளவு தூரம் தூர்வாரி உள்ளோம் என.
அடிக்கடி டெண்டரை கேன்சல் செய்கிறார்கள். டெண்டர் வைத்த பணிகள் நடக்கிறதா இல்லையா என்பதைப் பார்த்து ஆய்வு செய்து முறையான நடவடிக்கை எடுக்க வேண்டும். அதை விட்டுவிட்டு உடனே டெண்டர் ரத்து என்பது இவர்கள் டெண்டர் விட்டு பணம் வாங்குவதற்கான நடவடிக்கையே ஆகும். இவர்களால் புதிதாக ஒரு வேலையைத் தேர்ந்தெடுக்க முடியவில்லை. அதில் டெண்டர் வைக்க முடியவில்லை.
தமிழ்நாட்டில் எஸ்.ஐ.ஆர். உள்நுழையக் காரணம் தி.மு.க. தான் என த.வெ.க., காங்கிரசும் குற்றம் சொல்கிறது. காங்கிரஸ் எல்லாம் ஒரு கட்சியே கிடையாது. பாவம் அது செத்துப் போன கட்சி. அதைப் பற்றி ஏன் பேசுகிறீர்கள்.
எஸ்.ஐ.ஆரை ஆரம்பத்தில் இருந்து எதிர்த்தது நாங்கள்தான். அன்றைக்கு எல்லாம் இவர்கள் எதிர்க்க வில்லை. ஒன்றும் இல்லை. காங்கிரஸ் எல்லாம் நமத்துப் போன சமாச்சாரம், அந்தக் கட்சியை பேசாமல் இருப்பதே நல்லது. இந்த ஜென்மத்தில் ஆட்சிக்கு வராது.
தமிழ்நாட்டில் அரிசிக்கு இப்படி ஒரு பஞ்சம் வந்ததை நான் கேள்விப்படவில்லை. மின்சாரம், அரிசி, சட்டம் ஒழுங்கு எதையாவது ஒன்றில் இவர்கள் உருப்படியாக எதையாவது செய்துள்ளார்களா? இவர்கள் விளங்காதவர்கள்.
தி.மு.க கூட்டணியில் இருந்து தற்போது த.வெ.க. கூட்டணியில் அங்கம் வகிக்கும் கட்சிகள் மீண்டும் தி.மு.க. கூட்டணிக்கு வர வாய்ப்புள்ளதா எனக் கேட்கிறீர்கள்
எந்தக் கட்சியில் எப்போது சேர்வார்கள் என்று சொல்லிவிட முடியாது. சீட்டு கொடுத்தால் போவார்கள். இல்லை என்றால் இங்கே வருவார்கள். தார்மீக ஆதரவு, கொள்கை, லட்சியம் என்பதெல்லாம் இப்பொழுது கிடையாது. சீட்டு தான் இப்போது லட்சியம். யார் எங்கு வருவார்கள் எனச் சொல்ல முடியாது.
இவ்வாறு அவர் கூறினார்.