கோவை, அக். 29 –
தமிழக பத்திர பதிவுத்துறையில் 578 சார் பதிவாளர் அலுவலகங்கள் உள்ளன. இதில் 5 லட்சம் பத்திர எழுத்தர்கள் பணிபுரிந்து வருகிறார்கள். கடந்த 1865-ம் ஆண்டு முதல் பத்திரப்பதிவு துறையில் எழுத்தர்கள் மூலம் பத்திரப்பதிவு எழுத்துப் பணிகள் நடைபெற்றன. தற்போதைய தவெக அரசு இதை தனியார் துறைக்கு மாற்றி வருகிறது. இ-டெண்டர் மூலம் தனியாருக்கு அழைப்பு அனுப்பப்படுகிறது. ஆன்லைன் மூலம் நடைபெறும் முறையில் ஆள் மாறாட்டம், போலி பத்திரம் பதிவு போன்ற பல தவறுகள் நடக்க வாய்ப்பு உள்ளன. மேலும் இதில் வாங்குபவர் மற்றும் கொடுப்பவர் பெயர்கள் மட்டுமே இடம் பெறுகின்றன. இதனால் முழு விவரமும் அதில் குறிப்பிடப் படுவதில்லை இதனால் பொதுமக்கள் பெரிதும் பாதிக்கப்படும் நிலை உள்ளது. மேலும், இதை தனியாருக்கு மாற்றுவதால் 5 லட்சம் பத்திர எழுத்தர்கள் குடும்பங்கள் பாதிக்கும் அபாயம் உள்ளது. எனவே இதில் பழைய நடைமுறையே தொடர தமிழக முதல்வர் விஜய், பத்திர பதிவுத்துறை அமைச்சர் தலையிட்டு நடவடிக்கை எடுக்க வேண்டும் என கோவை ரெட் பீல்ட் அருகே உள்ள பீளமேடு சார் பதிவாளர் அலுவலகம் முன்பு தமிழ்நாடு பத்திர எழுத்தர்கள் சங்கம் சார்பில் பீளமேடு கிளை தலைவர் பார்த்திபகுமார் தலைமையில் செயலாளர் இளங்கோவன், பொருளாளர் சிவராம கிருஷ்ணன் ஆகியோர் முன்னிலை யில் கோஷம் எழுப்பினர். அப்போது பெண் ஊழியர்கள் தரையில் அமர்ந்து கோஷம் எழுப்பினர். பத்திர எழுத்தர்கள் கருப்பு பேட்ஜ் அணிந்து ஆர்ப்பாட்டத்தில் ஈடுபட்டனர். இதில் நிர்வாகிகள் பழனிச்சாமி, விஜய சந்திரன், சரஸ்வதி, பாக்கியலட்சுமி, செல்வராஜா, ராமதாஸ், சீனிவாசன், விஜய பாஸ்கர், அர்ஜுன், அரவிந்த், பிரேம், முத்துக்குமார், சண்முகம், வித்யா, அகிலா உள்பட ஏராளமானோர் கலந்து கொண்டனர்.
சூலூர் சார்பதிவாளர் அலுவலகங்களில் 25க்கும் மேற்பட்ட அரசு பதிவு பெற்ற பத்திர எழுத்தர்கள் உள்ளனர். இவர்களை சார்ந்தோர் சுமார் 175 பேர் பணி புரிகின்றனர். தமிழக அரசு கொண்டுவரக்கூடிய ஆன்லைன் பத்திரப்பதிவு முறையால் பத்திரப்பதிவை நம்பி உள்ள தொழிலாளர்கள் வாழ்வாதாரம் பாதிக்கப்படும் என தமிழ்நாடு பத்திர நகல் எழுதுவோர் சங்கத்தினர் சூலூர் சார்பதிவாளர் அலுவலகம் முன்பு ஆர்ப்பாட்டத்தில் ஈடுபட்டனர். இந்த போராட்டத்தில் நூற்றுக்கும் மேற்பட்ட பத்திர நகல் எழுதுவோர் சங்கத்தினர் கலந்து கொண்டு கண்டனம் தெரிவித்தனர்.
அன்னூர்: கோவை மாவட்டம் அன்னூரில் அமைந்துள்ள சார்பதிவாளர் அலுவலகம் முன்பு பத்திரப்பதிவு துறை சார்பில் மாதிரி பத்திரப்பதிவு மையம் துவங்க இ-டெண்டர் முறை மூலம் தனியார் மயமாக்க எதிர்ப்பு தெரிவித்து தமிழ்நாடு பத்திரம் நகல் எழுதுவோர் சங்கம் சார்பில் கருப்பு பேட்ஜ் அணிந்து போராட்டத்தில் ஈடுபட்டனர்.
கோவை பெரியநாயக்கன் பாளையத்தில் சார்பதிவாளர் அலுவலகம் முன்பு பத்திரப்பதிவு துறை சார்பில் மாதிரி பத்திரப்பதிவு மையம் தொடங்க இ-டெண்டர் முறை மூலம் தனியார் மயமாக்குவதற்கு எதிர்ப்பு தெரிவித்து தமிழ்நாடு பத்திரம் நகல் எழுதுவோர் சங்கம் சார்பில் பெரியநாயக்கன்பாளையம் கிளை தலைவர் மோகன் பிரசாத் தலைமையில் கருப்பு பேட்ச் அணிந்து போராட்டத்தில் ஈடுபட்டனர். தமிழக அரசின் கவனத்தை ஈர்க்கும் வண்ணம் பெண்கள் உட்பட 50க்கும் மேற்பட்டவர்கள் கருப்பு பேட்ச் அணிந்து சுமார் 10 நிமிடங்கள் அமைதி போராட்டம் நடத்தினர்.