சென்னை, அக். 29 –
‘தினகரன்’ நாளேடு 28.10.2026 தேதிய இதழில் தலைகுனிவு எனும் தலைப்பில் வெளியிட்டுள்ள தலையங்கம் வருமாறு :–
தமிழக சிறைத்துறை வரலாற்றில் சுமார் 31 ஆண்டுகளுக்குப் பின் அதிர்ச்சி சம்பவம் தேனி மாவட்டம் தேக்கம்பட்டியில் அரங்கேறியுள்ளது. 1989ம் ஆண்டு ஆகஸ்ட் 21ம் தேதி சென்னை சிறையில் இருந்த பிரபல கொலைக்குற்றவாளியான ஆட்டோ சங்கர் தப்பி ஓடி, ஒடிசா மாநிலம் ரூர்கேலாவில் பிடிபட்டார் இது சிறை நிர்வாகம் குறித்த பல்வேறு கேள்விகளை எழுப்பியது. இதையடுத்து அமைக்கப்பட்ட நீதிபதி இஸ்மாயில் ஆணையம், சிறை நிர்வாகத்தில் இருந்த குறைபாடுகள் குறித்து ஆய்வு செய்தது. சென்னை மத்திய சிறையை நகருக்கு வெளியே மாற்ற வேண்டும் என்ற பரிந்துரை அப்போது முன்வைக்கப் பட்டது.
1991-ம் ஆண்டு நவம்பர் மாதம் வேலூர் மத்திய சிறையில் 6-வது பிளாக்கில் அடைக்கப்பட்டிருந்த 8 ஆயுள் தண்டனைக் கைதிகள் சிறை அறையின் மேற்கூரை ஓடுகளை அகற்றி, அருகிலிருந்த பொருட்களைக் கொண்டு ஏணி தயாரித்து தப்பினர். இதுதொடர்பான ஒரு வழக்கில் சிறைக் காவலர்களின் கடுமையான அலட்சியமே இந்தச் சம்பவத்திற்குக் காரணமாக அமைந்ததாக நீதிமன்றம் கண்டித்திருந்தது.
1995ம் ஆண்டு பிப்ரவரி 27-ஆம் தேதி சென்னை சென்ட்ரல் ரயில் நிலையத்திற்கு எதிரே இருந்த மத்திய சிறையில் தடா சட்டத்தின் கீழ் அடைக்கப்பட்டிருந்த விடுதலைப் புலிகள் ஆதரவாளர்கள் 9 பேர் போலீசாரை தாக்கி, சிறையின் சுவரைத் தாண்டித் தப்பினர்.
வேலூர் கோட்டையில் உள்ள திப்பு மஹால் வளாகத்தில் விடுதலைப் புலிகள் இயக்கத்துடன் தொடர்புடையவர்கள் எனச் சந்தேகிக்கப்பட்ட 43 பேர் தங்கவைக்கப்பட்டிருந்தனர். இவர்களில் பெரும்பாலானோர் உரிய பயண ஆவணங்கள் இல்லாமல் இந்தியாவுக்கு வந்ததாகத் தடுத்து வைக்கப்பட்டவர்கள். இது வழக்கமான சிறைச்சாலை அல்ல. வெளிநாட்டினர் சட்டத்தின் கீழ் அமைக்கப்பட்ட சிறப்புத் தடுப்பு முகாம். 1995ம் ஆண்டு ஆகஸ்ட் 14-ஆம் தேதி இந்த முகாமிலிருந்து 43 பேரும் தரைமட்டத்திலிருந்து சுமார் 10 அடி ஆழத்தில் 153 அடி நீளத்துக்குச் சுரங்கம் தோண்டி கோட்டையைச் சுற்றியிருந்த அகழியையும் கடந்து தப்பினர். இவர்களில் 11 பேர் மீண்டும் கைது செய்யப்பட்டனர். மற்றவர்கள் இலங்கைக்குத் தப்பிச் சென்றனர். இந்த விவகாரம் நாடாளுமன்றம் வரை எதிரொலித்தது.
கடந்த 20, 21 தேதிகளில் சென்னை புழல் மத்திய சிறையிலிருந்து அடுத்தடுத்து 2 கைதிகள் தப்பிய சம்பவம் பெரும் பரபரப்பை ஏற்படுத்தியது. தற்போது தேனி மாவட்டம் தேக்கம்பட்டி சிறையிலிருந்து 17 கைதிகள் தப்பியுள்ளனர். முந்தைய சம்பவங்களில் சுரங்கம் தோண்டுவது, மேற்கூரையை உடைப்பது, காவலர்களைக் கட்டிப்போடுவது போன்ற முறைகள் பயன்படுத்தப்பட்டன. ஆனால் தேனியில் சினிமா பாணியில் கைதி ஒருவருக்கு வலிப்பு ஏற்பட்டதாக நாடகமாடி, சிறைக் காவலரைத் தாக்கிவிட்டுத் தப்பியுள்ளனர். சிறையிலிருந்து கைதிகள் தப்பி ஓடியதாகக் கூறப்படும் நேரத்திற்கும், இதுகுறித்து காவல்துறைக்கு தகவல் தெரிவிக்கப்பட்ட நேரத்திற்கும் அதிக இடைவெளி இருப்பது இந்த நிகழ்வு குறித்த பல ஐயங்களை ஏற்படுத்தியுள்ளது.
தமிழகத்தில் குற்றவாளி களைக் கண்காணிப்பதிலும் சிறைப் பாதுகாப்பை உறுதிப்படுத்துவதிலும் அரசு தோல்வியடைந்துள்ளதாகவும் மக்களே தங்களைப் பாதுகாத்துக்கொள்ள வேண்டிய நிலைக்குத் தமிழகம் சென்றுவிட்டதாகவும் முன்னாள் முதல்வர் மு.க. ஸ்டாலின் உள்ளிட்ட பல்வேறு அரசியல் தலைவர்களும் விமர்சித்துள்ளனர். ஸ்காட்லாந்து யார்டு போலீசாருக்கு இணையானவர்களாக புகழப்படும் தமிழக காவல்துறைக்கு இதுபோன்ற சம்பவங்கள் தொடர்வது பெரும் தலைகுனிவுதான்.
திருவள்ளூர் மேற்கு மாவட்ட திமுக சார்பில் திருத்தணி சட்ட மன்ற தொகுதிக்குட்பட்ட ஒன்றியங்களில் கழக மறு சீரமைப்பு பணிகள் மேற்கொள்வது குறித்து ஆய்வு கூட்டம் மாவட்ட கழகச் செயலாளர் திருத்தணி எஸ்.சந்திரன் தலைமையில் திருத்தணியில் நடைபெற்றது இதில். தலைமை கழக பிரதிநிதிகள் அன்னியூர் சிவா, ப.அப்துல் மாலிக் ஆகியோர் பங்கேற்று ஒன்றியங்களில் கழக அமைப்புகளை வலுப்படுத்துதல், கிளைக் கழகங்களின் செயல்பாடுகளை மேம்படுத்துதல், நிர்வாகிகளின் பணிகளை ஆய்வு செய்தல் உள்ளிட்ட மறுசீரமைப்புப் பணிகள் குறித்து ஒன்றியக் கழக நிர்வாகிகளுடன் தலைமைக்கழகப் பிரதிநிதிகள் ஆலோசனை மேற்கொண்டனர். உடன் தலைமை செயற்குழு உறுப்பினர் திருத்தணி எம்.பூபதி உள்பட திமுக நிர்வாகிகள் உள்ளனர்.