#Title

பேராசிரியர் கலையரசன் கைது! கருத்துச் சுதந்திரத்தின் குரல்வளையை நெரிக்க முயலுவதா? மனித நேயமக்கள் கட்சியின் தலைவர் பேராசிரியர் எம்.எம். ஜவாஹிருல்லா எம்.எல்.ஏ. கண்டனம்!

சென்னை, அக்.30–

பேராசிரியர் கலையரசன் கைதின் மூலம் கருத்துச் சுதந்திரத்தின் குரல் வளையை நெரிக்க முயலும் நடவடிக்கைக்கு கடும் கண்டனம் தெரிவித்து

மனிதநேய மக்கள் கட்சியின் தலைவரும் சட்டமன்ற உறுப்பினருமான பேராசிரியர் எம். எச். ஜவாஹிருல்லா அறிக்கை விடுத்துள்ளார்.

அவரது அறிக்கை வருமாறு:

புகழ்பெற்ற சென்னை வளர்ச்சி ஆராய்ச்சி நிறுவனத்தின் (MIDS) பேராசிரியரான முனைவர் கலையரசன் அவர்கள், காவல்துறை யினரால் அதிகாலையில் கைது செய்யப்பட்டதாக வெளியாகியுள்ள செய்தி பெரும் அதிர்ச்சியளிக்கிறது. சீருடை அணியாத காவலர்கள் அவரைக் கைது செய்து வாடகை வாகனத்தில் அழைத்துச் சென்றது கடும் கண்டனத்திற்குரியது.

பேராசிரியர் கலையரசன் சாதாரணமான கல்வியாளர் அல்ல. ஜவஹர்லால் நேரு பல்கலைக்கழகத்தில் பொருளாதாரத்தில் முனைவர் பட்டம் பெற்றவர். கேம்பிரிட்ஜ் பல்கலைக்கழகப் பதிப்பகத்தால் வெளியிடப்பட்ட The Dravidian Model நூலின் ஆசிரியர்களில் ஒருவர். ஒன்றிய அரசின் திட்டக்குழுவில் பணியாற்றியதோடு, தமிழ்நாடு அரசின் பொருளாதார ஆய்வறிக்கை தயாரிப்பிலும் பங்களித்தவர். தமிழ்நாடு முதலமைச்சர் தலைமையிலான மாநில காலநிலை மாற்ற நிர்வாகக் குழுவிலும் உறுப்பினராக உள்ளவர்.

அரசின் பொருளாதாரக் கொள்கைகளையும் விலைவாசி உயர்வையும் விமர்சிப்பது குற்றமல்ல; அது ஜனநாயகத்தின் அடிப்படை உரிமை!

திராவிட மாடல் ஆட்சியின் பொருளாதாரச் சாதனைகள் குறித்து ஆய்வு செய்தவரும், அரசின் கொள்கைகள் குறித்து கருத்துத் தெரிவிக்கும் உரிமை கொண்டவருமான ஓர் அறிஞர், தனது விமர்சனக் கருத்துகளுக்காகக் குறிவைக்கப் பட்டிருப்பது கருத்துச் சுதந்திரத்தின் மீதான நேரடித் தாக்குதலாகும். ஆட்சியாளர்களுக்குப் பிடிக்காத கருத்துகளை முன்வைப்ப வர்களை அச்சுறுத்துவதன் மூலம் விமர்சனங்களை ஒடுக்கிவிடலாம் என்று எந்த அரசும் நினைக்கக் கூடாது.

முந்தைய ஆட்சிக் காலங்களிலும் சுதந்திரமாகக் கருத்துகளை முன்வைத்ததாக அறியப்படும் பேராசிரியர் கலையரசன் போன்ற கல்வியாளர்களின் கருத்துகளை எதிர்கொள்வதற்குப் பதிலாக, அவர்களைக் கைது செய்து அச்சுறுத்தும் போக்கு ஜனநாயகத்திற்கு உகந்ததல்ல. அரசின் செயல்பாடுகளை விமர்சிக்கும் உரிமை கல்வியாளர்களுக்கும் பத்திரிகையாளர்களுக்கும் மட்டுமல்ல; ஒவ்வொரு குடிமகனுக்கும் உண்டு.

காவல்துறை என்பது ஆட்சியாளர்களின் அரசியல் விருப்பங்களை நிறைவேற்றும் கருவி அல்ல; சட்டத்தையும் குடிமக்களின் உரிமைகளையும் பாதுகாக்கும் அமைப்பு. கைது நடவடிக்கையில் சட்ட நடைமுறைகள் மீறப்பட்டிருந்தால், அதற்குப் பொறுப்பானவர்கள் மீது உரிய நடவடிக்கை எடுக்கப்பட வேண்டும்.

ஜனநாயகத்தில் அரசை விமர்சிப்பது குற்றமல்ல; விமர்சனத்தை ஒடுக்க அதிகாரத்தைப் பயன்படுத்துவதுதான் ஜனநாயகத்தின் மாண்பைக் கேள்விக்குள்ளாக்கியுள்ளது.

இவ்வாறு அவர் தனது அறிக்கையில் குறிப்பிட்டுள்ளார்.