சென்னை, அக். 30–
தி.மு.க. மாற்றுத் திறனாளிகள் அணியின் செயலாளர் பேராசிரியர் டி.எம்.என்.தீபக் விடுத்துள்ள அறிக்கை வருமாறு:–
ஒருவழியாக, மாற்றுத்திறனாளிகள் சாலைக்கு வந்து போராடி, தங்களது உரிமைக்காகக் குரல் எழுப்பி, கண்டனங்களைத் தெரிவித்து, பல்வேறு இன்னல்களையும் வேதனைகளையும் தாங்கிப் போராடியதன் விளைவாக, மாற்றுத்திறனாளிகளுக்கான கட்டணமில்லாப் பேருந்துப் பயணச் சலுகையை எல்.எஸ்.எஸ்., எக்ஸ்பிரஸ் உள்ளிட்ட பேருந்துகளுக்கும் விரிவுபடுத்தி அரசு ஆணை பிறப்பித்துள்ளது.
இது திராவிட முன்னேற்றக் கழகத்தின் மாற்றுத்திறனாளிகள் அணிக்குக் கிடைத்த மிகப்பெரிய வெற்றியாகும்.
இத்திட்டம் அறிவிக்கப்பட்ட நாள் முதல், அது முறைப்படி நடைமுறைக்கு வந்த காலகட்டம் வரையிலும், மாற்றுத்திறனாளிகளுக்கான பேருந்துப் பயணச் சலுகையை விரிவுபடுத்த வேண்டும் என்ற கோரிக்கையைத் தொடர்ந்து வலியுறுத்தி வந்தோம்.
இந்தக் கோரிக்கையை மக்கள் மத்தியில் கொண்டு செல்வதற்காக முரசொலி நாளிதழில் கட்டுரைகளை வெளியிட்டோம். பத்திரிகைச் செய்திகள், நேர்காணல்கள் மற்றும் பல்வேறு அரசியல் நடவடிக்கைகள் வாயிலாக மாற்றுத்திறனாளிகளின் நியாயமான கோரிக்கையைத் தொடர்ந்து முன்னெடுத்தோம்.
தொடர்ச்சியான இந்த முயற்சி களுக்குப் பிறகே தற்போது இந்த அரசாணை வெளியாகியுள்ளது. மாற்றுத்திறனாளிகளின் உரிமைக்காகத் தொடர்ந்து குரல் கொடுத்து, அவர்களின் கோரிக்கையை அரசியல் தளத்தில் முன்னெடுத்துச் சென்ற திமுக மாற்றுத்திறனாளிகள் அணியின் செயல்பாட்டிற்குக் கிடைத்த வெற்றியாகவே இதைக் கருதுகிறோம்.
மாற்றுத்திறனாளிகளின் போக்குவரத்து உரிமை என்பது வெறும் கட்டணச் சலுகை தொடர்பான கோரிக்கை மட்டுமல்ல. அது அவர்களின் கல்வி, வேலைவாய்ப்பு, மருத்துவம், சமூகப் பங்கேற்பு மற்றும் சுதந்திரமான வாழ்க்கை ஆகியவற்றுடன் தொடர்புடைய முக்கியமான உரிமையாகும்.
இந்தக் கோரிக்கையைத் தொடர்ந்து முன்னெடுத்துச் செல்வதிலும், மாற்றுத்திறனாளிகளின் குரலை உரிய அரசியல் தளங்களில் ஒலிக்கச் செய்வதிலும் திமுக மாற்றுத்திறனாளிகள் அணி உறுதியுடன் செயல்பட்டு வருகிறது.
இந்த வெற்றியைத் திராவிட முன்னேற்றக் கழகத்தின் தலைவரான ஐயா மு.க. ஸ்டாலின் அவர்களுக்குச் சமர்ப்பிப்பதில் பெருமை கொள்கிறோம்.
திமுக மாற்றுத்திறனாளிகள் அணியின்செயலாளர் என்ற முறையில், இந்தவெற்றியை எங்களது கழகத் தலைவர் ஐயா மு.க. ஸ்டாலின்அவர்களின் பொற்பாதங்களில் பெருமையுடனும் நன்றியுடனும் சமர்ப்பிக்கிறேன்.
மாற்றுத்திறனாளிகளின் உரிமைகளுக்காக எங்களது குரல் தொடர்ந்து ஒலிக்கும். அவர்களின் நியாயமான கோரிக்கைகள்
நிறைவேறுவதற்கான எங்களது அரசியல் பயணமும் உரிமைப் போராட்டமும் தொடர்ந்து நடைபெறும்.
இவ்வாறு அவர் தெரிவித் துள்ளார்.