சென்னை, அக். 30 –
‘‘முதல்வர் விஜய், மக்கள் மீது கருணை காட்டி, காவல்துறையை நிர்வகிக்கத் தெரிந்த ஒருவரிடம் அதன் பொறுப்பை ஒப்படைக்க வேண்டும்!’’ என, வலைதளப் பதிவொன்றில், கழகத் துணைப் பொதுச் செயலாளர் கனிமொழி ராஜாத்தி கருணாநிதி அவர்கள் வலியுறுத்தியுள்ளார்.
தூத்துக்குடி மாவட்டம் குலசேகரப்பட்டினத்தை அடுத்த வில்லி குடியிருப்பு பகுதியை சேர்ந்த வேல்முருகன் என்பவர், அக்டோபர் 22ம் தேதி கல்லால் அடித்துக் கொலை செய்யப்பட்டார். அக்டோபர் 23ம் தேதி சாத்தான்குளம் அருகே உள்ள முதலூர் கிராமத்தில் மேரி ரெஜிலா என்பவர் வீடு புகுந்து வெட்டிப் படுகொலை செய்யப்பட்டார். அதே நாளில், தூத்துக்குடி திரேஸ்புரம் அருகே மீனவர் பழனி என்பவரை செந்தில் என்ற மீனவர் மது குடிக்கும் போது ஏற்பட்ட தகராறில் கத்தியால் குத்தி கொலை செய்தார்.
அக்டோபர் 24ஆம் தேதி சாத்தான்குளம் அருகே உள்ள பண்ணம்பாறை கிராமத்தில் இடப்பிரச்சனையில் ஏற்பட்ட தகராறில் கொம்பையா என்ற விவசாயியை அதே பகுதியைச் சேர்ந்த ஆறுமுகம் என்ற விவசாயி கல்லால் அடித்து படுகொலை செய்தார். அக்டோபர் 25ஆம் தேதி, ஏரல் பகுதியைச் சேர்ந்த தனுஷ்கோடி என்ற லாரி ஓட்டுனர், தனது மகளை கேலி செய்தவர்களை தட்டிக்கேட்கச் சென்ற போது அரிவாள் உள்ளிட்ட ஆயுதங்களால் தாக்கப்பட்டு உயிரிழந்தார்.
அக்டோபர் 26ஆம் தேதி திருவைகுண்டம் அருகே உள்ள ஆழ்வார் கற்குளம் கிராமத்தில் இடப்பிரச்சினையில் கல்லூரி மாணவர் இசக்கி ராஜா வெட்டிக் கொல்லப்பட்டார்.
அக்டோபர் 27ஆம் தேதி கோவில்பட்டியில் கூலித் தொழிலாளிகளான காளிராஜ் மற்றும் சின்னத்துரை ஆகியோரிடையே ஏற்பட்ட தகராறில், சின்னத்துரை கோடாரியால் தாக்கியதில் காளிராஜ் காலமானார்.
அக்டோபர் 28ஆம் தேதி தூத்துக்குடி கந்தன் காலனி பகுதியில் தனியாக இருந்த சசிகலா என்ற பெண்ணை அவரின் உறவினர் ஒருவர் நகைக்காக படுகொலை செய்தார். தற்போது, சாத்தான்குளத்தை முதலூரில், வீடு புகுந்து தாக்குதல் நடத்திய சம்பவத்தில், மருத்துவமனையில் சிகிச்சை பெற்று வந்த முத்துகிருஷ்ணனும் உயிரிழந்தார்.
தூத்துக்குடி மாவட்டத்தில் ஒரு வாரத்தில் 9 பேர் படுகொலை
செய்யப்பட்ட சம்பவம் பொதுமக்கள் மத்தியில் பெரும் அச்சத்தை
ஏற்படுத்தி உள்ளது.
இவ்வாறு தூத்துக்குடி மாவட்டத்தில் தொடர் கொலைகள் இந்த
த.வெ.க. ஆட்சியில் அன்றாட நிகழ்வுகளானது கண்டு கொதித்து கழகத் துணைப் பொதுச் செயலாளர்
கனிமொழி ராஜாத்தி கருணாநிதி எம்.பி. அவர்கள் விடுத்த வலை தளப் பதிவு வருமாறு :–
நேற்றைய தினம் தூத்துக்குடி
கந்தன் காலனியில், வீட்டில் தனியாக இருந்த சசிகலா என்ற பெண்
வெட்டிக் கொலை செய்யப்பட்டுள்ளார்.
நான்கு நாட்களில் ஏழு கொலைகள் எனத் தூத்துக்குடி மாவட்டத்தில் சட்டம் ஒழுங்கு சீர்குலைந்து, மக்கள் அச்சத்தில் உறைந்துள்ளனர்.
‘முத்துநகரம்’ என்று அழைக்கப்படும் தூத்துக்குடியை, ‘கொலை நகரம்’ என்று அழைக்கும் நிலைக்குக் கொண்டு செல்கிறது த.வெ.க. அரசு. மீண்டும் சொல்கிறேன்… முதலமைச்சர் விஜய் அவர்கள் மக்கள் மீது கருணை காட்டி, காவல்துறையை நிர்வகிக்கத் தெரிந்த ஒருவரிடம் அதன் பொறுப்பை ஒப்படைக்க வேண்டும்!
இவ்வாறு அப்பதிவில் கனிமொழி ராஜாத்தி கருணாநிதி அவர்கள் குறிப்பிட்டுள்ளார்.