#Title

தலைநகர் கொலைநகராக மாறிக் கொண்டிருக்கிறது! பெண்கள், குழந்தைகள் முதல் 80 வயது முதியோர் வரை பாதுகாப்பற்ற நிலை! உருட்டல், மிரட்டல்களுக்கு அஞ்சும் இயக்கம் தி.மு.க. அல்ல! எத்தனை வழக்குகள் போட்டாலும் சட்டரீதியாக எதிர்கொள்ளத் தயார்! ‘திராவிட மாடல்’ ஆட்சியில் ஒளிவெள்ளத்தில் இருந்த திருக்கோயில்கள் - இன்று இருளில் மூழ்கியுள்ளன! மகளிர் கண்டன ஆர்ப்பாட்டத்திற்குப் பிறகு – முன்னாள் அமைச்சர் பி.கே.சேகர்பாபு எம்.எல்.ஏ. பேட்டி! அந்துமணி சிந்துமணி

சென்னை, நவ.1–

தமிழகத்தில் பெண்கள் மற்றும் குழந்தைகளுக்கு எதிரான பாலியல் வன்கொடுமைகள், சட்டம்–ஒழுங்கு சீர்கேடு, போதைப் பொருள் புழக்கம், கடுமையான விலைவாசி உயர்வு மற்றும் அத்தியாவசியப் பொருட்கள் தட்டுப்பாடு ஆகியவற்றைக் கண்டித்து, திராவிட முன்னேற்றக் கழகத்தின் சார்பில் நேற்று (31.10.2026) தமிழ்நாடு முழுவதும் மாபெரும் மகளிர் கண்டன ஆர்ப்பாட்டங்கள் நடைபெற்றன.

சென்னை மாவட்ட ஆட்சியர் அலுவலகம் அருகே நடைபெற்ற கண்டன ஆர்ப்பாட்டத்தில் கலந்துகொண்ட சென்னை கிழக்கு மாவட்டக் கழகச் செயலாளரும், மேனாள் அமைச்சருமான பி.கே. சேகர்பாபு எம்.எல்.ஏ. அவர்கள் செய்தியாளர்களிடம் கூறியதாவது:

பெண்கள், குழந்தைகளுக்குப் பாதுகாப்பு எங்கே?

தமிழகத்தில் இன்று அக்கா, அத்தை, தங்கை என்று சொந்த உறவுகளுக்குள்ளேயே நம்பிக்கையும் பாதுகாப்பும் கேள்விக்குறியாகும் நிலை உருவாகியுள்ளது.

இரண்டரை வயது பிஞ்சுக் குழந்தைகள் கூட பாலியல் வன்கொடுமைகளுக்கு ஆளாகும் கொடுமைகள் குறித்து செய்திகள் வருகின்றன. எண்பது வயது முதியோர்கள்கூட பாலியல் வன்முறைக்கு ஆளாகும் அவலநிலை ஏற்பட்டுள்ளது.

தமிழகத்தின் தலைநகரான சென்னை, இன்று கொலைநகராக மாறிக்கொண்டிருக்கிறது. இத்தகைய சம்பவங்களைத் தடுக்கவும், பெண்களுக்கும் குழந்தைகளுக்கும் உரிய பாதுகாப்பை உறுதிசெய்யவும் இந்த அரசு தவறிவிட்டது.

38 இடங்களில் காட்டாற்று வெள்ளமெனத் திரண்ட மகளிர்!

இத்தகைய அவலங்களைக் கண்டித்துத்தான் எங்கள் உயிரினும் மேலான திராவிட முன்னேற்றக் கழகத் தலைவர் மு.க. ஸ்டாலின் அவர்களின் அறிவிப்பிற்கிணங்க, தமிழ்நாடு முழுவதும் இலட்சக்கணக்கான மகளிர் நேற்று கண்டன ஆர்ப்பாட்டங்களில் பங்கேற்றுள்ளனர்.

எங்கள் மாவட்டத்தில் மட்டும் இந்த கண்டன ஆர்ப்பாட்டத்தில் ஐயாயிரத்துக்கும் மேற்பட்ட மகளிர் திரண்டுள்ளனர்.

இதேபோன்று 38 இடங்களிலும் காட்டாற்று வெள்ளமென மகளிர் திரண்டு, இந்த ஆட்சிக்கு எதிராக வீதிக்கு வந்துள்ளனர். இது சாதாரண ஆர்ப்பாட்டம் அல்ல; மக்களின் வேதனைகளையும் மகளிரின் கோபத்தையும் வெளிப்படுத்துகின்ற மாபெரும் போராட்டம்.

மளிகைக் கடைகளுக்கும் மார்க்கெட்டுகளுக்கும் முதலமைச்சர் செல்லட்டும்!

தமிழகத்தில் கடுமையான விலைவாசி உயர்வு நிலவுகிறது. அத்தியாவசியப் பொருட்களுக்குத் தட்டுப்பாடு ஏற்பட்டுள்ளது. அன்றாட வாழ்க்கையை நடத்துவதற்கே ஏழை, எளிய மற்றும் நடுத்தர மக்கள் பெரும் சிரமத்திற்கு ஆளாகியுள்ளனர்.

முதலமைச்சருக்கு ஒரு வேண்டுகோள்!

பாலங்களைச் சென்று பார்வையிடுகிறீர்கள். மின்வாரியத் தலைமையகத்திற்குச் சென்று பார்வையிடுகிறீர்கள். ஆவின் பாலகங்களுக்குச் சென்று பார்வையிடுகிறீர்கள். சென்னை மத்திய சிறைச்சாலைக்கும் சென்று பார்வையிடுகிறீர்கள்.

அதேபோன்று ஒருநாள் மளிகைக் கடைகளுக்கும், காய்கறி மார்க்கெட்டுகளுக்கும் சென்று பார்வையிடுங்கள்.

அங்கே பொருட்களை வாங்க வருகின்ற ஏழைத் தாய்மார்களின் குமுறல்களையும், குடும்பம் நடத்த முடியாமல் தவிக்கின்ற மக்களின் வேதனைகளையும் நேரில் கேளுங்கள்.

அப்போதுதான் விலைவாசி உயர்வால் மக்கள் எவ்வளவு துன்பப்படுகிறார்கள் என்பது உங்களுக்குப் புரியும்.

விலைவாசியைக் கட்டுப்படுத்த வேண்டும். பாலியல் வன்கொடுமைகளுக்கு ஆளாகும் பெண்களுக்கு நீதி கிடைக்க வேண்டும். இனிமேலும் இதுபோன்ற கொடுமைகள் நடைபெறாமல் தடுக்க வேண்டும். சட்டம்–ஒழுங்கு பாதுகாக்கப்பட வேண்டும்.

இவற்றை வலியுறுத்தித்தான், மக்களின் குரலுக்குச் செவிசாய்க்காத இந்த ஆட்சியாளர்களின் காதுகளில் கேட்கும் வகையில் நேற்று மாபெரும் கண்டன ஆர்ப்பாட்டத்தை நடத்தியிருக்கிறோம்.

திராவிட முன்னேற்றக் கழகத்தை வழக்குகள் போட்டோ, கைது நடவடிக்கைகள் மூலமாகவோ, உருட்டல் மிரட்டல்கள் மூலமாகவோ பணியவைக்க முடியாது.

இந்த இயக்கம் எத்தனையோ அடக்குமுறைகளைச் சந்தித்த இயக்கம். எத்தனையோ சிறைச்சாலைகளையும், வழக்குகளையும் எதிர்கொண்டு வளர்ந்த இயக்கம்.

எத்தனை வழக்குகள் வேண்டுமானாலும் போட்டுக்கொள்ளட்டும். அவற்றைச் சட்டரீதியாக எதிர்கொள்வதற்கு நாங்கள் தயாராக இருக்கிறோம்.

திராவிட மாடல் ஆட்சியில் ஒளிவெள்ளம்! இன்று திருக்கோயில்களிலும் மின்வெட்டு!

எங்களைப் பற்றி விமர்சனம் செய்கின்ற நிர்மல் குமார், முதலில் தமது துறையின் அவலங்களை எண்ணிப் பார்க்க வேண்டும்.

நேற்று மதுரை மீனாட்சி யம்மன் திருக்கோயிலுக்கு மேனாள் முதலமைச்சர் எடப்பாடி பழனிசாமி அவர்கள் வந்தபோது மின்வெட்டு ஏற்பட்டதாகத் தெரிவிக்கப்படுகிறது.

அதேபோன்று இந்திய நாட்டின் துணைக் குடியரசுத் தலைவர் ராதாகிருஷ்ணன் அவர்கள் வருகையின்போதும் மின்வெட்டு ஏற்பட்டதாகச் செய்திகள் வருகின்றன.

எங்கள் உயிரினும் மேலான அன்புத் தலைவர் மு.க. ஸ்டாலின் அவர்களின் திராவிட மாடல் ஆட்சியில் திருக்கோயில் கள் அனைத்தும் ஒளிவெள்ளத்தில் திகழ்ந்தன.

ஆனால், இன்றைக்கு திருக்கோயில்கள்கூட இருளில் மூழ்குகின்ற நிலை ஏற்பட்டுள்ளது. இந்த நிர்வாகச் சீர்கேட்டிற்குப் பொறுப்பேற்க வேண்டியவர்கள் எங்களைப் பற்றிக் குற்றம் சுமத்துவதற்கு என்ன தகுதி இருக்கிறது?

நிர்மல் குமார் மீது வழக்கறிஞர் நியமனங்கள், அதிக விலைக்குப் பொருட்கள் கொள்முதல் செய்தல் உள்ளிட்ட பல்வேறு குற்றச்சாட்டுகள் எழுந்துள்ளன. அவற்றுக்கெல்லாம் முதலில் அவர் விளக்கம் அளிக்க வேண்டும்.

தமது துறையின் குறைபாடுகளைச் சரிசெய்ய முடியாத வர்கள், திராவிட முன்னேற்றக் கழகத்தை விமர்சிப்பதற்கு எந்த அருகதையும் இல்லை.

மக்களின் உரிமைக்காகத் தொடர்ந்து போராடுவோம்!

பெண்களின் பாதுகாப்பு, குழந்தைகளின் எதிர்காலம், ஏழை எளிய மக்களின் வாழ்வாதாரம், விலைவாசி உயர்வு, சட்டம்–ஒழுங்கு ஆகியவற்றில் இந்த அரசு உரிய நடவடிக்கைகளை மேற்கொள்ள வேண்டும்.

இல்லையென்றால் மக்களின் பிரச்சினைகளை முன்னிறுத்தி திராவிட முன்னேற்றக் கழகம் தொடர்ந்து போராட்டங்களை முன்னெடுக்கும்.

எந்த அடக்குமுறைக்கும் அஞ்சாமல், மக்களுக்காகக் குரல் கொடுக்கின்ற இயக்கமாகத் திராவிட முன்னேற்றக் கழகம் தொடர்ந்து செயல்படும்.

இவ்வாறு முன்னாள் அமைச்சர் பி.கே.சேகர்பாபு எம்.எல்.ஏ. செய்தியாளர்களிடம் தெரிவித்தார்.