கோவை, நவ. 1 –
கோயம்புத்தூர் மாவட்டம் அன்னூர் காவல் நிலையத்தில் திருட்டு உள்ளிட்ட வழக்கில் கைது செய்யப்பட்டவர் ராகவன். இவரை போலீசார் நீதிமன்றத்தில் ஆஜர்படுத்திவிட்டு கோவை சிறையில் அடைக்க அழைத்து வரப்பட்டபோது சிறை வளாகத்தில் இருந்து தப்பி ஓடியுள்ளார். கோவை மத்திய சிறையின் முதல் நுழைவு வாயிலில் இருந்து 2-வது நுழைவு வாயிலுக்கு அழைத்துவந்தபோது, அவரது கையில் போடப்பட்டிருந்த விலங்கினை போலீசார் அகற்றினர். அந்த நேரத்தில் திடீரென ராகவன் அங்கிருந்து தப்பிச்சென்றார். தப்பியோடிய கைதி ராகவனை விரைவாக பிடிக்கும் முயற்சியில் ரேஸ்கோர்ஸ் போலீசார் ஈடுபட்டு வருகின்றனர். இந்த சம்பவம் கோவையில் பரபரப்பை ஏற்படுத்தி உள்ளது.
தேனி மாவட்டம் தேக்கம்பட்டியில் உள்ள மாவட்ட சிறையில் கடந்த
26-ந்தேதி சிறைக் காவலர்களை
தாக்கிவிட்டு 17 கைதிகள் தப்பி ஓடினர். போலீசாரின் நீண்ட தேடுதல் வேட்டைக்கு பிறகு அவர்கள் அனைவரும் பிடிபட்டனர். இந்த சம்பவம் தமிழகம் முழுவதும் பெரும் பரபரப்பை ஏற்படுத்தியது.கைதிகள் தப்பி ஓடிய சம்பவம் எதிரொலியாக சிறைக் காவலர்கள் 9 பேர் அதிரடியாக பணியிடை நீக்கம் செய்யப்பட்டனர். அதன் தொடர்ச்சி யாக சிறைத்துறை டி.ஜி.பி. சந்தீப்ராய் ரத்தோர் மாற்றப்பட்டார்.
அன்னூர் காவல் நிலையக் காவலர்களால் நேற்று முன்தினம் கைது செய்யப்பட்ட இராகவன் அப்போதே காவலர்களின் பிடியில் இருந்து தப்பி ஓடியுள்ளார். அவரை காவல்துறை யினர் துரத்திப் பிடித்து தான் நீதி மன்றத்தில் நேர் நிறுத்தியுள்ளனர். இதைக்
கவனத்தில் கொண்டு கோவை சிறை வளாகத்தில் கைதி இராகவனை
பாதுகாப்புடன் கையாண்டிருக்க வேண்டும். சிறைக்காவலர்கள் அலட்சியமாக நடந்து கொண்டதே இதற்கு
காரணம் ஆகும்.