சென்னை, நவ.1–

ஜப்பானில் நடைபெற்ற 5–வது ஆசிய பாரா விளையாட்டுப் போட்டிகளில், 15 பதக்கங்களை வென்று சாதனை படைத்த தமிழ்நாட்டு வீரர் – வீராங்கனைகள் – கழக இளைஞர் அணிச் செயலாளரும், தமிழ்நாடு சட்டமன்ற எதிர்க்கட்சித் தலை வருமான உதயநிதி ஸ்டாலின் அவர்களை நேரில் சந்தித்து வாழ்த்துப் பெற்றனர்.

5–வது ஆசிய பாரா விளையாட்டுப் போட்டிகளில், தமிழ்நாட்டைச் சேர்ந்த பாரா தடகள வீரர்–வீராங்கனைகள் தம் சிறப்பான ஆட்டத்தை வெளிப்படுத்தி, 3 தங்கம், 5 வெள்ளி, 7 வெண்கலம் என மொத்தம் 15 பதக்கங்களை வென்று, தமிழ்நாட்டிற்குப் பெருமை சேர்த்துள்ளனர்.

இந்த சாதனையைத் தொடர்ந்து, தமிழ்நாடு பாராலிம்பிக் விளையாட்டு சங்கத்தின் (TNPSA) நிர்வாகிகள் மற்றும் பதக்கம் வென்ற வீரர்– வீராங்கனைகளான கஸ்தூரி ராஜாமணி, தர்மராஜ் சோலைராஜ், பேபி சஹானா ரவி, ஜே.டி.மதன், மனிஷா ராமதாஸ், நித்யஸ்ரீ சுமதி சிவன், துளசிமதி முருகேசன், சிவராஜன் சோலைமலை, நவீன் சிவகுமார், ருத்திக் ரகுபதி, சுதர்சன் முத்துசாமி, சரவணகுமார், சந்தியா விஸ்வ நாதன் மற்றும் ஹரீஸ் மைதிலி ஸ்ரீகுமார் ஆகியோர், கழக இளைஞர் அணிச் செய லாளரும் தமிழ்நாடு சட்டமன்ற எதிர்க்கட்சித் தலைவருமான உதயநிதி ஸ்டாலின் அவர்களை நேரில் சந்தித்து, தங்களது வெற்றிப் பயண அனுபவங்களைப் பகிர்ந்து கொண்டனர்.

அப்போது, வீரர்–வீராங்கனைகளின் சாதனைகளைப் பாராட்டிய உதயநிதி ஸ்டாலின் அவர்கள், பதக்கம் வென்றவர்களுக்குத் தனது வாழ்த்துகளையும் பாராட்டுகளையும் தெரிவித்ததுடன், அடுத்து வரும் போட்டிகளிலும் பல்வேறு சாதனைகளைப் படைக்க ஊக்கமளித்தார்.

இந்த சந்திப்பில், தமிழ்நாடு பாராலிம்பிக் விளையாட்டு சங்கத்தின் பொதுச்செயலாளர் கிருபாகர ராஜா மற்றும் இணைச் செய லாளர் இ.செந்தில்குமார் ஆகியோரும் கலந்து கொண்டனர்.