சென்னை, நவ.3–
“அரசுக்கு எதிராகப் பேசினாலே வழக்குப் பதிவு செய்து மிரட்டும் போக்கை இந்த அரசு கடைப்பிடித்து வருகிறது. வழக்குகள் எங்களை நோக்கி ஓரடி நகர்ந்து வந்தால், அவற்றை எதிர்கொண்டு நாங்கள் பத்தடி முன்னேறுவோம். வழக்குகளாலும் விசாரணைகளா லும் திராவிட முன்னேற்றக் கழகத்தை அச்சுறுத்த முடியாது” என்று சென்னை கிழக்கு மாவட்டக் கழகச் செயலாளரும், மேனாள் அமைச்சருமான பி.கே.சேகர்பாபு எம்.எல்.ஏ. தெரிவித்தார்.
பருவமழை முன்னெச்ச ரிக்கை நடவடிக்கைகளை வலியுறுத்தி நடைபெற்ற கண்டன ஆர்ப்பாட்டத்தில் பேசியது தொடர்பாகப் பதிவு செய்யப்பட்ட வழக்கில், B2 எஸ்பிளனேட் காவல் நிலையத்தில் விசாரணைக்கு ஆஜரான பின்னர் செய்தியாளர்களிடம் அவர்கூறியதாவது:
வானிலை மற்றும் நீரியல் நிபுணர்கள் வடகிழக்குப் பருவமழையின் தாக்கம் அதிகமாக இருக்கும் என்று எச்சரித்திருந்த நிலையிலும், தமிழக அரசு உரிய முன்னெச்சரிக்கை நடவடிக்கைகளை மேற்கொள்ளவில்லை.
திராவிட முன்னேற்றக் கழக ஆட்சியில் ஏற்கெனவே இருந்த சுமார் 2,000 கிலோமீட்டர் மழைநீர் வடிகால்களுடன் கூடுதலாக 1,200 கிலோமீட்டர் வடிகால்கள் அமைக்கப்பட்டன. மொத்தமுள்ள சுமார் 3,200 கிலோமீட்டர் மழைநீர் வடிகால்களையும் தூர்வார வேண்டும் என்று வலியுறுத்தினோம்.
மேலும், பருவமழை நிவாரணப் பணிகளில் மக்கள் பிரதிநிதிகளை முழுமையாக ஈடுபடுத்த வேண்டும் என்றும், மாநகராட்சி மாமன்ற உறுப்பினர்களுக்கான மேம்பாட்டு நிதியை வழங்க வேண்டும் என்றும், சென்னை மாநகர மேயருக்குரிய அதிகாரங்களை முழுமையாக வழங்குவதுடன், மாநகராட்சிக்குப் போதிய நிதி ஒதுக்க வேண்டும் என்றும் கோரிக்கை விடுத்தோம்.
தூங்கி வழியும் த.வெ.க. அரசு!
திராவிட மாடல் ஆட்சியில் கழகத் தலைவர் மு.க. ஸ்டாலின் அவர்களும், அன்றைய துணை முதலமைச்சர் உதயநிதி ஸ்டாலின் அவர்களும் மழை வருவதற்கு முன்பாகவே ஆய்வுக் கூட்டங் களை நடத்தி, மக்களை நேரில் சந்தித்து, வெள்ளத் தடுப்புமற்றும் நிவாரணப் பணிகளை முடுக்கிவிட்டனர்.
ஆனால் இன்றைய அரசு தூங்கிக் கொண்டிருக்கிறது. அந்த அரசைத் தட்டி எழுப்பும் நோக்கத்தில்தான் கடந்த அக்டோபர் 12ஆம் தேதி சென்னை மாவட்ட ஆட்சியர் அலுவலகம் அருகிலும், சைதாப்பேட்டையிலும் கண்டன ஆர்ப்பாட்டங்களை நடத்தினோம்.
அந்த ஆர்ப்பாட்டத்தில் தெரிவித்த கருத்துகளுக்காக வழக்குப் பதிவு செய்யப்பட்டு, இன்று விசார ணைக்கு அழைக்கப்பட்டேன்.
விசாரணையின்போது 54 கேள்விகள் கேட்கப்பட்டன. அனைத்திற்கும் உரிய விளக்கங்களை அளித்திருக்கிறேன். மீண்டும் அழைத்தாலும் விசாரணைக்கு ஆஜராகத் தயாராக இருக்கி றேன்.
ஜனநாயகத்திற்கு ஏற்றதல்ல!
“இம்மென்றால் சிறைவாசம்!
ஏனென்றால் வனவாசம்!”
என்ற பழமொழிக்கு இன்றைய அரசு உயிர் கொடுத்துக் கொண்டிருக்கிறது.
மக்கள் பிரச்சினைகளு க்காகக் குரல் கொடுத்தாலே வழக்குப் பதிவு செய்வது ஜனநாயகத்திற்கு ஏற்றதல்ல.
இதுபோன்ற வழக்குகள், விசாரணைகள், அடக்குமுறைகள் மூலம் திராவிட முன்னேற்றக் கழகத்தைப் பணியவைக்கலாம் என்று ஆட்சி யாளர்கள் நினைத்தால் அது ஒருபோதும் நடக்காது.
எங்களை நோக்கி வழக்குகள் ஓரடி நகர்ந்து வந்தால், நாங்கள் பத்தடி முன்னேறு வோம் என்பதுதான் எங்களுடைய வரலாறு.
மக்கள் பணியை தொடருவோம்!
மக்களுக்காக எத்தனை துன்பங்கள் வந்தாலும், கழகத் தலைவர் மு.க. ஸ்டாலின் அவர்களின் வழிகாட்டுதலில் எங்களுடைய மக்கள் பணி இன்னும் வேகமாகத் தொடரும்.
ஒருபுறம் கழகத்தினர் மீது வழக்குகளைப் பதிவு செய்யும் அரசு, மறுபுறம் முதலமைச்சரை அடுத்தடுத்த தொகுதிகளுக்குச் சுற்றுப்பய ணம் மேற்கொள்ள வைக்கிறது.
ஐந்து நிமிடங்கள் பேசினாலே அதிர்வலைகளை ஏற்படுத்துவோம் என்று கூறியவர்கள், இரண்டு இடைத் தேர்தல்களிலும் வீதி வீதியாகச் சுற்றிவர வேண்டிய நிலை ஏற்பட்டிருக்கிறது.
முருங்கைக்காய் பறிப்பது, மாட்டுவண்டி ஓட்டுவது, குழந்தைகளுக்கு முத்தம் கொடுப்பது, வேல் வாங்குவது, சிலுவை வாங்குவது எனத் திரைப்படங்க ளில் நடிப்பதைப் போலப் பல்வேறு காட்சிகளை அரங்கேற்றினார்கள்.
ஆனால் மக்களின் தீர்ப்பு வேறு விதமாக அமைந்திருக்கிறது.
“தோல்வியிலும் எங்களுக்கு வெற்றி! வெற்றியிலும் அவர்களுக்குத் தோல்வி!” என்று எங்கள்கழகத் தலைவர் அவர்கள் கூறியதைப் போல, இன்றைய அரசியல் நிலவரமும் அதைத்தான் உணர்த்துகிறது.
அடித்த காற்றில்
கோபுரத்திற்கு சென்றார்கள்!
ஆதவ் அர்ஜுனா போன்றவர்களின் விமர்சனங்கள் குறித்துக் கேட்கிறீர்கள்.
நேற்று பெய்த மழையில் இன்று முளைத்த காளான்களைப் போன்றவர்கள் அவர்கள். திராவிட முன்னேற்றக் கழகத்தின் நீண்ட நெடிய அரசியல் வரலாற்றையும் பாரம்பரியத்தையும் அறியாதவர்கள்.
அடித்த காற்றில் கோபுரத்தின் உச்சிக்குச் சென்றவர்களைப் போல, திடீரென்று உயரத்திற்குச் சென்றவர்கள், ஒருநாள் கீழே இறங்கித்தான் ஆகவேண்டும்.
கழைக்கூத்தாடி கம்பியின் மேல் நின்று எத்தனை சாகசங்கள் செய்தாலும், மக்களைச் சந்திக்கத் தரைக்கு இறங்கித்தான் வரவேண்டும்.
அப்போது தான் மக்களின் உண்மையான கஷ்டங்களும் துயரங்களும் அவர்களுக்குப் புரியும்.
திராவிட முன்னேற்றக் கழகம் வழக்குகளுக்கு அஞ்சுகின்றஇயக்கமல்ல. மக்கள் நலனுக்காகப் போராடுகின்ற இயக்கம். ஆட்சியின் அவலங்களைத் தொடர்ந்து அம்பலப்படுத்துவோம். எத்தனை அடக்குமுறைகள் வந்தாலும் எங்களுடைய மக்கள் பணி ஓயாது!
இவ்வாறு முன்னாள் அமைச்சர் பி.கே.சேகர்பாபு எம்.எல்.ஏ. செய்தியாளர்களிடம் தெரிவித்தார்.