சென்னை, நவ. 4 –
மத்திய மேற்கு மற்றும் அதனை ஒட்டிய தென்மேற்கு வங்கக்கடல் பகுதிகளில் மையம் கொண்டிருந்த முரசு தீவிர புயல், கடந்த 6 மணி நேரத்தில் மணிக்கு 22 கிலோமீட்டர் வேகத்தில் மேற்கு-வடமேற்கு திசையில் நகர்ந்தது. மணிக்கு 25 கிலோமீட்டர் வேகத்தில் நகர்ந்து கொண்டிருந்த புயலின் நகரும் வேகம் மணிக்கு 22 கிலோ மீட்டராகக் குறைந்தது.
மேலும் இந்த முரசு தீவிர புயல் முழுவதுமாக மத்திய மேற்கு வங்கக்கடல் பகுதியில் நிலை கொண்டு, ஆந்திரக் கடலோரப் பகுதிகளை நோக்கி நகர்ந்தது. சென்னையிலிருந்து சுமார் 180 கிலோமீட்டர் வடகிழக்குத் திசையில் மையம் கொண்டிருந்த புயல் படிப்படியாக நகர்ந்து நேற்று நள்ளிரவில்
ஆந்திர மாநிலம் ஓங்கோலில் கரையைக் கடந்தது.
இந்த முரசு தீவிர புயல் ஆந்திர மாநிலம் நெல்லூருக்கும் நரசாப்பூருக்கும் இடையே, ஓங்கோல் அருகே தீவிர புயலாகக் கரையைக் கடந்ததால் அங்கு 120 கிலோ மீட்டர் வேகத்தில் பலத்த சூறாவளி காற்று வீசியது. இதனால் பெரும் மழை பெய்தது. மேலும் ஆந்திரப் பிரதேசம் நெல்லூர் நரசாப்பூர் இடையே ஓங்கோல் அருகே அதிகாலை 3.30 மணி முதல் 5.30 மணி வரை முழுமையாக கரையைக் கடந்தது.
ஆந்திராவில் பல இடங்களில் மரங்கள் மற்றும் மின் கம்பங்கள் முறிந்து விழுந்தன. இப்புயலால் விஜயபாடா, விசாகப்பட் டினம், திருப்பதிக்கு செல்லும் 19 உள்நாட்டு விமான சேவைகள் ரத்து செய்யப்பட்டன.