சென்னை, நவ.5 –
நவீனத் தமிழ் இலக்கியப் படைப்பாளி எழுத்தாளர் இரா.முருகன் மறைவுற்றார் என்பதை அறிவிக்க வருந்துகிறோம். அன்னாரின் மறைவிற்குஇரங்கல் தெரிவித்து கழகத் தலைவர் மு.க.ஸ்டாலின் அவர்கள் விடுத்துள்ள செய்தி வருமாறு:–
நவீனத் தமிழ் இலக்கியத்தின் குறிப்பிடத்தக்க படைப்பாளிகளுள் ஒருவரான எழுத்தாளர் இரா. முருகன் அவர்கள் மறைவெய்திய செய்தியறிந்து மிகுந்த வருத்தமுற்றேன்.
கவிதை, சிறுகதை, நாவல், கட்டுரை, மொழிபெயர்ப்பு, திரைக்கதை எனப் பல்வேறு தளங்களில் தனது படைப்பாற்றலால் தமிழ் இலக்கியத்திற்குச் செழுமை சேர்த்தவர். தனித்துவமான எழுத்துநடைக்குச் சொந்தக்காரரான அவர், அரசூர் வம்சம், மிளகு உள்ளிட்ட படைப்புகளால் தமிழ் இலக்கிய உலகில் தனக்கென ஓர் இடத்தைப் பெற்றவர்.
அவரது மறைவு தமிழ் இலக்கிய உலகிற்குப் பேரிழப்பாகும். அவரைப் பிரிந்து வாடும் குடும்பத்தினர், உறவினர்கள், சக எழுத்தாளர்கள், வாசகர்கள் உள்ளிட்ட அனைவருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்.
இவ்வாறு அந்த இரங்கல் செய்தியில் கழகத் தலைவர் அவர்கள் குறிப்பிட்டுள்ளார்.