சென்னை, நவ. 5 –
தமிழ்நாட்டில் நடப்பு நிதியாண்டின் முதல் 7 மாதங்களில், உள்நாட்டு ஜி.எஸ்.டி. வசூல் 2.3 சதவீதம் சரிந்துள்ளது. அக்டோபர் மாதத்திலும் வெறும் 3 சதவீத வளர்ச்சியே கிடைத்துள்ளது. ஆனால் அண்டை மாநிலங்கள் இரட்டை இலக்க வளர்ச்சியைப் பதிவு செய்துள்ளன. இதனால் தமிழகத்தின் தொழில் வளர்ச்சி, வணிகச் செயல்பாடுகள் மற்றும் அரசின் வருவாய் நிலை குறித்து பல்வேறு கேள்விகள் எழுந்துள்ளன. ஜி.எஸ்.டி. இணைய தளத்தில் வெளியிடப்பட்டுள்ள அக்டோபர் மாத புள்ளிவிவரங்களின்படி, தமிழகத்தில் கடந்த ஆண்டு இதே மாதத்தில் ரூ.11,298 கோடியாக இருந்த உள்நாட்டு ஜி.எஸ்.டி. வசூல், தற்போது ரூ.11,661 கோடியாக உயர்ந்துள்ளது. கடந்த ஆண்டுடன் ஒப்பிடும்போது ரூ.363 கோடி மட்டுமே கூடுதலாக வசூலாகியுள்ளது. இதன் வளர்ச்சி விகிதம் 3 சதவீதமாகும்.
ஆனால் அண்டை மாநிலங்களின் வளர்ச்சியுடன் ஒப்பிடும்போது தமிழகத்தின் நிலை மிகவும் மாறுபட்டுள்ளது. ஆந்திராவில் 24 சதவீதம், கேரளாவில்23 சதவீதம், கர்நாடகாவில் 18 சதவீதம், தெலங்கானாவில் 14 சதவீதம் என ஜி.எஸ்.டி. வசூல் அதிகரித்துள்ளது. தேசிய அளவில் மாநிலங்களின் உள்நாட்டு ஜி.எஸ்.டி. வசூல் 16 சதவீதம் வளர்ச்சி கண்டுள்ளது. தமிழகத்தில் மட்டும் வளர்ச்சி 3 சதவீதமாக இருப்பது கவனத்தை ஈர்த்துள்ளது. தமிழகத்தில் ஆகஸ்ட் மாதத்தில் ஜி.எஸ்.டி. வசூல் வளர்ச்சி மைனஸ் 1 சதவீதமாகவும், செப்டம்பரில் மைனஸ் 5 சதவீதமாகவும் இருந்துள்ளது. செப்டம்பர் மாதத்தில் கடந்த ஆண்டு ரூ.10,670 கோடியாக இருந்த வசூல், இந்த ஆண்டு ரூ.10,188 கோடியாகக் குறைந்துள்ளது.தொடர்ந்து இரண்டு மாதங்கள் சரிவைச்சந்தித்த நிலையில், அக்டோபரிலும் எதிர்பார்த்த வளர்ச்சி கிடைக்க வில்லை.
ஏப்ரல் முதல் அக்டோபர் வரையிலான 7 மாதங்களில் தமிழகத்தின் உள்நாட்டு ஜி.எஸ்.டி. வசூல் 2.3 சதவீதம் சரிந்துள்ளது. இதில் மாநில வரித்துறை நிர்வாகத்தின் கீழ் வசூலான தொகை 3.3 சதவீதமும், ஒன்றிய வரித்துறை நிர்வாகத்தின் கீழ் வசூலான தொகை 0.9 சதவீதமும் குறைந்துள்ளது. மாநிலத்தின் வருவாய் வளர்ச்சியில் ஏற்பட்டுள்ள இந்த பின்னடைவு அரசின் நிதி மேலாண்மைக்கு சவாலாக
அமையக்கூடும்.
மாநில அரசின் சொந்த வரி வருவாய்எதிர்பார்த்த அளவுக்கு அதிகரிக்காத பட்சத்தில், புதிய திட்டங்களுக்கான நிதி ஒதுக்கீடு மற்றும் ஏற்கனவே செயல்படுத்தப்படும் வளர்ச்சிப் பணங்களுக்கான செலவினங்களை நிர்வகிப்பதில்அழுத்தம் ஏற்படலாம். சாலைப் பணிகள், குடிநீர் திட்டங்கள், மழைநீர் வடிகால் வசதிகள், அரசு மருத்துவமனைகள், பள்ளிகளின் மேம்பாடு போன்ற உள்கட்டமைப்புப் பணிகளுக்கு கூடுதல் நிதி தேவைப்படும் நிலையில், வருவாய் வளர்ச்சியில் ஏற்படும் வீழ்ச்சி அரசுக்கு சவாலாக இருக்கிறது.
தொழில் நிறுவனங்களின் உற்பத்தி, பொருட்களின் விற்பனை மற்றும் வணிகப் பரிவர்த்தனைகளுடன்
ஜி.எஸ்.டி வசூல் தொடர்புடையது. சிறு, குறு மற்றும் நடுத்தர தொழில் நிறு வனங்களின் விற்பனை நிலவரம், புதிய முதலீடுகள் உற்பத்தியாக மாறியுள்ளதா, புதிய வேலைவாய்ப்புகள் உருவாகியுள்ளனவா என்பதும் முக்கியத்துவம் பெறுகின்றன. இதற்கிடையே, நாடு முழுவதும் அக்டோபர் மாத மொத்த ஜி.எஸ்.டி வசூல் ரூ.2.31 லட்சம் கோடியாக உயர்ந்துள்ளது. இது கடந்த ஆண்டைவிட 22.9 சதவீதம் அதிகம். உள்நாட்டு வருவாய் 15.8 சதவீதமும், இறக்குமதி மூலம் கிடைத்த வருவாய் 42.2 சதவீதமும் அதிகரித்துள்ளன. நாடு முழுவதும் வரி வசூல் அதிகரிக்கும் சூழலில் தமிழகத்தின் வளர்ச்சி மட்டும் குறைவாக இருப்பதற்கான காரணம் என்ன என்ற கேள்வி எழுந்துள்ளது.
இதற்கு மாறாக, ஐ.ஜி.எஸ்.டி. பங்கீட்டுக்குப் பிறகு தமிழகத்துக்கு கிடைக்கும் வருவாய் அதிகரித்துள்ளதாக அரசு தரப்பில் தெரிவிக்கப்படுகிறது. அக்டோபரில் ரூ.7,460 கோடியாக கிடைத்த எஸ்.ஜி.எஸ்.டி. வருவாய் கடந்த ஆண்டு இதே மாதத்தில் கிடைத்த ரூ.6,895 கோடியைவிட 8 சதவீதம் அதிகம்.
ஏப்ரல் முதல் அக்டோபர் வரையிலான காலத்தில் பங்கீட்டுக்குப் பிறகு கிடைத்த வருவாய் ரூ.45,014 கோடியிலிருந்து ரூ.51,726 கோடியாக உயர்ந்து 15 சதவீத வளர்ச்சியைப் பதிவு செய்துள்ளது.
தொழில் முதலீடுகளை ஈர்ப்பது, புதிய தொழிற்சாலைகளை உருவாக்குவது, சிறு மற்றும் குறு தொழில்களைப்பாதுகாப்பது, வணிகப் பரிவர்த்தனைகளை அதிகரிப்பது என பல்வேறு துறைகளில் தமிழக அரசு கவனம் செலுத்த வேண்டிய நிலை ஏற்பட்டுள்ளது. வெறும் முதலீட்டு அறிவிப்புகள் மட்டும் மாநிலத்தின் வருவாயை அதிகரிக்காது, அவை உற்பத்தியாகவும், வேலைவாய்ப்பாகவும், வணிக வளர்ச்சியாகவும் மாறவேண்டும்.ஆட்சி பொறுப்பேற்றுள்ள தமிழக வெற்றி கழக அரசு, மாநிலத்தின் வருவாய் வளர்ச்சியை அதிகரிக்க இதுவரை எடுத்துள்ள நடவடிக்கைகள் என்ன? அண்டை மாநிலங்களுடன் ஒப்பிடும்போது தமிழகத்தின் ஜி.எஸ்.டி வசூல் வளர்ச்சி குறைவதற் கான காரணம் என்ன? தொழில் மற்றும் வணிகத் துறைகளில் ஏற்பட்டுள்ள மந்தநிலையைச் சரிசெய்ய என்ன திட்டங்கள் வகுக்கப்பட்டுள்ளன? என்ற கேள்விகளுக்கு அரசு விரிவான
விளக்கம் அளிக்க வேண்டிய கட்டாயம் ஏற்பட்டுள்ளது.
தமிழகத்தின் பொருளாதார வளர்ச்சி மற்றும் அரசின் நிதி ஆதாரங்கள்
வலுவாக இருந்தால்தான் புதிய நலத்திட்டங்களையும் உள்கட்டமைப்புப் பணங்களையும் தொடர்ந்து செயல்படுத்த முடியும். எனவே, ஜி.எஸ்.டி. வசூல் சரிவை சாதாரண புள்ளிவிவர மாக கருதாமல், அதற்கான காரணங்களை கண்டறிந்து வருவாயைப் பெருக்க த.வெ.க. அரசு என்ன நட வடிக்கை எடுக்கப்போகிறது என்பதே தற்போது எழுந்துள்ள முக்கிய எதிர்பார்ப்பாகஉள்ளது.