சென்னை, நவ. 6 –
அமெரிக்க நாடாளுமன்றத்தின் பிரதிநிதிகள் சபை மற்றும் செனட் ஆகிய இரு அவைகளிலும் ஜனநாயகக் கட்சி பெரும்பான்மையைப் பெற்றிருப்பது, அதிபர் டொனால்ட் ட்ரம்பின் அரசியல் அணுகுமுறைக்கும் அவரது நிர்வாகத்தின் கொள்கைகளுக்கும் எதிராக அமெரிக்க மக்கள் அளித்துள்ள முக்கியமான தேர்தல் தீர்ப்பாகும்.
போர் வெறி, மதவாத அரசியல், குடியேற்ற எதிர்ப்பு, சமூகப் பிளவுகளைத் தூண்டும் அணுகுமுறை, மக்கள் நலன்களைப் புறக்கணிக்கும் பொருளாதாரக் கொள்கைகள் ஆகியவற்றுக்கு எதிரான அதிருப்தி இந்தத் தேர்தலில் வெளிப்பட்டுள்ளது. குறிப்பாக, ஈரான் மீதான அமெரிக்கா–இஸ்ரேல் கூட்டுத் தாக்குதல்கள் குடியரசுக் கட்சியின் தோல்விக்கு ஒரு காரணம் என்பதை ட்ரம்பே ஒப்புக்கொண்டிருப்பது குறிப்பிடத்தக்கது.
இந்தத் தேர்தலின் வரலாற்றுச் சிறப்பு, மிச்சிகனில் டாக்டர் அப்துல் எல்-சயீத் அமெரிக்க செனட் சபைக்குத் தேர்ந்தெடுக்கப்பட்ட முதல் முஸ்லிமாக உருவெடுத்திருப்பதாகும். பாலஸ்தீன மக்களின் உரிமைகளுக்காகவும், இஸ்ரேலுக்கு நிபந்தனையற்ற ராணுவ உதவி வழங்குவதற்கு எதிராகவும் அவர் முன்வைத்த அரசியல் நிலைப்பாடு முக்கியத்துவம் பெறுகிறது. பல இஸ்ரேல் ஆதரவு அமைப்புகளின் பெரும் நிதி செல்வாக்கை எதிர்கொண்டு அவர் பெற்ற வெற்றி அமெரிக்க அரசியலில் புதிய அத்தியாயத்தைத் திறந்துள்ளது.
நியூஜெர்சியில் டாக்டர் ஆதம் ஹமாவி வெற்றி பெற்றிருப்பதும், ரஷிதா தலீப் மீண்டும் தேர்ந்தெடுக்கப்பட்டிருப்பதும் பாலஸ்தீன ஆதரவு குரல்களுக்கு நாடாளுமன்றத்தில் கூடுதல் பிரதிநிதித்து வத்தை வழங்குகின்றன.
உலகின் பல்வேறு நாடுகளிலும் அண்மைக்காலத் தேர்தல்களில் தீவிர வலதுசாரி மற்றும் மதவாத அரசியல் சக்திகள் பின்னடைவைச் சந்தித்துள்ளன. இத்தகைய பின்னணியில் அமெரிக்கத் தேர்தல் முடிவுகளையும் உலகளாவிய அரசியல் மாற்றத்தின் ஒரு பகுதியாகப் பார்க்க வேண்டும். ஜனநாயகம், பன்மைத்துவம், சமூகநீதி, மனித உரிமைகள் ஆகியவற்றை முன்னிறுத்தும் அரசியல் குரல்களின் முக்கியத்துவம் அதிகரித்து வருகிறது.
அமெரிக்காவின் இரு அவைகளிலும் எதிர்க்கட்சியின் கட்டுப்பாடு உருவாகியிருப்பது ட்ரம்பின் எஞ்சிய ஆட்சிக்காலத்தில் அவரது கொள்கைகளுக்குப் புதிய நாடாளுமன்றச் சவால்களை உருவாக்கும். போர் அரசியலுக்கும் இனப்படுகொலைக்கும் எதிராகவும், மக்களின் வாழ்வாதாரம் மற்றும் உரிமைகளுக்காகவும் ஜனநாயக வழியில் எழும் குரல்களுக்கு இந்தத் தேர்தல் முடிவுகள் கூடுதல் முக்கியத்துவத்தை அளித்துள்ளன என்று எம்.எச்.ஜவாஹிருல்லா எம்.எல்.ஏ. விடுத்துள்ள அறிக்கையில் தெரிவித்துள்ளார்.