திருவனந்தபுரம் நவ.6 –
கேரள மாநிலம் திருவனந்தபுரத்தில் நடந்த அகில இந்திய பொது கணக்கு குழு தலைவர்கள் மாநாட்டில் சிவகிரி செண்பகவல்லி அணைக்கட்டை சீரமைக்க வலியுறுத்தி கடையநல்லூர் சட்டமன்ற உறுப்பினர் தி.மு.இராசேந்திரன் கேரள முதல்வர் சதீசனிடம் கோரிக்கை மனு வழங்கினார்.
திருவனந்தபுரத்தில் அகில இந்திய பொது கணக்கு குழு தலைவர்கள் மற்றும் உறுப்பினர்கள் மாநாடு இரண்டு நாட்கள் நடந்தது.இதில் பங்கேற்ற கடையநல்லூர் சட்டமன்ற உறுப்பினரும்,தமிழ்நாடு பொதுக்கணக்கு குழு உறுப்பினருமான தி.மு.இராசேந்திரன்,தமது சார்பிலும், தென்காசி வடக்கு மாவட்ட செயலாளர் வாசுதேவநல்லூர் சட்டமன்ற உறுப்பினரும்,ஈ.ராஜா சார்பிலும் இக்கோரிக்கை மனுவை கேரள முதல்வர் வி.டி.சதீசனிடம் நேரில் வழங்கி நிறைவேற்றித்தர வலியுறுத்தினார்.
அந்த மனுவில் கூறியிருப்பதாவது,
தென்காசி மாவட்டம், வாசுதேவநல்லூர் சட்டமன்ற தொகுதிக்குட்பட்ட செண்பகவல்லி அணை 1873-ம் ஆண்டு சிவகிரி ஜமீன்தார் மற்றும் திருவிதாங்கூர் அரசர் இடையே ஏற்படுத்தப்பட்ட ஒப்பந்தத்தின் அடிப்படையில் கட்டப்பட்ட ஒரு வரலாற்று முக்கியத்துவம் வாய்ந்த தடுப்பணையாகும்.மேற்குத் தொடர்ச்சி மலையில் உற்பத்தியாகும் காட்டாற்று வெள்ளத்தை தடுத்து தமிழகப் பகுதிக்கு திருப்பி விடுவதே இதன் முக்கிய நோக்கமாகும்.இந்த அணையிலிருந்து வரும் தண்ணீர் வாசுதேவநல்லூர் தலையணையை அடைந்து அங்கிருந்து இராசிங்கப்பேரி மற்றும் குலசேகரஆழ்வார் ஆகிய இரண்டு கால்வாய்கள் மூலம் பிரிந்து செல்கிறது.
இந்த அணைக்கட்டு 1965 களில் ஏற்பட்ட இயற்கை சீற்றம் மற்றும் பெருவெள்ளத்தால் இதன் கால்வாய் பகுதியில் சில மீட்டர் நீளத்திற்கு உடைப்பு ஏற்பட்டது.சுமார் அரை நூற்றாண்டு கடந்த நிலையிலும் அந்த அணையில் உடைப்பு இன்னும் சரிசெய்யப்படாமல் உள்ளது. இதனால் தண்ணீர் வரத்து குறைந்து விவசாய நிலங்கள்
கடுமையாக பாதிக்கப்பட்டுள்ளன.இக்கால்வாயினை சரிசெய்து நடைமுறைக்கு வந்தால் சுமார் 4500 ஏக்கர் விவசாய நிலங்கள் பாசன வசதி பெறுவதோடு, 3 மாவட்டவிவசாய தொழிலுக்கும், குடிநீர் தேவைக்கும் ஆதாரமாக விளங்கும்.மேலும் நிலத்தடி நீரும் உயரும்.இக்கோரிக்கையை தமிழ்நாடு அரசு தொடர்ந்து வலியுறுத்தி வந்தபோதிலும் கேரள அரசு அனுமதி அளிக்காததால் தடுப்பணையை சீரமைக்க முடிய வில்லை.இதனால் தண்ணீரை நம்பியிருக்கும் 3 மாவட்ட மக்கள் சுமார் 50 ஆண்டுகளாக ஏமாற்றத்திற்கு ஆளாகியுள்ளனர்.இது குறித்து பலமுறை கேரள அரசுடன் பேச்சுவார்த்தை மேற்கொண்டும் எவ்வித முடிவும் எட்டப்படவில்லை.எனவே செண்பகவல்லி அணை பிரச்சனை குறித்து விரைந்து நடவடிக்கை எடுக்க வேண்டும் என்று கேட்டுக் கொண்டுள்ளார்.