திராவிட முன்னேற்றக் கழக இளைஞர் அணி செயலாளர், தமிழ்நாடு சட்டமன்ற எதிர்க்கட்சி தலைவர் உதயநிதி ஸ்டாலின் அவர்களின் பிறந்தநாளையொட்டி, திருவள்ளூர் மத்திய மாவட்டக் கழகத்தின் சார்பில் பொதுமக்களுக்குப் பயனளிக்கும் வகையில் பல்வேறு நலத்திட்ட உதவிகள் வழங்கும் விழாக்கள் எழுச்சியோடு நடைபெற உள்ளன. இதுகுறித்து திருவள்ளூர் மத்திய மாவட்டக் கழகச் செயலாளரும், முன்னாள் அமைச்சருமான சா.மு.நாசர் விடுத்துள்ள அறிவிப்பு வருமாறு:

கழகத் தலைவர் மு.க.ஸ்டாலின் அவர்களின் வழிகாட்டுதலோடு, திராவிட இயக்கக் கொள்கைகளை இளைய தலைமுறையிடம் கொண்டு சேர்த்து, தமிழ்நாட்டின் வளர்ச்சிக்கு அயராது உழைத்து வரும் கழக இளைஞர் அணி செயலாளர், தமிழ்நாடு சட்டமன்ற எதிர்க்கட்சி தலைவருமான உதயநிதி ஸ்டாலின் அவர்களின் பிறந்தநாளை எளிய மக்களின் வாழ்வை உயர்த்தும் எளியோர் எழுச்சி நன்னாளாகக் கொண்டாடுவது நமது கடமையாகும்.

அந்த வகையில், திருவள்ளூர் மத்திய மாவட்டத்திற்குட்பட்ட மாநகர, ஒன்றிய, நகர, பகுதி, பேரூர் மற்றும் வார்டு, கிளைக் கழகங்கள் தோறும் ஏழை, எளிய மக்கள், மாணவ – மாணவிகள், மாற்றுத்திறனாளிகள் மற்றும் முதியவர்கள் பயன்பெறும் வகையில் மாபெரும் மக்கள் நலத்திட்ட உதவிகள் வழங்கும் நிகழ்ச்சிகள் சிறப்பாக ஒருங்கிணைக்கப்பட்டுள்ளன.

கழகத்தின் முன்னணித் தோழர்கள், மாவட்ட, ஒன்றிய, நகர, பகுதி, பேரூர் கழக நிர்வாகிகள், அனைத்து அணிகளின் அமைப்பாளர்கள், துணை அமைப்பாளர்கள், உள்ளாட்சி அமைப்புகளின் பிரதிநிதிகள் மற்றும் கழக உடன்பிறப்புகள் அனைவரும் பொதுமக்களோடு இணைந்து இந்த நலத்திட்ட நிகழ்வுகளில் பெருந்திரளாகப் பங்கேற்று, நமது இளைய தலைவரின் பிறந்தநாளை மக்கள் பயனுறும் எழுச்சி விழாவாகக் கொண்டாடிட அன்போடு அழைக்கிறேன்.