சென்னை, நவ. 7–
சென்னை காசிமேட்டைச் சேர்ந்த மீனவர்கள் 9 பேர் முரசு புயலில் சிக்கி மாயமாகியுள்ளனர். ஆந்திர கடற்கரையில் ஒதுங்கிய 7 பேரின் சடலங்களில் 3 பேர் சென்னை காசிமேடு பகுதியை சேர்ந்த மீனவர்கள் என அடையாளம் காணப்பட்டுள்ளது. சென்னை காசிமேடு மீன்பிடி துறைமுகத்தில் இருந்து கடந்த 29ம் தேதி மீனவர்கள் பக்கிரிசாமி என்ற சூர்யா (49), குப்பன் (48), மோகன் (47), ராஜேஷ் (52), முருகன் (48), குப்புசாமி (58), விஜயகாந்த் (44), அரவிந்த் (40) மற்றும் கடலூரை சேர்ந்த நாராயணன் (57) ஆகிய 9 பேர் விசைப்படகில் மீன்பிடிக்க சென்றுள்ளனர். முரசு புயல் எச்சரிக்கை காரணமாக ஆந்திராவின் நிஜாம்பட்டினம் துறைமுகத்தில் படகை நிறுத்தியிருந்த நிலையில், நவம்பர் 3ம் தேதி ராமாயப்பட்டினம் நோக்கி அவர்கள் புறப்பட்டதாக கூறப்படுகிறது.
பின்னர் புயலில் சிக்கி படகு நடுக்கடலில் கவிழ்ந்து விபத்துக்குள் ளாகி உள்ளது. தொடர்ந்து மீனவர்களை தேடும் பணிகள் தீவிரமாக நடந்து வருகிறது. இந்நிலையில் ஆந்திராவின் பிரகாசம் மாவட்டம், கொத்தப்பட்டினம், பள்ளிபாலம் கடற்கரையில் நேற்று படகு கவிழ்ந்த நிலையில், கண்டுபிடிக்கப்பட்டது. இந்நிலையில் நான்கு உடல்கள் கரை ஒதுங்கியுள்ளன. சடலங்களாக மீட்கப்பட்ட வர்கள் காசிமேடு மீனவர்களாக இருக்கலாம் என்று அதிகாரிகள் சந்தேகித்தனர். இதற்கிடையில் மன்னூரில் ஒரு சடலமும், குண்டம்மல்லம் பகுதியில் ஒரு சடலமும் கரை ஒதுங்கியுள்ளன. இதுவரை 7 சடலங்கள் மீட்கப்பட்ட நிலையில் 3 பேரின் அடையாளம் மட்டும் தெரிந்தது.
மேலும் மீனவர்களை தேடும் பணிகள் தீவிரமாக நடந்து வருகிறது. புயல் ஏற்படும்போது உள்ளூர் படகுகள் துறைமுகத்திற்கு செல்லும், ஆனால் சென்னை மற்றும் கடலூர் மீனவர்கள் அர்னாப் புயல் கரையை கடந்த பிறகு இவர்கள் புறப்பட்டு கடலுக்கு சென்று முரசு புயலில் சிக்கி இருக்கலாம் என கருதப்படுகிறது. இருப்பினும் மீனவர்கள் குடும்பத்தினர் வந்து சடலத்தை அடையாளம் கண்டு உறுதிப்படுத்தினால் மட்டுமே கடலில் அடித்து வரப்பட்டவர்கள் யார் என்பது உறுதியாக கூற முடியும் என அதிகாரிகள் தெரிவித்துள்ளனர்.
அதன்படி மீனவர்களின் குடும்பத்தினருக்கு தகவல் அளித்து அவர்களது குடும்பத்தினரை அதிகாரிகள் அழைத்து வந்தனர். முதற்கட்டமாக மோகன் என்பவரது சடலம் மட்டும் அடையாளம் காணப்பட்டுள்ளது. மற்ற உடல்கள் சிதைந்த நிலையில் உள்ளதால், அடையாளம் காணும் பணிகள் தீவிரமாக நடந்தது. பின்னர், 3 மீனவர்களின் உடல் அடையாளம் காணப்பட்டது, அவர்கள் காசிமேடு இந்திரா நகரை சேர்ந்த மோகன், விஜயகாந்த், முருகன் என்று கூறப்படுகிறது. மேலும் காணாமல் போன மற்ற மீனவர்களை தேடும் பணியில் அதிகாரிகள் தீவிரமாக ஈடுபட்டுள்ளனர். அதேபோல், உடல்களை அடையாளம் கண்டு சட்டப்பூர்வ நடவடிக்கைகளுக்கு பிறகு தமிழகத்துக்கு கொண்டுவர தமிழக மீன்வளத்துறை அதிகாரிகள் ஆந்திராவுக்கு வந்துள்ளனர்.
இதுதொடர்பாக காசிமேடு மீன்பிடி துறைமுக காவல் நிலையத்திலும், மீன்வளத்துறை அலுவலகத்திலும் காணாமல் போன மீனவர்களின் குடும்பத்தினர் புகார் அளித்தனர். ஆனால் இதுவரை காணாமல் போன மீனவர்கள் பற்றி எந்த தகவலும் கிடைக்கவில்லை என குடும்பத்தினர் வேதனை தெரிவித்தனர். மூன்று நாட்களாகியும் தற்போது வரை அவர்கள் இருக்கிறார்களா இல்லையா என தெரியாமல், தங்களால் நிம்மதியாக இருக்க முடியவில்லை என்றும், அதிகாரிகள் அலட்சியமாக செயல்படுவதாகவும் குற்றம்சாட்டினர். இங்கு இருக்கும் எந்த மீனவ சங்கத்தினரும் தங்களை சந்திக்கவில்லை, மீன்வளத்துறை அமைச்சர் கூட தங்களை வந்து தற்போது வரை சந்திக்கவில்லை எனக் கூறி நேற்று திடீர் சாலை மறியல் போராட்டத்தில் ஈடுபட்டனர்.
இதுகுறித்து தகவல் அறிந்து ஆர்.கே.நகர் சட்டமன்ற உறுப்பினரும் நிதி அமைச்சருமான மரியவில்சன் காசிமேடு பகுதிக்கு வந்தார். அப்போது காணாமல் போன மீனவர்களின் உறவினர்கள் குடும்பத்தி னர்கள் அழுது மறியலில் ஈடுபட்டிருந்தனர். அவர்களிடம் அமைச்சர் ஆறுதல் கூறினார்.
இதற்கிடையில் ஆந்திராவில் சடலங்கள் ஒதுங்கிய தகவல் அறிந்ததும் குடும்பத்தினர் கண்ணீர் விட்டு கதறினர். மீனவ கிராமமே சோகத்தில் மூழ்கியது.