சென்னை, நவ. 7–
கழகத் தலைவர் மு.க.ஸ்டாலின் அவர்களின் வழிகாட்டுதலின்படி, கழக நாடாளுமன்றக் குழுத் துணைத் தலைவரும் கழக விளையாட்டு மேம்பாட்டு அணிச் செயலாளருமான தயாநிதி மாறன் எம்.பி., அனைத்து ரயில்களிலும் டிஜிட்டல் காட்சிப் பலகைகள் (Digital Display Boards) மற்றும் பொது அறிவிப்பு அமைப்புகளை (Public Announcement Systems) நிறுவக் கோரி ஒன்றிய அரசை வலியுறுத்தியுள்ளார்.
இதுகுறித்து ரயில்வேத் துறை அமைச்சர் அஸ்வினி வைஷ்ணவ் அவர்களுக்கு அவர்எழுதியுள்ள கடிதத்தில் குறிப்பிட்டுள்ளதாவது :–
இந்திய ரயில்களில் டிஜிட்டல் காட்சிப் பலகைகள் மற்றும் பொது அறிவிப்பு அமைப்புகள் போதிய அளவில் இல்லாத நிலை, பயணிகளுக்குத் தொடர்ந்து பெரும் சிரமத்தையும் குழப்பத்தையும் ஏற்படுத்தி வருவது குறித்து கழகத் தலைவர் திரு. மு.க. ஸ்டாலின் அவர்களின் வழிகாட்டுதலின்படி, தங்களின் கவனத்திற்குக் கொண்டு வருகிறேன்.
தற்போது, பெரும்பாலான ரயில்களில், ரயில் புறப்படும் இடம், இடைப்பட்ட நிலையங்கள் மற்றும் சேருமிடம் குறித்த அத்தியாவசியத் தகவல்களைப் பயணிகளுக்குத் தெரிவிக்கும் வகையிலான செயல்பாட்டு டிஜிட்டல் காட்சிப் பலகைகளோ அல்லது பொது அறிவிப்பு அமைப்புகளோ இல்லை. ‘சதாப்தி எக்ஸ்பிரஸ்’ போன்ற முதன்மை ரயில்களில் கூட இத்தகைய அடிப்படை வசதிகள் இல்லை. ‘வந்தே பாரத்’ ரயில்களில் மட்டுமே அந்த வசதிகள் காணப்படுகின்றன.
ஏற்கனவே இத்தகைய வசதிகள் பொருத்தப்பட்டிருந்த சில ரயில்களில் கூட, தற்போது காட்சிப் பலகைகளும் அறிவிப்பு அமைப்புகளும் செயல்படாத நிலையில் உள்ளன. இதனால் இறங்குமிடம் பற்றிய குழுப்பங்களுக்கு பயணிகள் ஆளாகின்றனர். அதுமட்டுமல்ல, இரவுநேரங்களில் இறங்கக்கூடிய பயணிகள் பல இன்னல்களுக்கு ஆளாகின்றனர். ரயில் போகும் வேகத்திற்கு எந்த ரயில் நிலையத்தை கடக்கின்றோம் என்ற குழப்ப நிலையில் பயணிகள் பயணிக்கின்றனர். இது முறையான பராமரிப்பு மற்றும் கண்காணிப்பு இல்லாததையே உணர்த்துகிறது.
இத்தகைய வசதிகள் இல்லாதது பயணிகளுக்கு, குறிப்பாக முதியவர்கள், மாற்றுத்திறனாளிகள், பெண்கள், குழந்தைகள் மற்றும் வழித்தடங்கள் தெரியாத பயணிகளுக்குப் பெரும் இன்னல்களை ஏற்படுத்துகிறது.
குறிப்பாக, நள்ளிரவு மற்றும் அதிகாலைநேரப் பயணங்களின்போது, தாங்கள் எந்த நிலையத்தில் இருக்கிறோம், அடுத்த நிறுத்தம் எது, ரயில் புறப்படும் நேரம் என்ன போன்ற முக்கியத் தகவல்கள் தெரியாமல் பயணிகள் மிகுந்த குழப்பத்திற்கும் சிரமத்திற்கும் ஆளாகின்றனர்.
எந்த வகுப்பில் பயணம் செய்தாலும் அல்லது எந்தவகை ரயிலாக இருந்தாலும், ஒவ்வொரு பயணியும் சரியான நேரத்தில் துல்லிய மான பயணத் தகவல்களைப்பெற உரிமை உள்ளது.
இது தொடர்பாக, ரயில்வே அமைச்சகத்தை நான் வலியுறுத்துவது :–
மெயில், எக்ஸ்பிரஸ், சூப்பர் ஃபாஸ்ட், சதாப்தி மற்றும்பிற முதன்மை ரயில்கள் உட்படஅனைத்துப் பயணிகள் ரயில்களிலும் டிஜிட்டல் காட்சிப் பலகைகள் மற்றும் தானியங்கிப் பொது அறிவிப்பு அமைப்புகள், முழுமையாக நிறுவப்பட வேண்டும்.
ரயில் புறப்படும் இடம், இடைப்பட்ட நிலையங்கள் மற்றும் சேருமிடங்களில், ரயில் புறப்பாடு, வருகை, அடுத்தடுத்த நிலையங்கள், திட்டமிடப்பட்ட நிறுத்தங்கள் மற்றும் காலதாமதம் குறித்த நிகழ்நேர அறிவிப்புகள் மற்றும் காட்சித் தகவல்களை வழங்க வேண்டும்.
தற்போது ரயில்களில் உள்ள காட்சிப் பலகைகள் மற்றும் அறிவிப்பு அமைப்புகள்குறித்து உடனடியாக தணிக்கை செய்து, செயல்படாத அனைத்து உபகரணங்களையும் குறிப்பிட்ட காலக்கெடுவுக்குள் சரிசெய்து பயன்பாட்டிற்குக் கொண்டுவர வேண்டும்.
இந்த வசதிகள் அனைத்தும் ரயிலின் சேவை காலம் முழுவதும் தொடர்ந்து செயல்படுவதை உறுதிசெய்ய, முறையான பராமரிப்பு மற்றும் கண்காணிப்பு நடைமுறையை ஏற்படுத்த வேண்டும்.
இந்த வசதிகள், அனைத்து மொழிகளிலும், குறிப்பாக அந்தந்த மாநிலத்தின் மொழியிலும் கிடைக்கச்செய்ய வேண்டும். இந்த வசதிகளை ஒட்டுமொத்த பயணிகள் ரயில் வலைதளங்களிளும் செயல்படுத்துவதற்காக, காலக்கெடுவுடன் கூடிய விரிவான செயல் திட்டத்தை உருவாக்குமாறு அமைச்சகத்திற்கு நீங்கள் அறிவுறுத்த வேண்டும் என்றும், இதற்கான முன்மொழியப்பட்ட கால அட்டவணை மற்றும் நிதி ஒதுக்கீடு குறித்த விவரங்களை தெரிவிக்க வேண்டும் என்றும் கேட்டுக்கொள்கிறேன்.
பயணிகளுக்கான அடிப்படைத் தகவல்கள் மற்றும் பாதுகாப்புத் தொடர்பான வசதிகள் என்பவை, சில குறிப்பிட்ட உயர்தர ரயில்களில் மட்டுமே கிடைக்கக்கூடிய ஆடம்பர வசதிகளாகக் கருதாமல் அவை, ஒவ்வொரு ரயில் பயணியும் பெறக்கூடியஅத்தியாவசியவசதிகளாக இருப்பதை உறுதி செய்ய வேண்டும்.
இவ்வாறு அவர் வலியுறுத்தி உள்ளார்.