#Title

திருச்சி 07.11.2026 40 ஆண்டுகளுக்குப் பிறகு கனிமொழி ராஜாத்தி கருணாநிதியை சந்தித்த கழக முன்னோடி காசி! ஜார்ஜ் டவுன் நீதிமன்றம் உத்தரவு!

சென்னை, நவ.7 –

தி.மு.க. துணைப் பொதுச்செயலாளரும், நாடாளுமன்றக் குழுத் தலைவருமான கனிமொழி ராஜாத்தி கருணாநிதி அவர்களை, கழகத்தின் மூத்த முன்னோடி யும், மதுரை சோழவந்தானைச் சேர்ந்த விவசாயி யுமான 82 வயது காசி நேற்று முன்தினம் நேரில் சந்தித்து வாழ்த்துப் பெற்றார்.

தி.மு.க. தொடங்கப்பட்ட நாள் முதல் கழகத்தின் அடிப்படை உறுப்பினராகத் தொடர்ந்து பயணித்து வரும் காசி, மிசா காலத்தில் சிறைவாசம் அனுபவித்தவர். இந்தி எதிர்ப்புப் போராட்டம் உள்ளிட்ட கழகத்தின் பல்வேறு போராட்டங்களிலும் பங்கேற்றவர்.

இந்நிலையில், சென்னை சி.ஐ.டி. காலனியில் உள்ள கலைஞர் இல்லத்தில் கனிமொழி ராஜாத்தி கருணாநிதியைச் சந்தித்த அவருக்கு, கலைஞரின் திருவுருவச் சிலையை நினைவுப் பரிசாக வழங்கி சிறப்பித்தார் கனிமொழி.

அப்போது தனது பழைய நினைவுகளைப் பகிர்ந்துகொண்ட காசி, சுமார் 40 ஆண்டுகளுக்கு முன்பு இதே வீட்டில் உங்களைச் சந்தித்திருக்கிறேன். மதுரையில் நான் மூன்று பொதுக்கூட்டங்களை நடத்தியிருக்கிறேன் என்று கூறி, அந்தக் கூட்டங்களில் தீப்பொறி ஆறுமுகம் பங்கேற்ற புகைப் படத்தையும் காண்பித்தார்.

தொடர்ந்து பேசிய அவர், நான் ஐந்தாம் வகுப்பு வரைதான் படித்திருக்கிறேன். அதற்குப் பிறகு நான் பெற்ற அறிவெல்லாம் முரசொலி படித்ததன் மூலமாகக் கிடைத்ததுதான். நான் அதிகம் படிக்கவில்லை என்றாலும், எனது குடும்பத்தினர் அனைவரும் நல்ல கல்வியறிவு பெற்று உயர்ந்த நிலையை அடைந்துள்ள பெருமிதத்துடன் இன்று எனதுதங்கையைச் சந்திக்க அழைத்து வந்திருக்கிறேன் என்று நெகிழ்ச்சியுடன் தெரிவித்தார்.

மேலும், பெரியாரைச் சோழவந்தான் பகுதிக்கு அழைத்து வந்து பொதுக்கூட்டம் நடத்தியதையும், அவர் அப்பகுதிக்கு வந்தபோது மாலை அணிவித்து வரவேற்றதையும் நினைவு கூர்ந்தார். பெரியாரின் நூல்களைப் படித்ததன் வாயிலாகவே தனது குடும்பத்தில் நிகழ்ந்த சாதி மறுப்புத் திருமணத்தை ஏற்றுக்கொண்டதாகவும் கூறினார்.

அதேபோல் 1951, 1952 காலகட்டத்தில் சோழவந்தான் தென்கரை திரையரங்கம் முன்பு நடைபெற்ற பொதுக்கூட்டத்தில் பெரியாரை நேரில் சந்தித்து அவரது உரையைக் கேட்ட அனுபவத்தையும் பகிர்ந்து கொண்டார்.

முன்னதாக இத்தனை ஆண்டுக்காலமாக கழகம் தொடர்பான பத்திரிகைச் செய்திகள், நிகழ்ச்சி விளம்பரங்கள், கணக்கு வழக்குக் குறிப்புகள் எனச் சிறிய துண்டுச் சீட்டுகளாக இருந்தாலும், அனைத்தையும் இன்றுவரை பத்திரமாகச் சேகரித்து வைத்திருக்கிறார். அவற்றை எடுத்து வந்து கனிமொழியிடம் காண்பித்து மகிழ்ந்தார்.

அப்போது, தீப்பொறி ஆறுமுகம்தான் உங்களுக்குப் பிடித்தமான பேச்சாளரா என்று கனிமொழி கேட்டதற்கு, ஆமாம் என்று பதிலளித்த காசி, தான் சேகரித்து வைத்திருக்கும் புகைப்படங் களில் பெரும்பாலான வற்றில் தீப்பொறி ஆறுமுகம் இடம்பெற்றிருப்பதையும் சுட்டிக்காட்டினார்.

முரசொலி வழியே அறிவைப் பெற்று, பெரியாரின் கொள்கைகளை வாழ்வில் ஏற்று, கழகத்தின் வரலாற்றைத் தனது நினைவு களிலும் ஆவணங்களிலும் பாதுகாத்து வரும் 82 வயது கழக முன்னோடி யின் சந்திப்பு நெகிழ்ச்சியூட்டும் நிகழ்வாக அமைந்தது.