சென்னை, நவ. 7–
புயல் சீற்றத்தில் சிக்கி உயிரிழந்த காசிமேடு மீனவர்களின் குடும்பத்திற்கு நேரில் ஆறுதல்கூட தெரிவிக்காத முதலமைச்சர் விஜய், நடிகை திரிஷாவுடன் ஆடம்பர கல்யாணத்தில் பங்கேற்றது பெரும் சர்ச்சையை ஏற்படுத்தியுள்ளது. கடலில் எங்கள் உயிர் போய்க் கொண்டிருக்கும்போது, கல்யாண வீட்டில் நீங்கள் சிரித்துக் கொண்டிருக்கிறீர்களே? என மீனவர்கள் ஆவேசமாக கேள்வி எழுப்புகின்றனர்.
நடுக்கடலில் முரசு புயல் சீற்றத்தில் சிக்கி காசிமேடு மீனவர்கள் 9 பேர் உயிரிழந்த சம்பவம் தமிழ்நாடு முழுவதும் பெரும் சோகத்தை ஏற்படுத்தியுள்ளது. தங்கள் சொந்தங்களின் உயிரை பறிகொடுத்து, வாழ்வாதாரத்தை இழந்து, காசிமேடு மீனவ மக்கள் வேதனையில் பரிதவித்து வருகின்றனர். படகு உடைந்து, வலைகள் அறுந்து, கடனில் மூழ்கி, அடுத்தவேளை உணவுக்கே வழியில்லாமல் கதறிக் கொண்டிருக்கிறார்கள் காசிமேடு மீனவ குடும்பத்தினர். கணவனை இழந்த மனைவிகளும், தந்தையை இழந்த பிள்ளைகளும் கண்ணீருடன் அரசின் உதவிக்காக காத்திருக்கிறார்கள். ஆனால் அவர்களின் கதறல் சத்தம்ஆட்சியாளர்களின் காதுகளுக்கு எட்டவில்லை என மீனவ மக்கள் குமுறுகின்றனர். சொந்த மக்கள் உயிருக்கு போராடிக் கொண்டிருக்கும் போது, அவர்களோடு நிற்க மனமில்லாமல், எந்தவித கூச்சமும் இன்றி, முதலமைச்சர் விஜய், சொகுசான ஆடம்பர கல்யாணத்திற்கு நடிகை திரிஷா உடன் ஆடம்பரமாக சென்றதாக விமர்சனங்கள் எழுந்துள்ளன.
இந்நிலையில் தி.மு.க.ஐ.டி.விங்கின் சமூக வலைதளப் பதிவு வருமாறு: –
வாக்குறுதி அளித்த வாய் எங்கே? மக்களுக்காக ஓடோடி வருவேன் என்ற விஜய் எங்கே?
உங்களுக்கு ஒன்று என்றால் உங்கள் வீட்டில் ஒருவனாக இந்த விஜய் வந்து நிப்பான் என்று தேர்தல் பிரச்சாரத்தின் போது மேடைக்கு மேடை முழங்கிய அந்தப் போலி வாய்கள் இப்போது எங்கே போயின?
கேவலம் சில ஓட்டுகளுக்காகவும், அதிகாரப் பீடத்திற்காகவும் மக்களை ஏமாற்றி, நாடகமாடி பதவி நாற்காலியில் போய் அமர்ந்த பிறகு இந்த விஜய் இப்போது எங்கே போய் நிற்கிறார்?
கடல் நடுவே புயலில் சிக்கி, வாழ்வாதாரத்தை இழந்து, தம் சொந்தங்களின் உயிரைப் பறிகொடுத்து அனாதையாய் நிற்கிறார்களே எங்கள் மீனவ மக்கள், அவர்களின் கதறல் சத்தம் உங்கள் ஆடம்பரக் காதுகளுக்கு எட்டவில்லையா? சொந்த மக்கள் உயிருக்குப் போராடிக் கொண்டிருக்கும் போது, அவர்களோடு நிற்க மனமில்லாமல், எந்தவிதக் கூச்சமும் இன்றி சொகுசான ஆடம்பரக் கல்யாணத்திற்கு ஆடம்பரமாகச் செல்கிறீர்கள், இதுதான் நீங்கள் சொன்ன வீட்டுப் பிள்ளையா?
விஜய் அவர்களே புளுகு மூட்டைகளை அவிழ்த்துவிட்ட உங்களிடம் கேட்கிறோம், உங்கள் சொந்தக் குடும்பத்தில் ஒருவருக்கு இப்படி ஒரு கொடூர அசம்பாவிதம் நடந்திருந்தால், அதை மறந்துவிட்டு இப்படித்தான் ஆட்டமும் பாட்டமுமாகச் சொகுசுக் கல்யாணத்திற்குப் போவீர்களா?
உங்கள் ஒவ்வொரு வீட்டிலும் விஜய் இருக்கிறான் என்று கூசாமல் பொய் சொன்னீர்களே, இன்று கதறித் துடிக்கும் பல மீனவக் குடும்பத்தின் கண்ணீர் குரல் கூட உங்கள் மனசாட்சியை உருக்கவில்லையா? வாக்குகளுக்காக இனிக்கப் பேசுவதும் பதவி வந்ததும் மக்கள் உயிருக்குப் போராடும் போது ஆடம்பர விழாக்களில் களிப்பதும் அப்பட்டமான சுயநல அரசியல்!
ஆபத்தில் ஓடி வராதவர் உங்கள் வீட்டுப் பிள்ளையும் இல்லை; தலைவனும் இல்லை! மக்களின் கண்ணீரை அலட்சியப்படுத்தும் இந்தப் போலித்தனத்திற்கு காலம் நிச்சயம் பாடம் கற்பிக்கும்!
இவ்வாறு அதில் தெரிவிக்கப்
பட்டுள்ளது.