#Title

வழிப்பறி வழக்கில் விசாரணைக்கு அழைத்து வரப்பட்ட சிறுவன் காவல் நிலையத்திலிருந்து தப்பி ஓட்டம்! தனிப்படை அமைத்து போலீசார் தேடுதல் வேட்டை!

சென்னை, நவ. 7–

வழிப்பறி வழக்கில் விசாரணைக்கு அழைத்து வரப்பட்ட சிறுவன் காவல் நிலையத்திலிருந்து தப்பினான். அவரை தனிப்படை அமைத்து போலீசார் தீவிரமாக தேடிவருகின்றனர். தாம்பரம்-மதுரவாயல் பைபாஸ் சாலை, வானகரம் சர்வீஸ் சாலையில் இரவு நேரங்களில் தனியாக செல்பவர்களை குறிவைத்து வழிமறித்து செல்போன்கள், செயின் பறிப்பு சம்பவங்கள் அடிக்கடி நடைபெற்று வந்தன. இதுகுறித்து வானகரம் போலீசாருக்கு தொடர்ந்து புகார்கள் வந்த வண்ணம் இருந்தது. இந்நிலையில் தீவிர வாகன சோதனை மற்றும் ரோந்து பணியில் ஈடுபட்ட போலீசார் தொடர்ந்து விசாரணை மேற்கொண்டு வந்தனர். மேலும் வானகரம் போலீசார் தனிப்படைகள் அமைத்தும் தீவிரமாக கண்காணித்து வந்தனர்.

இந்நிலையில் பைக்கில் சென்றவரை வழிமறித்து செல்போன் வழிப்பறி சம்பவத்தில் ஈடுபட்டதாக முகப்பேர் பகுதியைச் சேர்ந்த விக்னேஷ் (20) மற்றும் 17 வயது சிறுவன் ஒருவனையும் போலீசார் மடக்கி பிடித்து விசாரணைக்காக வானகரம் காவல் நிலையத்திற்கு இரு சக்கர வாகனத்தில் நேற்று அழைத்து வந்தனர். வானகரம் காவல் நிலைய வாசலில் வந்தவுடன் சிறுவனை விசாரணைக்காக இரு சக்கர வாகனத்திலிருந்துஇறங்கி போலீஸ் நிலையத்திற்குள்அழைத்துச் செல்ல முயன்றனர். அப்போது திடீரென போலீசாரின் கையை உதறி தள்ளிவிட்டு போலீஸ் பிடியிலிருந்து அந்த சிறுவன் மின்னல் வேகத்தில் அங்கிருந்து தப்பிச் சென்றான்.

இதனை கண்டதும் பணியில் இருந்த போலீசார் அந்த சிறுவனை விரட்டி சென்று பிடிக்க முயன்றனர். ஆனால் அந்த சிறுவன் போலீசாரின் கைகளில் சிக்காமல் தப்பி ஓடிச் சென்று விட்டான். இதையடுத்து வானகரம் போலீசார் தனிப்படைகள் அமைத்து காவல் நிலையத்தி லிருந்து தப்பி ஓடிய சிறுவனை தேடி வருகின்றனர். சென்னை மற்றும் புறநகர் பகுதிகளில் உள்ள சுங்கச்சாவடி மற்றும் செக்போஸ்ட் உள்ளிட்ட பல்வேறு பகுதிகளில் உஷார்படுத்தப்பட்டு போலீசார் தீவிரமாக தேடி வருகின்றனர். மேலும் விசாரணைக்காக அழைத்து வரப்பட்டு தப்பி ஓடிய சிறுவன் மீது பல்வேறு வழிப்பறி வழக்குகள் இருப்பது குறிப்பிடத்தக்கது. வழிப்பறி வழக்கில் விசாரணைக்காக அழைத்து வரப்பட்ட சிறுவன் காவல் நிலையத்திலிருந்து தப்பிச்சென்ற சம்பவம் பரபரப்பை ஏற்படுத்தி உள்ளது. த.வெ.க. ஆட்சி அமைந்த பிறகு சிறைச்சாலை மற்றும் காவல் நிலையங்களில் இருந்து கைதிகள் தப்பிச் செல்வது தொடர்கதையாக உள்ள நிலையில் வானகரம் காவல் நிலையத்தில் இருந்து விசாரணைக் கைதி தப்பி சென்ற சம்பவம் போலீசார் மத்தியில் அதிர்ச்சியை ஏற்படுத்தியுள்ளது.