சென்னை, நவ.8–
தீபாவளி பண்டிகை நாளை கொண்டாடப்பட உள்ளது. இதையொட்டி சென்னையில் வசிப்பவர்கள் நேற்று முன்தினம் முதல் சொந்த ஊர்களுக்கு செல்ல தொடங்கினர். ஒரே நேரத்தில் மக்கள் படையெடுத்ததால் பஸ், ரயில்களில் இடம் கிடைக்காமல் கடும்
அவதிக்குள்ளாகினர். அதே நேரத்தில் தமிழகம் முழுவதும் துணி கடைகளில் கூட்டம் அலைமோதுகிறது. இதேபோல பட்டாசு விற்பனையும் களை கட்ட தொடங்கியுள்ளது. இன்றும் லட்சக்கணக்கானோர் பயணம் செய்ய திட்டமிட்டுள்ளனர்.
இந்நிலையில் தீபாவளி பண்டிகைக்கு நாளை ஒரு நாள் மட்டுமே எஞ்சியுள்ளதால், இறுதிக்கட்ட விற்பனை தமிழகம் முழுவதும் நேற்று முன்தினம் காலை முதல்
விறுவிறுப்பு அடைந்தது. சென்னையை பொறுத்தவரை முக்கிய வணிக பகுதிகளான தி.நகர், புரசைவாக்கம், பிரோட்வே, மயிலாப்பூர், வண்ணாரப் பேட்டை, தாம்பரம், குரோம் பேட்டை உள்ளிட்ட பல்வேறு பகுதிகளில் நேற்று முன்தினம் காலை முதல் மக்கள் கூட்டம் வழக்கத்தை விட அதிகமாக காணப்பட்டது.
சென்னையில் வசிக்கும் வெளி மாவட்ட மக்கள் தீபாவளி கொண்டாட தங்கள் சொந்த ஊருக்கு செல்வதை வழக்கமாக கொண்டுள்ளனர். 60 நாட்களுக்கு முன்பே ரயில்களில் டிக்கெட் முன்பதிவு செய்தனர். ஒவ்வொரு ரயில்களிலும் 200க்கும் அதிகமானோர் காத்திருப்போர் பட்டியலில் இருந்து வருகின்றனர். பல ரயில்களில்மேற்கொண்டு டிக்கெட் எடுக்க முடியாத அளவுக்கு ‘ரெக்ெரட்’ நிலை இருந்து வருகிறது. பண்டிகைக்கு முன்னரும், பின்னரும் அனைத்து ரயில்களிலும் இதே நிலை தான் நீடித்து வருகிறது. மேலும் அரசு மற்றும் தனியார் பஸ்களிலும் ஏராளமானோர் டிக்கெட் முன்பதிவு செய்துள்ளனர்
அதுமட்டுமல்லாமல் தீபாவளி பண்டிகைக்கு மறுநாள் திங்கட் கிழமை தமிழக அரசு சார்பில் விடுமுறை அளிக்கப் பட்டுள்ளது. தொடர்ந்து சனி, ஞாயிற்றுக்கிழமை என்று தொடர்ந்து 3 நாட்கள் விடுமுறை வருகிறது. அதே நேரத்தில் நேற்று முன்தினம் பெரும்பாலான தனியார் கல்லூரிகள் மாணவர்களுக்கு விடுமுறை விட்டுள்ளது. இதனால், தீபாவளியை உற்சாகமாக கொண்டாடும் வகையில் நேற்று முன்தினம் மாலை முதல் மக்கள் சென்னையில் இருந்து புறப்பட தொடங்கினர். இதனால், நேற்று மாலை முதல் சென்னை எழும்பூர், சென்ட்ரல், தாம்பரம் ரயில் நிலையத்தில் இருந்து புறப்படும் அனைத்து ரயில்களும் ஹவுஸ் புல் ஆனது. இன்றும், நாளையும் ரயில் நிலையங்களில் கூட்டம் மேலும் அதிகரிக்க வாய்ப்புள்ளது. பல லட்சம் பேர் சொந்த ஊர் செல்ல திட்ட மிட்டுள்ளனர்.
ஆம்னி பஸ் கட்டணம் உயர்வு!
ஆம்னி பஸ்களை பொறுத்த வரை, திருநெல்வே லிக்கு செல்லரூ.2500 கட்டணம் அறிவித்துள்ளனர். கோவைக்கு ரூ.2400 அறிவித்துள்ளனர். ஆனால் டிமாண்ட் காரணமாக ரூ.4 ஆயிரம் முதல் ரூ.4500 வரை வசூலிக்கப்படுவதாக புகார்கள் எழுந்துள்ளன. இந்த கட்டணம் மேலும் அதிகரிக்கும் என்று எதிர்பார்க்கப்படுகிறது. இதனால் பொதுமக்கள் இந்த தீபாவளியை சொந்த ஊரில் கொண்டாட கடும் போராட்டத்தை சந்திக்க வேண்டிய சூழ்நிலை தான் தற்போது உருவாகியுள்ளது.
மேலும், பட்டாசு, ஸ்வீட் கடைகளிலும் மக்கள் நீண்ட வரிசையில் நின்று பொருட்களை வாங்கி சென்ற காட்சியை காண முடிந்தது.