சென்னை, நவ. 8–
மனிதநேய மக்கள் கட்சியின் தலைவரும் சட்டமன்ற உறுப்பினருமான பேராசிரியர் எம். எச். ஜவாஹிருல்லா வெளியிட்டுள்ள அறிக்கை வருமாறு:–
முன்னாள் முதலமைச்சர்மு.க. ஸ்டாலின் தலைமையிலான தி.மு.க. அரசு, மாநில உரிமைகளையும்உண்மையான கூட்டாட்சித்தத்துவத்தையும் பாதுகாக்க உச்சநீதிமன்ற முன்னாள் நீதிபதி குரியன் ஜோசப் தலைமையில் அமைத்த உயர்நிலைக் குழுவைத் தற்போதைய தமிழ்நாடு அரசு கலைத்திருப்பது கடும் கண்டனத்திற்குரியது.
1969ஆம் ஆண்டு அமைக்கப்பட்ட ராஜமன்னார் குழுவுக்குப் பிறகு, மத்திய - மாநில அதிகாரப்பகிர்வு, ஆளுநரின் அதிகார வரம்புகள், கல்வி, நிதி உரிமைகள், தொகுதி மறுவரையறை உள்ளிட்ட முக்கியப் பிரச்சினைகளை ஆய்வு செய்த வரலாற்றுச் சிறப்புமிக்க முயற்சியாக இக்குழு அமைந்தது.
2026 பிப்ரவரி 16ஆம் தேதி சமர்ப்பிக்கப்பட்ட முதல் அறிக்கை, ஆளுநரின் அதிகாரங்களுக்குக் கட்டுப்பாடு, கல்வியை மாநிலப் பட்டியலுக்குக் கொண்டுவருதல், மாநிலங்களின் நிதி மற்றும் அரசியல் பிரதிநிதித்துவ உரிமைகளைப் பாதுகாத்தல் உள்ளிட்ட முக்கியப் பரிந்துரைகளை முன்வைத்தது.
இந்த அறிக்கையை அன்றைய கர்நாடக முதலமைச்சர் சித்தராமையா வரவேற்று, கூட்டுறவுக் கூட்டாட்சி வலுக்கட்டாயமான கூட்டாட்சியாக மாறிவருவதாக எச்சரித்தார். கட்சி வேறுபாடுகளைக் கடந்து மாநிலங்கள் ஒன்றிணையவும் அழைப்பு விடுத்தார். எனவே, இது தமிழ்நாட்டின் முயற்சியாக மட்டுமின்றி தேசிய அளவிலான கூட்டாட்சிப் பாதுகாப்பு விவாதமாகவும் உருவெடுத்தது.
தமிழ்நாடு சட்ட ஆணையத்தின் பணிகளுடன் ஒத்துப்போகிறது என்ற காரணத்தைக் கூறிஇக்குழுவைக் கலைத்திருப்பது ஏற்க முடியாதது. இரு அமைப்புகளின் நோக்கங்களும் முற்றிலும் வேறுபட்டவை.
மாநில உரிமைகள் தொடர்ந்து பறிக்கப்படும் சூழலில் இக்குழுவைக் கலைத்ததுகூட்டாட்சித் தத்துவத்திற்குப் பின்னடைவு. ஆட்சிகள் மாறலாம்; மாநில உரிமைகளைப் பாதுகாக்கும் கடமை மாறக்கூடாது.
எனவே, இக்குழுவைக் கலைத்த அரசாணையை உடனடியாகத் திரும்பப் பெற்று, எஞ்சிய ஆய்வுகளைத் தொடரவும், முதல் அறிக்கையின் பரிந்துரைகளைச் செயல்படுத்தவும் தமிழ்நாடு அரசு நடவடிக்கை எடுக்க வேண்டும்.
இவ்வாறு அவர் தெரிவித்துள்ளார்.