இந்தியா என்பது என்ன? ஒரு காலத்தில் ஆப்கானிஸ்தான் அதன் பகுதிகளில் ஒன்றாக இருந்தது! அப்போது அந்த மொத்தப் பூகோளப் பரப்பளவிற்கும் பெயர் இந்தியாதான்!

பர்மா, இலங்கை, பாகிஸ்தான், பங்களாதேஷ். இன்று சுதந்திர நாடாக விளங்கும் அனைத்தும் ஒரு காலத்தில் ‘இந்தியா’ என்று அழைக்கப்பட்ட நாட்டின் பகுதிகள்தான்!

“இந்தியா என்பது இப்போது இல்லை; அது எப்போதும் இருந்தது கிடையாது” என்று 1888-ஆம் ஆண்டிலேயே சர் ஜான் ஸ்ட்ராச்சே கூறினார், இப்படி;

“இந்தியாவைப் பற்றித் தெரிந்துகொள்ள வேண்டிய முதலும், முக்கியமான விஷயம் என்னவென்றால், இந்தியா என்பது இப்போது இல்லை; அது எப்போதும் இருந்தது கிடையாது. ஐரோப்பிய எண்ணங்களின்படி அரசியல், சமுதாய, மத ஒற்றுமை கொண்டதாகச் சொல்லப்படுகிற இந்தியா என்று எந்த நாடும் கிடையாது; நாம் அதிகமாகக் கேள்விப்படுகிற இந்தியா என்ற நாடும் இந்தியாவின் மக்கள் என்பவர்களும் இல்லாத விஷயமே.’’

-இதுதான் ஸ்ட்ராச்சேயின் வாதம்!

“There is the first and most essential thing to learn about India-that there is not and never was an India, or even any country of India, possessing, according to European ideas, any sort of unity, physical, political, social or religious, no Indian nation no ‘people of India’ of which we hear so much.”

-SIR JOHN STRACHEY,

India: Its Administration and Progress

இந்தியா என்பது கிடையாதா? யாரோ அட்லஸ் புத்தகத்தைப் பார்க்காத அப்பாவியின் அசட்டு வார்த்தைகள் என்று எண்ணிட வேண்டாம்.

இந்தியா என்ற ஒரு நாடு இல்லையென்றால் அதற்கு ஒரு நாட்டுக்குரிய இலட்சணங்கள் இல்லை என்று அர்த்தம்! அது பல நாடுகளை - தேசிய இனங்களை - உள்ளடக்கி வைத்திருக்கிற ஒரு கூட்டமைப்பு என்று அர்த்தம்!

இந்த வாசகங்களுக்குப் பொழிப்புரை தருவதைப் போல சர் ஜான் சீலி என்பவர் கூறுகிறார்:

“இந்தியா ஒரு அரசியல் பெயரல்ல: ஐரோப்பா போல அது ஒரு பூகோளப் பெயராகும்.”

வெள்ளையரால் வெற்றி கொள்ளப்பட்ட ஆப்கானிஸ்தான் தனிநாடாகத் திருப்பி அளிக்கப்பட்டபோது அது குறித்து யாரும் கண்ணீர் வடிக்கவில்லை!

பர்மா பிரிந்தபோது அய்யோ! பாரதத் தாய் கூறுபோடப்படுகிறாளே! வேண்டாம்! இந்தக் கொடுமை! என்று யாரும் அலறித் துடிக்கவில்லை!

பர்மா இந்தியாவுடன் இருந்தால் அதற்குப் பிரிந்துபோகும் உரிமை வழங்கத் தயார்! - என்று அகில இந்தியக் காங்கிரஸ் தீர்மானம் போட்டது!

பர்மா பிரிந்துபோகும் உரிமையுடன் இந்தியாவின் ஒரு அங்கமாக இருக்கலாம் - என்று முன்மொழிந்த காங்கிரஸ் ஆட்சியும், தேசபக்தர்களும் முஸ்லிம் லீக் பாகிஸ்தான் கேட்டபோது கொதித்துக் கிளம்பினார்கள்!

என் பிணத்தின் மீதுதான் பாகிஸ்தான் பிரிவினை நடைபெறும் என்று இறுதி எச்சரிக்கை விடுத்தார் காந்தியார்.

‘’பர்மா பிரிந்தபோது ஏற்படாத எதிர்ப்பும் பதைபதைப்பும் பாகிஸ்தான் பிரிவினைக்கு ஏற்படுவானேன்?

பர்மாவிற்கும் எஞ்சிய இந்தியாவிற்கும் உள்ள ஒற்றுமையைவிட, எஞ்சிய இந்தியாவிற்கும் பாகிஸ்தானுக்கும் உள்ள ஒற்றுமை குறைவாயிற்றே!’’

-இப்படிக் கேட்டவர் டாக்டர் அம்பேத்கர்!

பிரிந்துபோகும் உரிமையைப் பர்மா என்கிற மாகாணத்திற்கு வழங்கச் சம்மதித்த காங்கிரஸ் ஆட்சி;

முஸ்லிம்கள் பெரும்பான்மையாக வாழ்ந்த மாகாணங்களுக்கு அதற்கும் குறைந்த அதிகாரங்களை வழங்கச் சம்மதித்திருந்தால்...

மந்திரி சபைத் தூதுக்குழுவினர் தந்த திட்டத்திற்குக் காங்கிரஸ் கட்சி ஒப்புக்கொண்டிருந்தால்...

-இன்று பாகிஸ்தான் இல்லை! பங்களாதேஷ் இல்லை!

இன்னொரு இந்தியா 600-க்கும் மேற்பட்ட சமஸ்தானங்களைக் கொண்டிருந்தது. 1947 ஆகஸ்ட் 15-ல் ஒரே இந்தியா உருவானது. படையெடுப்பாலும் ராஜதந்திரத்தாலும் கைப்பற்றிய பகுதிகள் ஆயிற்று!

முன்பு டில்லியிலிருந்து ஆண்டது ஒரு அன்னிய ஏகாதிபத்தியம்! அதே ஏகாதிபத்தியம் டில்லியிலிருந்து ஆள்வது ஒரு சுதேசி ஏகாதிபத்தியம்!

இந்திதான் இந்தியாவின் ஆட்சிமொழியாக இருக்கிறது! இலங்கையில், சிங்கப்பூரில் தமிழ் ஆட்சிமொழி! இந்தியாவில் தமிழ் இரண்டாந்தர மொழி!

இப்படித்தான் இந்தியாவில் பிறந்த இரண்டாயிரத்திற்கும் மேற்பட்ட தாய்மொழிகள் ஆரியாவர்த்தத்துக்காரர்களின் மொழிகளாக வைக்கப்பட்டிருக்கின்றன!

யானைபோல் உ.பி.; பூனைபோல் இதர மாநிலங்கள்! இந்திய அரசியலில் அந்த யானையின் பிளிறல்தான் கேட்கிறது. இதுவரை தேர்ந்தெடுக்கப்பட்ட 3 பிரதமர்களும் அந்த மாநிலத்தைச் சேர்ந்தவர்கள்தான்.

இன்று இமயம் முதல் குமரி வரை அனைத்து பாமர மனிதருக்கும் தெரிந்தவர் பிரதமர் இந்திராகாந்திதான்.

இன்றே அரசியல் சட்டத்தைத் திருத்தி, மாநிலம் வாழ் மக்களுக்குள்ள அவமானத்தையும் அநீதியையும் போக்கும் வகையில் அனைவரின் சுயமரியாதையையும் மதிக்கும் விதத்தில் மாநில சுயாட்சி வழங்குங்கள். அப்போதுதான் இந்தியா காருள்ள அளவும், கடல் நீருள்ள அளவும் ஒரு அரசியல் அமைப்பாக இருக்கும்.

ஆம்.. கலைஞர் வாசகங்களின்படிக் கூறவேண்டுமானால் இந்தத் துணைக்கண்டத்தில் இன்னொரு பிரிவினையைத் தடுப்பதற்குத்தான் மாநில சுயாட்சி கேட்கிறோம்.

(1975)