சென்னை, நவ. 10
சென்னை கிழக்கு மாவட்ட திராவிட முன்னேற்றக் கழகத்தின் சார்பில், மாவட்டக் கழகச் செயலாளரும், மேனாள் அமைச்சரும், துறைமுகம் சட்டமன்ற உறுப்பினருமான பி.கே. சேகர்பாபு எம்.எல்.ஏ. ஏற்பாட்டில், சென்னை சேத்துப்பட்டு, எம்.சி. நிக்கோலஸ் சாலையில் உள்ள எஸ்.ஆர்.எஸ். சர்வோதயா மாணவிகள் தங்கும் விடுதியில், 100–க்கும் மேற்பட்ட மாணவிகளுக்கு நலத்திட்ட உதவிகள் வழங்கும் நிகழ்ச்சி நேற்று (09.11.2026, திங்கட்கிழமை) மதியம் 12.30 மணியளவில் நடைபெற்றது.
இந்நிகழ்ச்சியில், விடுதியில் தங்கிப் பயிலும் 100–க்கும் மேற்பட்ட மாணவிகளுக்குப் புத்தாடைகள், இனிப்புகள், பட்டாசுகள் மற்றும் அறுசுவை உணவு ஆகியவற்றை பி.கே. சேகர்பாபு எம்.எல்.ஏ. வழங்கினார். மேலும், விடுதிக்குத் தேவையான ஒரு மாதத்திற்கான அரிசி, பருப்பு, எண்ணெய், மசாலாப் பொருட்கள் உள்ளிட்ட மளிகைப் பொருட்கள் அடங்கிய தொகுப்புகளையும் வழங்கினார்.
தொடர்ந்து, மாணவிகளுடன் இணைந்து பி.கே. சேகர்பாபு எம்.எல்.ஏ., கழகச் சட்டத்துறை இணைச் செயலாளர் கே.எஸ். ரவிச்சந்திரன், செய்தித் தொடர்புக் குழு இணைச் செயலாளர் தமிழன் பிரசன்னா உள்ளிட்ட கழக நிர்வாகிகள் பட்டாசுகளை வெடித்து தீப ஒளித் திருநாளைக் கொண்டாடி மகிழ்ந்தனர்.
இந்நிகழ்ச்சியில் மாணவிகளிடையே பி.கே.சேகர்பாபு எம்.எல்.ஏ. பேசியதாவது:
“மகாத்மா காந்தியடிகளால் 1942–ஆம் ஆண்டு தொடங்கப்பட்ட இந்தச் சர்வோதயா மகளிர் பாதுகாப்பு மையத்தில், இன்றைக்கு எழும்பூர் பகுதியைச் சேர்ந்த கழகத் தோழர்கள் அனைவரும் ஒன்றிணைந்து, குறிப்பாகப் பெண் பிள்ளைகள் பாதுகாப்போடு வளர்க்கப்படுகின்ற இந்த மையத்தில் தீபாவளிக் கொண்டாட்டத்தை மேற்கொண்டதில் மட்டற்ற மகிழ்ச்சி அடைகிறோம்.
இதுபோன்ற எளிய உள்ளங்கள் வளம்பெறுவதற்கும், ஏற்றத்தாழ்வுகள் மக்களிடையே அகல்வதற்கும், சமத்துவம் காண்பதற்கும் பாடுபட்டவர் எங்கள் திராவிட மாடல் ஆட்சியின் நாயகன் முத்துவேல் கருணாநிதி ஸ்டாலின் அவர்கள்.
அந்த வகையில், ஆட்சியில் இருந்தாலும் இல்லாவிட்டாலும் இதுபோன்ற மகத்தான மக்கள் நலப் பணிகள் என்றும் தொடரும்.
அனைவரும் ஒரு தாய் பிள்ளைகள்! ஒரு நாட்டு மக்கள்! வருங்காலத்தில் இந்த நாட்டை வளர்ச்சியடையச் செய்யப்போகின்ற தூண்களாக இந்தப் பிள்ளைகள் விளங்கு கின்றார்கள்.
அந்தப் பிள்ளைகளின் வாழ்வு செழிக்க எல்லாம் வல்ல இறைவனையும் இயற்கையையும் இந்த நேரத்தில் வேண்டிக் கேட்டுக்கொள்கிறோம்.
இந்த அரிய நிகழ்வில், சட்டமன்றத் தேர்தலில் போட்டியிட்டு வெற்றி வாய்ப்பை இழந்தாலும் தொடர்ந்து மக்கள் பணியாற்றி வருகின்ற அன்பிற்கினிய கே.எஸ். ரவிச்சந்திரன் அவர்களும், தமிழன் பிரசன்னா அவர்களும், தலைமை செயற்குழு உறுப்பினர் கே.எஸ்.எம்.நாதன், பொதுக்குழு உறுப்பினர் அ.நிர்மலா தேவி,மாநகராட்சி மாமன்ற உறுப்பினர் ராஜேஸ்வரி ஸ்ரீதர் அவர்களும், நம்முடைய எல்.சுந்தரராஜன் அவர்களும், வட்டக் கழகச் செயலாளர்கள் சி.சேகர் வி.விஜயகுமார், வான்மதி கதிரவன் உள்ளிட்ட இந்த நிகழ்ச்சியை ஏற்பாடு செய்த அனைவருக்கும் இந்த நல்ல நாளில் மாவட்டக் கழகச் செயலாளர் என்ற முறையில் என்னுடைய மகிழ்ச்சியையும், நன்றியையும், வாழ்த்துகளையும் தெரிவித்துக்கொள்கிறேன்.
இவ்வாறு பி.கே. சேகர்பாபு எம்.எல்.ஏ. மாணவிகளிடையே மகிழ்ச்சியுடன் உரையாற்றினார்.
இதனைத் தொடர்ந்து செய்தியாளர்களைச் சந்தித்த பி.கே. சேகர்பாபு எம்.எல்.ஏ. கூறியதாவது:
“கொல கொலயா முந்திரிக்கா! கொள்ளையடிப்பவன் எங்கிருப்பான்? கூட்டத்தில் இருப்பான்! கண்டுபிடி!”
என்று சிறுவர்கள் விளையாடும் விளையாட்டைப் போல, இன்றைக்குத் தமிழகத்தில் கொலையோ கொலை, கொள்ளையோ கொள்ளை என்று நாடே தத்தளித்துக் கொண்டிருக்கின்றது.
குறிப்பாகச் சொல்ல வேண்டுமென்றால், தலைநகரை இன்றைக்குக் கொலைநகராக மாற்றியிருக்கின்றது இந்த ஆட்சி.
வெட்ட வருபவன் இன்னார், இனியவர் என்று பார்ப்பதில்லை. அண்ணன் கிடைக்கவில்லை என்றால் தம்பியைப் போட்டுத் தள்ளுகிறான். அண்ணனும் தம்பியும் கிடைக்கவில்லை என்றால் தகப்பனையும் போட்டுத் தள்ளுகிறான்.
கொலைகளுக்கும் பாலியல் வன்கொடுமைகளுக்கும் வயது வரம்பே இல்லாத ஒரு ஆட்சியாக இந்த ஆட்சி மாறிக் கொண்டிருக்கிறது.
இரண்டரை வயதுக் குழந்தையும் பாலியல் துன்புறுத்தலுக்கு ஆளாகிறாள். வீட்டிலேயே இருக்கின்ற 80 வயது முதியவரும் பாலியல் துன்புறுத்தலுக்கு ஆளாகிறார்.
நல்ல உடல்கட்டோடு இருப்பவர்கள் வசிக்கின்ற வீடுகளிலேயும் கொள்ளை நடக்கின்றது. முதியவர்கள் எங்கெல்லாம் இருக்கின்றார்களோ, அந்த வீடுகளையும் தேடிப்பிடித்துக் கொள்ளையடித்துக் கொண்டிருக்கின்றார்கள்.
படித்தவர்கள் முதல் பாமரர்கள் வரை, பால்மணம் மாறாத பச்சிளம் குழந்தைகள் முதல் கல்லறைக்குச் செல்லுகின்ற முதியவர்கள் வரை யாருக்கும் பாதுகாப்பு இல்லாத நிலை உருவாகியிருக்கிறது.
தமிழகம் ஒரு வன்முறைக் கூடாரமாகவும், வன்முறைக் களமாகவும் மாறி, இந்த ஆட்சியின் நிர்வாகத் திறமையின்மையால் சிக்கிச் சீரழிந்து கொண்டிருக்கின்றது.
தகுதியற்றவர்களைச் சட்டப்பேரவைக்கு மக்கள் பிரதிநிதிகளாகத் தேர்ந்தெடுத்ததன் காரணத்தால்தான் நாடு இன்றைக்கு அலங்கோலமாக மாறி, தலைநகரம் கொலைநகரமாக மாறிவிட்டது.
போதைப்பொருள் கடத்தல், கட்டப்பஞ்சாயத்து உள்ளிட்ட சட்டவிரோதச் செயல்களில் ஆளும் தமிழக வெற்றிக் கழகத்தினரே ஈடுபட்டு வருவதாகக் குற்றச்சாட்டுகள் எழுகின்றன.
“திமுக மீது Fake Narrative செட் செய்வதுதான் இந்த ஆட்சியின் ஒரே வேலை!”
இந்த ஆட்சியில் நடைபெறுகின்ற உருப்படியான ஒரே ஒரு பணி என்னவென்றால், திராவிட முன்னேற்றக் கழகத்தின் மீது Fake Narrative செட் செய்வதுதான்!
தங்கள் மீது இருக்கின்ற பழியையும் அவமானங்களையும் திசை திருப்புவதற்காக அவர்கள் எடுத்துக்கொண்ட ஒரே ஆயுதம், திமுக என்ற மூன்றெழுத்துதான்!
நூலகத்தில் அடுக்கி வைத்திருக்கின்ற புத்தகங்கள் முதல் சமூகத்தில் நடைபெறுகின்ற குற்றங்கள் வரை அனைத்திற்கும் யார் காரணம் என்பது அவர்களுக்கே நன்றாகத் தெரியும். ஆனால், அவற்றையெல்லாம் திசைதிருப்பி, அதற்குக் காரணம் திராவிட முன்னேற்றக் கழகம்தான் என்று பல ரூபாய்களைச் செலவு செய்து நெகட்டிவ் நரேட்டிவ் செட் செய்து கொண்டிருக்கின்றார்கள்.
எல்லோரையும் எல்லாக் காலகட்டங்களிலும் ஏமாற்றிவிட முடியாது.
“அடுப்பு நெருப்பு பசியை ஆற்றும்! கூரை நெருப்பு குடும்பத்தையே அழிக்கும்!”
அடுப்பில் எரிகின்ற நெருப்பு மக்களின் பசியை ஆற்றும். ஆனால், கூரையில் எரிகின்ற நெருப்பு அந்தக் குடும்பத்திற்கே தீங்கு விளைவிக்கும்.
அதுபோல, அடுப்பில் எரிகின்ற நெருப்பாகத் திராவிட முன்னேற்றக் கழகமும், கூரையில் எரிகின்ற நெருப்பாகத் தமிழக வெற்றிக் கழகமும் இருக்கின்றன.
மக்கள் இன்றைக்கு உண்மையை உணர்ந்து கொண்டிருக்கின்றார்கள். மே மாதம் 4ஆம் தேதி தாங்கள் செய்த தவறை உணர்ந்து, மீண்டும் இயல்பு நிலைக்குத் திரும்பிக் கொண்டிருக்கின்றார்கள்.
வருகின்ற காலங்களில் தேர்தல் என்ற ஒன்று வருகின்றபொழுது, வாக்குரிமை என்ற ஆயுதத்தால் இந்தக் கொடூர ஆட்சியை வீழ்த்த மக்கள் தயாராகிக் கொண்டிருக்கின்றார்கள்.
இவ்வாறு மேனாள் அமைச்சர் பி.கே.சேகர்பாபு எம்.எல்.ஏ. செய்தியாளர்களிடம் தெரிவித்தார்.