சென்னை, நவ. 10 –
திராவிட வெற்றிக் கழகத் தலைவர் மல்லை சி.ஏ.சத்யா விடுத்துள்ள அறிக்கை வருமாறு:
ஐ.நா. மன்றத்தின் யுனெஸ்கோ அமைப்பு தென் கிழக்கு ஆசியாவின் சாக்கரடீஸ் என்று போற்றப் பட்ட பகுத்தறிவு பகலவன் தந்தை பெரியார் அவர்களின் பெயரில்
முன்னாள் முதல மைச்சர் தளபதி அவர்களின் தலைமையிலான திராவிட மாடல் ஆட்சியில் மேற்கு மண்டலம் கோவையில் 300 கோடி ரூபாய் மதிப்பீட்டில் கட்டப்பட்ட பெரியார் அறிவுலக நூலக கட்டுமானம் உலகத் தரத்தில் நேர்த்தியாகவும் தரமாகவும் கட்டப் பட்டுள்ளது என்பதை மறுப்பார் யாரும் இல்லை.
இங்கே எழுத்தாளர் பெருமாள் முருகன் அவர்களின் குற்றச்சாட்டு கோவையில் 300 கோடி ரூபாயில் கட்டப் பட்ட பெரியார் அறிவுலக நூலக கட்டிடத்தின் தரத்தின் மீது அல்ல நூல்கள் கொள்முதல் செய்ததில் முறைகேடு தவறு நடந்து உள்ளது என்று சுட்டிக் காட்டி உள்ளார்.
யானை வாங்கியதில் தவறு நடைபெறவில்லை, அதற்கு அங்குசம் வாங்கியதில் ஊழல் நடந்துள்ளது என்பதை அறிவுலம் சிந்தித்துப் பார்க்க வேண்டும்.
எல்லா பூட்டுக்கும் ஒரே சாவியைப் போன்று த.வெ.க. அரசு பொறுப்பு ஏற்று ஆறுமாதங்கள் உருண்டோடி கொண்டு இருக்கும் நிலையில் சம்பந்தப்பட்ட துறையின் அமைச்சர் மற்றும் அதிகாரிகள் பொறுப்புணர்வுடன் துறையை முழுமையாக ஆய்வு செய்யாமல் எடுத்தேன் கவிழ்த்தேன் என்று இதற்கு காரணம் கடந்தகால திமுக ஆட்சி என்று பொத்தாம் பொதுவாக மாக்கியவல்லி அரசியல் பாணியில் பொறுப்பற்ற முறையில் பதில் சொல்லி வருகின்றார்கள்.
எங்கே தவறு நடந்தது என கண்டறிய வேண்டும்!
அறிவுக் கருவூலங்களான புத்தகங்களை வாங்கியதில் எங்கே தவறு நடந்து உள்ளது.
அறிவுச் சாளரமான நூலகத்தில் நஞ்சை அள்ளிப் போட்ட பிற்போக்கு சக்தி எது எமது கருத்தியல் எதிரிகள் பெரியார் அறிவுலக நூலகத்தில் தங்கள் கை வண்ணத்தை காட்டி உள்ளனரா என்று கண்டறிய வேண்டும்
அகல் விளக்கு, பீனிக்ஸ் போன்ற அச்சகத்தின் நூல்களை கொள்முதல் செய்ய சொன்ன அரிச்சந்திர மகா பிரபு யார் என்பதை கண்டறிந்து சம்பந்தப்பட்டவர்கள் மீது கடும் நடவடிக்கை எடுக்க வேண்டிய தமிழ்நாடு அரசு கடந்தகால திமுக ஆட்சி மீது பழியை போட்டு விட்டு தப்பிக்க முயற்சிப்பதாக என்னத் தோன்றுகிறது,
தமிழர் அடையாளங்கள் மீட்டுருவாக்கம்!
திராவிட முன்னேற்றக் கழகம் ஆட்சியில் இருந்த போதெல்லாம் தமிழர்களின் அடையாளங்களை மீட்டுருவாக்கம் செய்து பாதுகாத்து வந்துள்ளது,
1967 ஆம் ஆண்டு தமிழ்த் தாயின் தலைமகன் பேரறிஞர் அண்ணா அவர்கள் தமிழ்நாடு முதலமைச்சராக பொறுப்பு ஏற்று இரண்டாவது உலகத் தமிழ் மாநாடு நடத்தி தமிழறிஞர் பெருமக்களுக்கு சென்னை மெரினா கடற்கரையில் சிலைகள் வைத்ததில் இருந்து முத்தமிழ் அறிஞர் கலைஞர் அவர்களின் ஆட்சிக்காலத்தில்
2000 ஆண்டின் புத்தாயிரம் கொண்டாட்டத்தின் நினைவாக ஆதித் தமிழினத்தின் முற்றிய ஞானத்தின் அடையாளமாகத் திகழும் பிறப்புஒக்கும் எல்லா உயிர்க்கும் என்ற உலகப் பொதுமறையைத் தந்த திருவள்ளுவருக்கு கன்னியாகுமரி கடலில் 133 அடி உயர சிலை,சென்னை நுங்கம்பாக்கத்தில் வள்ளுவர் கோட்டம்,
தமிழர்களின் ஐம்பெரும் காப்பியங்களில் ஒன்றான சிலப்பதிகாரத்திற்கு நாகை மாவட்டம் பூம்புகாரில் கண்ணகிக் கோட்டம் அமைத்தது, ஆங்கில ஏகாதிபத்தியத்திடம் மண்டியிடாத வீரத்திற்கு சொந்தக்காரர்களான வீரபாண்டிய கட்டபொம்மன் உள்ளிட்ட பாளையக்காரர்களுக்கு நினைவு மணிமண்டபம்.
திராவிட கருத்தியலின் முதல்வர் அயோத்தி தாசர்,கர்மவீரர் காமராஜர் உள்ளிட்ட நாட்டுக்கு உழைத்திட்ட பெருமக்களுக்கு நினைவு மண்டபம் சிலைகளை எழுப்பியது,
மறைந்த தமிழறிஞர்களின் நூல்களை நாட்டுடைமை ஆக்கியது
உலகப் புகழ் பெற்ற எகிப்தின் அலெக்சான்றிய நூலகம் இலங்கையில் ஈழத்தமிழர்களின் வரலாற்று தலைநகரம் யாழ்ப்பாண நூலகம் போன்று சென்னை கோட்டூர் புரத்தில் கட்டப்பட்ட பேரறிஞர் அண்ணா நூற்றாண்டு நூலகத்தை அமெரிக்கா நாட்டின் வெளிவிவகாரத் துறை அமைச்சர் ஹில்லாரி கிளிண்டன் பார்வையிட்டு பாராட்டியது என்று அங்கிங்கெனாதபடி எங்கும் வரலாறு பேசும் வகை செய்தது திராவிட இயக்க ஆட்சியே .
எல்லா காலத்திலும்
ஏமாற்ற முடியாது!
திரை மோகத்திலும் மது மயக்கத்திலும் சிக்குண்ட தமிழனின் தொடையில் திரித்தவரை லாபம் என்று ஆட்சியாளர்கள் எண்ணிவிடக்கூடாது சிலரை சிலகாலமும் பலரை பலகாலமும் ஏமாற்றலாம். ஆனால் எல்லோரையும் எல்லா காலத்திலும் ஏமாற்ற முடியாது,
பெரியார் அறிவுலக நூலகத்திற்கு அறிவுக் கருவூலங்களான புத்தகங்களை வாங்கியதில் ஏற்பட்டுள்ள முறைகேடுகளை நாட்டு மக்களுக்கு தெரிவிக்கும் வகையில் வெளிப்படையான விசாரணை கமிஷன் அமைத்து ஆய்வு செய்து அறிக்கை வெளியிட வேண்டும் என்று தமிழ்நாடு முதலமைச்சர் ஜோசப் விஜய் அவர்களின் தலைமையிலான தவெக அரசை திராவிட வெற்றிக் கழகத்தின் சார்பில் வலியுறுத்திக் கேட்டுக் கொள்கிறேன்.
இவ்வாறு அவர் தெரிவித்துள்ளார்.