சென்னை, நவ. 10 –
பண்டிகையை கொண்டாட சொந்த ஊர்களுக்கு சென்றவர்கள், சென்னை திரும்பும் நிலையில், திடீரென உள்நாட்டு விமான கட்டணங்கள் பல மடங்கு உயர்த்தப்பட்டுள்ளது அதிர்ச்சியை ஏற்படுத்தியுள்ளது.
தீபஒளி திருநாள் கொண்டாட்டத்துக்காக சொந்த ஊர் சென்றுவிட்டு, ஏராளமானோர் விமானங்களில் சென்னை திரும்பி வருகின்றனர். இதனால், வெளியூர்களிலிருந்து சென்னைக்கு வரும், உள்நாட்டு விமானங்க ளில், பயணிகள் கூட்டம் அதிகரித்துள்ளது.
இந்நிலையில், தூத்துக் குடி, மதுரை, திருச்சி, கோவை சேலம், டெல்லி, மும்பை, கொல்கத்தா, அகமதாபாத், புவனேஸ்வர் உள்ளிட்ட இடங்களில் இருந்து, சென்னைக்கு வரும் உள்நாட்டு விமானங்களில், விமான டிக்கெட் கட்டணங்கள், திடீரென பல மடங்கு உயர்த்தப்பட்டுள்ளது. இதனால், வெளியூர்களில் இருந்து சென்னை வரும் பயணிகள் கடும் அதிர்ச்சியடைந்துள்ளனர்.
தூத்துக்குடி - சென்னை இடையே 7 ஆயிரத்து 45 ரூபாயாக இருந்த சாதாரண கட்டணம், 17 ஆயிரத்து 639 ரூபாயாக உயர்ந்துள்ளது. மதுரை - சென்னை இடையே 4 ஆயிரத்து 673 ரூபாயாக இருந்த சாராரண வழக்கமான விமான கட்டணம், 11 ஆயிரத்து 877 ஆக உயர்ந்துள்ளது. திருச்சியிலிருந்து சென்னைக்கு சாதாரண நாட்களில் 4 ஆயிரத்து 954 ஆக இருந்த விமான கட்டணம், 14 ஆயிரத்து 666 ஆக உயர்ந்துள்ளது.
கோவையில் இருந்து சாதாரண நாட்களில் 4 ஆயிரத்து 350 ஆக இருந்த விமான கட்டணம், இன்று 6 ஆயிரத்து 870 ஆக அதிகரித்துள்ளது.சேலத்தில் இருந்து சென்னைக்கு வழக்கமாக 3 ஆயிரத்து 832 ஆக இருந்த விமான கட்டணம், தற்போது, 13 ஆயிரத்து 98 ரூபாயாக அதிகரித்துள்ளது.
டெல்லியில் இருந்து சென்னைக்கு வழக்கமாக 10 ஆயிரத்து 167 ரூபாயாக இருந்த கட்டணம், தற்போது 15 ஆயிரத்து 100 ஆக உயர்ந்துள்ளது. கொல்கத்தாவிலிருந்து சென்னைக்கு 7 ஆயிரத்து 681 ஆக இருந்த கட்டணம் தற்போது, 9 ஆயிரத்து 48 ஆக உயர்ந்துள்ளது. மும்பையிலிருந்து சென்னைக்கு சாதாரண நாட்களில் 6 ஆயிரத்து 160 ரூபாயாக இருந்த கட்டணம் தற்போது, 11 ஆயிரத்து 808 ஆக உயர்ந்துள்ளது.
அகமதாபாத்திலிருந்து சென்னைக்கு சாதாரண நாட்களில் 7 ஆயிரத்து 470 ரூபாயாக இருந்த விமான கட்டணம், 21 ஆயிரத்து 944 ரூபாயாக உயர்ந்துள்ளது. புவனேஸ்வரில் இருந்து, சென்னைக்கு சாதாரண நாட்களில் 7 ஆயிரத்து 199 ஆக உஇருந்த விமான கட்டணம் தற்போது, 26 ஆயிரத்து 209 ஆக அதிகரித்துள்ளது. விமான கட்டணத்தின் திடீர் உயர்வால் பொதுமக்கள் கடும் இன்னல்களுக்கு ஆளாகியுள்ளனர்.