புதுடெல்லி, நவ.10–
கிரீமிலேயர் வரம்பு தொடர்பான உத்தரவை அமல்படுத்த ஒன்றிய அரசு கேட்ட 2 ஆண்டு கால அவகாசத்தை உச்ச நீதிமன்றம் நிராகரித்து விட்டது. பொதுத்துறை நிறுவனங்கள் மற்றும் பொதுத்துறை வங்கிகளில் பணியாற்றும் ஊழியர்களின் பிள்ளைகளுக்கு, அவர்களின் பெற்றோரின் சம்பள வருமானத்தை மட்டும் அடிப்படையாக வைத்து ‘கிரீமிலேயர்’ வரம்பு நிர்ணயம் செய்யப்பட்டு வந்தது.
இதனால் தங்களுக்கு ஓபிசி இடஒதுக்கீடு மறுக்கப்படுவதாக தெரிவித்து பாதிக்கப்பட்டவர்கள் உச்சநீதிமன்றத்தில் வழக்கு தொடர்ந்தனர்.
இந்த வழக்கை விசாரித்த உச்ச நீதிமன்றம், கடந்த மார்ச் 11ம் தேதிஅன்று மிக முக்கியமான தீர்ப்பு ஒன்றை வழங்கியது.
அதில், 1993ம் ஆண்டு வெளியிடப்பட்ட அதிகாரப்பூர்வ குறிப்பாணை யின் அடிப்படையில் பெற்றோரின் சமூக அந்தஸ்து மற்றும் வகிக்கும் பதவியை மட்டுமேஅளவுகோலாகக் கொள்ளவேண்டும் என்று உத்தரவிட்டது.
மேலும் அரசு ஊழியர்களுக்கு இணையாக பொதுத்துறை ஊழியர்களுக்கும் பதவி சம நிலையை உருவாக்கி, இந்த உத்தரவை 6 மாத காலத்திற்குள் ஒன்றிய அரசு அமல்படுத்த வேண்டும் என்றும் திட்டவட்ட மாக அறிவுறுத்தியிருந்தது.
இந்த சூழலில் இந்த வழக்கு நீதிபதிகள் பி.எஸ்.நரசிம்மா மற்றும் ஆர்.மகாதேவன் ஆகியோர் அடங்கிய அமர்வில் மீண்டும் விசாரணைக்கு வந்தது.
அப்போது ஒன்றிய அரசு தரப்பில் ஆஜரான சொலிசிட்டர் ஜெனரல் துஷார் மேத்தா, ‘இந்த தீர்ப்பை உடனே அமல்படுத்தினால் கடந்த கால பணி நியமனங்கள் பாதிக்கப்படும் என்பதால், புதிய கொள்கையை வகுக்க 2 ஆண்டுகள் அவகாசம் தேவை’ என்று வாதிட்டார்.
ஆனால் ஒன்றிய அரசின் இந்த கோரிக்கையை திட்டவட்டமாக நிராகரித்த நீதிபதிகள், ‘கொள்கைமுடிவெடுக்க இவ்வளவு நீண்ட அவகாசம் வழங்க முடியாது என்பதால், கடந்த மார்ச் 11ம் தேதி தீர்ப்பை நடைமுறைப்படுத்த மேலும் 8 வாரங்கள் மட்டுமே கால அவகாசம் தருகிறோம்’ என்று அதிரடியாக உத்தரவிட்டனர்.
அதேசமயம் ஏற்கனவேமுடிவடைந்த பழைய நியமனங்கள் மாற்றப்படாது எனவும், முடிவு கள் இன்னும் முழுமை பெறாத 2025ம் ஆண்டுக்கான சிவில் சர்வீஸ் தேர்வுக்கு இந்த புதிய கிரீமிலேயர் விதிமுறை கட்டா யம் பொருந்தும் எனவும் நீதிபதிகள் தெளிவுபடுத்தினர்.