#Title

உச்சநீதிமன்றம் உத்தரவு! அரசு ஊழியர்கள் 48 மணி நேரம் சிறையில் இருந்தால் சஸ்பெண்ட்!

சென்னை, நவ. 11 –

அரசு ஊழியர் ஒருவர் கைது செய்யப்பட்டு 48 மணி நேரத்துக்கும் மேலாக நீதிமன்றக் காவலில் வைக்கப்பட்டால், அவர் தானாகவே பணியிடைநீக்கம் செய்யப்பட்டவராகக் கருதப்படுவார். இதற்காக அரசு தனியாக இடைநீக்க உத்தரவு பிறப்பிக்க வேண்டிய அவசியமில்லை என்று உச்சநீதிமன்றம் தெளிவுபடுத்தி யுள்ளது.

பீகாரில் லஞ்சப் புகாரில் கைது செய்யப்பட்ட அரசு மருத்துவமனை நிர்வாகியின் ஜாமீன் வழக்கை விசாரித்தபோது நீதிபதிகள் இந்த முக்கியமான கருத்தைதெரிவித்துள்ளனர்.

பீகார் மாநிலம் சமஸ்திபூரில் அரசு சதர் மருத்துவமனை செயல்பட்டு வருகிறது. இந்த மருத்துவ மனையில் விஷ்வஜீத் சிங் என்பவர் நிர்வாகியாக பணியாற்றி வந்தார்.

அதே மருத்துவமனையில் ஒப்பந்த அடிப்படையில் வேலை பார்த்து வந்த ஊழியர் ஒருவருக்கு ரூ.36,421 சம்பள நிலுவை தொகை வழங்கப்பட வேண்டியிருந்தது. இந்தப் பணத்தை பெற்று தருவதற்காக விஷ்வஜீத் சிங் ரூ.4,000 லஞ்சம் கேட்டதாக புகார் எழுந்தது.

இதுதொடர்பாக அந்த ஒப்பந்த ஊழியர் ஊழல் தடுப்புப் பிரிவு போலீசாரிடம் புகார் அளித்தார். இதன்பேரில் 2025-ம் ஆண்டு விஷ்வஜீத் சிங் மீது வழக்குப்பதிவு செய்யப்பட்டது. ஊழல் தடுப்புச் சட்டத்தின் கீழ் அவர் கைது செய்யப்பட்டார்.

கைது செய்யப்பட்ட விஷ்வஜீத் சிங் சுமார் 15 நாட்கள் நீதிமன்றக் காவலில் வைக்கப்பட்டார். அதாவது, போலீஸ் காவலில் அல்லாமல் நீதிமன்ற உத்தரவின்படி ஜெயிலில் அடைக்கப்பட்டிருந்தார்.

இந்த சம்பந்தப்பட்ட வழக்கு உச்சநீதிமன்றத்தின் விசாரணையின் போது, விஷ்வஜீத் சிங்கின் பணிநிலை குறித்தும் நீதிபதிகள் கவனத் தில் கொண்டனர். அவர் கைது செய்யப்பட்ட பிறகு சுமார் 15 நாட்கள் நீதிமன்ற காவலில் இருந்துள்ளார்.

அப்போது நீதிபதி ஜே.பி. பர்திவாலா “ ஒரு அரசு ஊழியர் கைது செய்யப்பட்டு 48 மணி நேரத்துக்கும் மேலாக நீதிமன்றக் காவலில் இருந்தால், அவர் தானாகவே பணியிடைநீக்கம் செய்யப்பட்டவராகக் கருதப்படுவார். இதற்காக அரசு தனியாக இடைநீக்க உத்தரவு பிறப்பிக்க வேண்டிய அவசியமில்லை“ என்றுதீர்ப்பு கூறினார்.