திருச்சி, நவ.11 –
திருச்சி மாவட்டம் துறையூர் தொகுதியின் சட்டமன்ற உறுப்பினரான ரவிசங்கர், தமிழக சட்டப்பேரவை துணை சபாநாயகராகவும் இருந்து வருகிறார். துறையூர் பகுதியில் நிலவும் குடிநீர் பிரச்சினை உள்ளிட்ட கோரிக்கைகளுடன் துறையூரைச் சேர்ந்த கார்த்தி என்பவரும், பத்திரிகை நிருபர் ஒருவரும் துணை சபாநாயகர் ரவிசங்கரை சந்தித்து மனுஅளிக்கச் சென்றுள்ளனர். கார்த்தியையும் நிருபரையும் துணை சபாநாயகர் ரவிசங்கர் கண்மூடித்தனமாக தாக்கி உள்ளார்.
இந்தச் சம்பவம் தொடர்பான வீடியோ, சமூக வலைதளங்களில்வைரலாகி வருகிறது.
திருச்சி மாவட்டம், துறையூர் கண்ணபிரான் காலனியைச் சேர்ந்த கார்த்திக்குமார் என்பவர், தனது பகுதியில் கடந்த ஒருவார காலமாக குடிநீர் விநியோகம் சீராக இல்லை என்றும், குப்பைகள் அகற்றப்படாமல் தேங்கியுள்ளதாகவும் நகராட்சி நிர்வாகத்திடம் முறையிட்டுள்ளார். இருப்பினும், நகராட்சி தரப்பில் எவ்வித நடவடிக்கையும் எடுக்கப்படவில்லை எனக் கூறப்படுகிறது.
இது குறித்து, தனது தொகுதி சட்டமன்ற உறுப்பினரும், தமிழ்நாடு சட்டமன்ற துணை சபாநாயகருமான ரவிசங்கரை தொலைபேசி மூலம் தொடர்புகொள்ள கார்த்திக்குமார் முயன்ற
தாகவும், ஆனால் அவர் அழைப்பை ஏற்கவில்லை என்றும் தெரிகிறது.
இந்நிலையில், தீபாவளி நாளான நேற்று அவசர வேலை காரணமாக மண்ணச்சநல்லூர் பகுதிக்கு வந்த கார்த்திக்குமார், அங்குள்ள துணை சபா நாயகரின் வீட்டின் அருகே அவரை சந்தித்து தன் பகுதி பிரச்சினைகள் குறித்து முறையிட்டதாக சொல்லப்படுகிறது.
அப்போது, பொதுமக்கள் மத்தியில் கார்த்திக்குமாரைத் தகாத வார்த்தைகளால் பேசிய துணை சபாநாயகர், அவரை சரமாரியாகத் தாக்கி எட்டி உதைத்து விரட்டியடித்த தாகக் கூறப்படுகிறது.
தாக்குதலுக்கு உள்ளான கார்த்திக் குமார், ‘நான் தளபதிக்கு தான் வாக்களித்தேன்’ இதற்காகத்தான் விஜய்க்கு வாக்களித்தோமா? என தமிழக வெற்றிக் கழகத் தலைவர் விஜய்யின் பெயரைப் பலமுறை உச்சரித்தும், அத்தாக்குதல் தொடர்ந்ததாகக் கூறப்படும் வீடியோ காட்சிகள் தற்போது சமூக வலைதளங்களில் வெளியாகி பெரும் பரபரப்பை ஏற்படுத்தி வருகின்றன.
இச்சம்பவத்தில் காயமடைந்த
கார்த்திக்குமார், தற்போது மண்ணச்சநல்லூர் அரசு மருத்துவமனையில் உள்நோயாளியாகச் சேர்க்கப்பட்டு சிகிச்சை பெற்றார்.
இந்நிலையில், மருத்துவமனையில் இருந்தபடியே ஒரு வீடியோவை வெளியிட்ட கார்த்திக்குமார், “எனது மரணத்திற்கு துணை சபாநாயகர் மற்றும் அவரது குடும்பத்தினர் மட்டுமே காரணம்” என்று பேசியிருந்தார்.
குறைகளை தெரிவிக்க வந்த சொந்த தொகுதி மக்களிடம், அரசு பொறுப்பில் உள்ள ஒரு துணை சபாநாயகர் இது போன்று அடாவடியில் ஈடுபட்டுத் தாக்குதல் நடத்திய சம்பவம் திருச்சி பகுதியில் பெரும் பரபரப்பையும் பொதுமக்கள் மத்தியில் அதிருப்தியையும் ஏற்படுத்தியது.