சென்னை, நவ. 11 –
மனிதநேய மக்கள் கட்சியின் தலைவரும் சட்டமன்றஉறுப்பினருமான பேராசிரியர் எம் எச் ஜவாஹிருல்லா வெளியிட்டுள்ள அறிக்கை வருமாறு:
பண்டிகை நாளில், தமிழ்நாட்டின் பல்வேறு பகுதிகளில் ஒரே நாளில் பத்து கொலைகள் நிகழ்ந்திருப்பது மிகுந்த அதிர்ச்சியையும் கவலையையும் ஏற்படுத்தியுள்ளது.
குறிப்பாக, தேனி மாவட்டத்தில் பொதுமக்களுக்கு இடையூறு ஏற்படுத்தும் வகையில் சாலையின் நடுவில் பட்டாசு வெடித்துக் கொண்டிருந்த இளைஞர்களைத் தட்டிக்கேட்ட காவல் சிறப்பு உதவி ஆய்வாளர் செந்தில்குமார் அவர்கள் தாக்கப்பட்டு உயிரிழந்திருப்பது வன்மையாகக் கண்டிக்கத்தக்கது. காவல்துறையில் பணியாற்றும் அதிகாரிக்கே பாதுகாப்பில்லாத நிலை ஏற்பட்டிருப்பது தமிழகத்தின் சட்டம் – ஒழுங்கு நிலை குறித்த மிகப்பெரிய கேள்வியை எழுப்புகிறது.
தேனி காவல் சிறப்பு உதவி ஆய்வாளர் செந்தில்குமார் குடும்பத்தினருக்கு ரூபாய் ஒரு கோடி இழப்பு வழங்க வேண்டும் என்று கேட்டுக்கொள்கிறேன்
சென்னையில் வியாசர்பாடி, திருச்சி, கடலூர், சிவகங்கை, விருதுநகர் உள்ளிட்ட பல்வேறு பகுதிகளில் நிகழ்ந்த கொலைச் சம்பவங்களும், சிறிய பிரச்சினைகள்கூட கொலை வெறித் தாக்குதல்களாக மாறிவரும் சமூகச் சூழலை வெளிப்படுத்துகின்றன.
குற்றச் சம்பவங்கள் நிகழ்ந்த பின்னர் இழப்பீடு அறிவிப்பதும், கைது நடவடிக்கைகளை மேற்கொள்வதும் மட்டுமே அரசின் கடமையாகிவிட முடியாது. குற்றங்கள் நிகழாமல் தடுப்பதற்கான முன்னெச்சரிக்கை நடவடிக் கைகள், காவல்துறையின் கண்காணிப்பு, போதைப்பொருள் மற்றும் மதுபோதையால் ஏற்படும் வன்முறைகளைக் கட்டுப்படுத்து தல் ஆகியவற்றில் அரசு கூடுதல் கவனம் செலுத்த வேண்டும்.
காவல்துறையினரின் பாதுகாப்பையும் பொதுமக்களின் உயிர் மற்றும் உடைமைகளின் பாதுகாப்பையும் உறுதிப்படுத்த வேண்டியது அரசின் அடிப்படைக் கடமை
யாகும்.
தமிழகத்தில் சட்டம் – ஒழுங்கைப் பாதுகாப்பதற்கான விரிவான ஆய்வை முதலமைச்சர் மேற்கொள்ள வேண்டும். ஒரே நாளில் நிகழ்ந்த பத்து கொலைச் சம்பவங்கள் குறித்தும், அவற்றுக்கான காரணங்கள் குறித்தும் முழுமையான விசாரணை நடத்தி, குற்றவாளிகள் அனைவருக்கும் சட்டப்படி கடுமையான தண்டனை கிடைப்பதை உறுதிப்படுத்த வேண்டும்.
தமிழ்நாடு அமைதியும் பாதுகாப்பும் நிறைந்த மாநிலமாகத் திகழ்வதை உறுதிப்படுத்துவது வெறும் அரசியல் வாக்குறுதியாக இல்லாமல் அரசின் செயல்பாடுகளில் வெளிப்பட வேண்டும்.
இவ்வாறு அவர் தெரி வித்துள்ளார்.