திருவள்ளூர், நவ.12–
தமிழகத்தில் த.வெ.க ஆட்சி பொறுப்பேற்றுள்ள நிலையில், பத்திரப்பதிவுத் துறையில் தனியார் பங்களிப்புடன் புதிய திட்டத்தைச் செயல்படுத்தும் முயற்சிக்கு எதிராக ஆவண எழுத்தர்கள் போராட்டத்தில் குதித்துள்ளனர். ஏற்கனவே பல்வேறு தொழில்துறைகளில் மாற்றங்களை எதிர்பார்த்து வரும் மக்களிடையே, பத்திரப்பதிவுத் துறையிலும் தனியார் மயமாக்கல் நடவடிக்கை மேற்கொள்ளப்படுவதாக எழுந்துள்ள எதிர்ப்பு பரபரப்பை ஏற்படுத்தியுள்ளது.
ஆவண எழுத்தர்களின் வாழ்வாதாரத்தைப் பாதிக்கும் வகையில் இ–டெண்டர் மூலம் பத்திரப்பதிவுப் பணிகளைத் தனியார் பங்களிப்புடன் மேற்கொள்ளும் திட்டத்தைக் கைவிட வலியுறுத்தி, தமிழ்நாடு பத்திர எழுத்தாளர் நலச்சங்கம் சார்பில் திருவள்ளூர் இணை மற்றும் சார்பதிவாளர் அலுவலகங்கள் முன்பாக கருப்புப் பட்டை அணிந்து பணிப்புறக்கணிப்புப் போராட்டம் நடைபெற்றது. நூற்றுக்கும் மேற்பட்ட ஆவண எழுத்தர்கள், தட்டச்சுத் தொழிலாளர்கள், பத்திர விற்பனை யாளர்கள், வழக்கறிஞர்கள் மற்றும் ரியல் எஸ்டேட் தொழில் முனைவோர் பங்கேற்று கோஷங்களை எழுப்பினர்.
அரசாணை எண் 164–ன் அடிப்படையிலான டிஜிட்டல் ஹப் மற்றும் தனியார் பங்களிப்புத் திட்டத்தை மறுபரிசீலனை செய்ய வேண்டும்; தற்போதைய ஆவண எழுத்தாளர் நடைமுறையைப் பாதுகாக்க வேண்டும்; ஆயிரக்கணக்கான குடும்பங்களின் வாழ்வாதாரத்தைப் பாதிக்கும் முடிவுகளை அரசு தன்னிச்சையாக எடுக்கக் கூடாது; சேவைக் கட்டணத்தை உயர்த்துவதுடன் முத்திரைத்தாள் விற்பனை சார்ந்த தொழில் வாய்ப்புகளையும் பாதுகாக்க வேண்டும் எனப் பல்வேறு கோரிக்கைகளை முன்வைத்தனர்.
மேலும், ஆன்லைன் பத்திரப்பதிவு முறையில் தொழில்நுட்பக் கோளாறுகள் மற்றும் ஆவணக் குளறுபடிகள் ஏற்பட வாய்ப்புள்ளதாகவும், செயற்கை நுண்ணறிவு (ஏஐ) தொழில்நுட்பத்தைப் பயன்படுத்தி போலி ஆவணங்கள் உள்ளிட்ட முறைகேடுகள் நடைபெறக்கூடும் என்றும் போராட்டத்தில் ஈடுபட்டவர்கள் அச்சம் தெரிவித்தனர். சொத்துப் பரிவர்த்தனையில் சிறிய தவறு ஏற்பட்டாலும் பொதுமக்களின் வாழ்நாள் சேமிப்பே கேள்விக்குறியாகும் நிலையில், போதிய பாதுகாப்பு ஏற்பாடுகள் இல்லாமல் புதிய திட்டத்தைச் செயல்படுத்துவது பொதுமக்களுக்குப் பாதிப்பை ஏற்படுத்தும் என்றும் எச்சரித்தனர்.
த.வெ.க அரசு இந்தக் கோரிக்கைகளுக்குச் செவிசாய்த்து, ஆவண எழுத்தர்களின் வாழ்வாதாரத்தைப் பாதுகாக்குமா அல்லது போராட்டத்தைத் தொடர்ந்து நடத்த வேண்டிய நிலைக்குத் தள்ளுமா என்ற எதிர்பார்ப்பு எழுந்துள்ளது.
இந்தப் பணிப்புறக்கணிப்புப் போராட்டத்தால் திருவள்ளூர் மாவட்டத்தில் உள்ள இணை மற்றும் சார்பதிவாளர் அலுவலகங்களில் பத்திரப்பதிவுப் பணிகள் பெரிதும் பாதிக்கப்பட்டு, பத்திரப்பதிவுக்காக வந்த பொதுமக்களும் ஏமா ற்றத்துடன் திரும்பிச் செல்லும் நிலை ஏற்பட்டது.