நாகர்கோவில், நவ. 12–
குமரி, நெல்லை மாவட்டத்தில் போலீசுக்கே மிரட்டல் விடுக்கும் வகையில் ரவுடிகள் அட்டகாசம் பெருகியுள்ளது. ரவுடிகளை வேட்டையாடச் சென்ற 5 எஸ்.ஐ.க்களை அரிவாளால் வெட்ட முயற்சி நடந்துள்ளது. தமிழ்நாடு முழுவதும் தீபாவளியையொட்டி தேனி சிறப்பு சப்-இன்ஸ்பெக்டர் உள்பட 17 பேர் படுகொலை செய்யப்பட்டுள்ளனர். மது மற்றும் கஞ்சா போதையில் கொலைகள் நடந்துள்ளன. கொலை செய்தவர்களில் பெரும்பாலானவர்கள் ரவுடிகள் பட்டியலில் உள்ளவர்கள் ஆவர்.
இந்த சம்பவங்களை தொடர்ந்து ரவுடிகள் பட்டியலில் உள்ளவர்களை கைது செய்யும் நடவடிக்கைகள் தீவிரமாகின. அதன்படி நேற்று முன்தினம் தமிழ்நாடு முழுவதும் ரவுடிகள் வேட்டை நடந்தது. குமரி மாவட்டத்திலும் ரவுடிகள் வேட்டை நடைபெற்றது. ரவுடிகள் பட்டியலில் உள்ளவர்களை போலீசார் கைது செய்ய சென்றபோது போலீசாரையே மிரட்டும் அளவுக்கு 5 இடங்களில் எஸ்.ஐ.களை அரிவாளால் வெட்ட முயற்சி நடந்துள்ளது.
* குமரி மாவட்டம், ராஜாக்கமங்கலம் அருகே எஸ்.ஐ. பென்சன் தலைமையில் போலீசார் ரோந்து பணியில் இருந்த போது, வடலிவிளை சாந்தபுரத்தை சேர்ந்த அருள் (27), பருத்திவிளை பகுதியை சேர்ந்த பாபு (36) ஆகியோர் சாக்கு பையுடன், தனியார் மண்டபம் அருகே நின்று கொண்டிருந்தனர். அவர்களிடம் போலீசார் விசாரணை நடத்திய போது, திடீரென பையில் இருந்த அரிவாளை எடுத்து எஸ்.ஐ. பென்சனை வெட்ட முயன்றதாக கூறப்படு கிறது. இதில் எஸ்.ஐ. மற்றும் போலீசார் தப்பினர். இதையடுத்து அருள், பாபு இருவரையும் போலீசார் கைது செய்தனர். இவர்கள் காவல் நிலைய சரித்திர பதிவேடு குற்றவாளிகள் பட்டியலில் உள்ளனர்.
* தென்தாமரைக்குளம் அருகே உள்ள முகிலன் குடியிருப்பு சந்திப்பு பகுதியில் எஸ்.ஐ. சுரேஷ் தலைமையில் போலீசார் ரோந்து பணியில் இருந்த போது, நடுரோட்டில் அரிவாளை தேய்த்தபடி சென்று பொதுமக்களை அச்சுறுத்தியதாக முகிலன்குடியிருப்பு பகுதியை சேர்ந்த பால ஸ்ரீராமச்சந்தி ரன் என்ற கண்ணன் (33), அகஸ்தீஸ்வரத்தை சேர்ந்த முத்து என்ற முத்துக்குமார் (38) ஆகியோரை கைது செய்ய சென்றனர். அப்போது அவர்கள் போலீசாரிடமும் அரிவாளை காட்டி மிரட்டி தப்ப முயன்றனர். அவர்களை போலீசார் சுற்றிவளைத்து பிடித்தனர். இவர்கள் இருவரும் குற்றவாளிகள் சரித்திர பதிவேடு பட்டியலில் உள்ளனர்.
* அஞ்சுகிராமம் காவல் நிலைய சப் இன்ஸ்பெக்டர் பிரிய ராஜ்குமார் தலைமையிலான போலீசார் ரஸ்தாகாடு சந்திப்பு பகுதியில் ரோந்து சென்றனர். அப்போது வட்டக்கோட்டையைச் சேர்ந்த பெலிக்ஸ், பால்குளம் அடுக்குமாடி குடியி ருப்பை சேர்ந்த சுரேந்தர், ஆமணக்கன்விளையைச் சேர்ந்த நந்தகோபால் ஆகியோர் அந்த பகுதியில் நின்று கொண்டிருந்தனர். அவர்களை கலைந்து போகுமாறு எஸ்.ஐ. பிரிய ராஜ்குமார் கூறினார்.
அப்போது அவர்கள், நீ உயிரோடு இருந்தால் தானே எங்கள் வீட்டுக்கு சோதனை செய்ய வருவாய் என கூறி, அரிவாளை எடுத்து எஸ்.ஐ. பிரிய ராஜ்குமாரை வெட்ட முயன்றனர். இதில் அவர் உயிர் தப்பினார். அஞ்சுகிராமம் போலீசார் வழக்கு பதிந்து 3 பேரையும் கைது செய்தனர். இவர்கள் மீது ஏற்கனவே வழக்குகள் உள்ளன.
* சுசீந்திரம் சப் இன்ஸ்பெக்டர் கல்யாணசுந்தரம், நேற்று முன்தினம் மாலை பறக்கை காடேற்றி குளம் அருகே ரோந்து பணியில் இருந்த போது, அந்த வழியாக புத்தளம் அரிய பெருமாள் விளையை சேர்ந்த தனபாலன் (23) என்பவர் சாக்கு பையுடன் வந்தார். அவரை தடுத்து நிறுத்தி விசாரித்த போது, அரிவாளை எடுத்து எஸ்.ஐ. கல்யாண சுந்தரத்தை வெட்ட முயன்றுள்ளார். இதில் எஸ்.ஐ. தப்பினார். இது குறித்து சுசீந்திரம் போலீசார் தனபாலன் மீது வழக்கு பதிந்து கைது செய்தனர்.
* நெல்லை அருகே தாழையூத்து காவல் நிலைய எஸ்.ஐ சுதன் மற்றும் சிறப்பு எஸ்.ஐ சந்திரன் உள்ளிட்ட போலீசார் தீபாவளி பண்டி கையை ஒட்டி தீவிர ரோந்துப் பணியில் ஈடுபட்டனர். தாழையூத்து ரயில்வே கேட் அருகில் இரவு நேரத்தில் போலீசார் சென்றபோது, அங்கு சந்தேகத்திற்கு இடமான வகையில் 4 பேர் நின்றிருந்தனர். உடனே போலீசார் அவர்களிடம் சென்று விசாரித்துள்ளனர்.
அப்போது அவர்கள் முன்னுக்குப் பின் முரணாக பதில் அளித்தனர். திடீரென அந்த 4 பேரும் சேர்ந்து போலீசாரை திட்டி கொலைமிரட்டல் விடுத்தனர். தொடர்ந்து அக்கும்பலில் ஒருவரான தாழையூத்து ஸ்ரீநகர் மின்நகரை சேர்ந்த செல்வராஜா (19) என்பவர் திடீரென தான் மறைத்து வைத்திருந்த அரிவாளால் சப்-இன்ஸ்பெக்டர் சுதனை வெட்ட முயன்றார். ஆனால் அவர் விலகிக் கொண்டதால் தப்பினார். பின்னர் அந்த கும்பல் அங்கிருந்து தப்பிச்சென்றது. இதுகுறித்து தாழையூத்து போலீசார் வழக்குப்பதிந்து செல்வராஜாவை கைது செய்தனர். மற்ற 3 பேரையும் தேடி வருகின்றனர்.