சென்னை, நவ. 13–
மாவட்ட பெண் ஆட்சியருக்கே பாதுகாப்பற்ற சூழலை உருவாக்கும்
த.வெ.க. எம்.எல்.ஏ-.வின் அநாகரிகப் போக்கிற்குத் தி.மு.க. மகளிரணி சார்பில் கடும் கண்டனம் தெரிவிக்கப்பட்டுள்ளது.
இது குறித்து மகளிர்அணிச் செயலாளர் ஹெலன்டேவிட்சன் மகளிர் தொண்டர் அணிச் செயலாளர் நாமக்கல் ப.இராணி ஆகியோர் விடுத்துள்ள அறிக்கைவருமாறு:–
கள்ளக்குறிச்சி மாவட்ட பெண் ஆட்சியருக்குத் தமிழக வெற்றிக் கழகத்தின் (த.வெ.க.) சட்டமன்ற உறுப்பினர் சி.அருள் விக்னேஷ் ஆபாச குறுஞ்செய்தி களை அனுப்பியதோடு, மதுபோதையில் அவரது இல்லத்திற்கே சென்று அச்சுறுத்தும் வகையில் தொந்தரவு செய்ததாக வெளிவந்துள்ள செய்திகள் ஒட்டு மொத்த தமிழகத்தையும் பேரதிர்ச்சியிலும் வேதனையிலும் ஆழ்த்தியுள்ளது.
பெண்ணுரிமைக்கும், பெண்களின் பாதுகாப்புக்கும் முன்னுரிமை அளிக்கும் தமிழ் மண்ணில், ஒரு மாவட்டத்தின் மிக உயரிய பொறுப்பில் இருக்கும் பெண் ஐ.ஏ.எஸ். அதிகாரிக்கே இந்த நிலை என்றால், சாதாரண எளிய பெண்களின் பாதுகாப்பு எத்தகைய கேள்விக்குறியாகும் என்பதை நினைத்துப் பார்க்கவே நெஞ்சம் அஞ்சுகிறது. மக்கள் பிரதிநிதி என்ற பொறுப்பை மறந்து, சட்டம் ஒழுங்கைத் தன் கை யில் எடுத்துக்கொண்டு ஒரு பெண்ணின் மாண்புக்குக் குந்தகம் விளைவிக்கும் வகையில் செயல்பட்ட
த.வெ.க. எம்.எல்.ஏ.-வின் இந்த அநாகரிகப் போக்கு வன்மையாகக் கண்டிக்கத்தக்கது.
இந்திய வரலாற்றிலேயேஇல்லாத வகையில், மாவட்டநிர்வாகத்தை முன்னின்று நடத்தும் பெண் ஆட்சியருக்கே அச்சுறுத்தல் தரும் வகையில் அரங்கேறியுள்ள இந்தச் சம்பவம், தமிழ்நாட்டிற்கு நேர்ந்திருக்கும் பெரும்தலைகுனிவாகும்.
காவல்துறை இந்த விவகாரத்தில் சற்றும் தாமதிக்காமல், சட்டத்தின் முன் அனைவரும் சமம் என்பதை நிலைநாட்டும் வகையில் உடனடியாக வழக்குப்பதிவு செய்து, சம்பந்தப்பட்ட சட்டமன்ற உறுப்பினர் மீது மிகக் கடுமையான சட்டபூர்வ நடவடிக்கைகளை மேற்கொள்ள வேண்டும் என்று திராவிட முன்னேற்றக் கழக மகளிரணி சார்பில் வலியுறுத்திக் கேட்டுக்கொள்கிறோம் என்று ஹெலன் டேவிட்சன், (மாநில மகளிர் அணிச் செயலாளர், நாமக்கல் ப. இராணி ஆகியோர் விடுத்துள்ள அறிக்கையில் கூறியுள்ளனர்.