மதுரை, நவ.13
மதுரையில் திறந்து 15 நாட்களேயான நகைக்கடையில் 35 கிலோ தங்கம் உள்ளிட்ட விலை உயர்ந்த நகைகள் கொள்ளை போயுள்ளன. இதன் மதிப்பு சுமார் 50 கோடி இருக்கும் என்று சொல்லப்படுகிறது.
இதுபற்றிய விவரம் வருமாறு:–
மதுரை பைபாஸ் சாலையில் உள்ள பிரபல Tanishq நகைக் கடையில் சுமார் 35 கிலோ தங்க நகைகள் கொள்ளையடிக்கப்பட்டுள்ளதாக புகார் எழுந்துள்ளது. நேற்று முன்தினம் இரவு முகமூடி அணிந்த மர்ம நபர் ஒருவர் கடையின் பின்பக்க வழியாக உள்ளே புகுந்து நகைகளைக் கொள்ளையடித்துச் சென்றதாக முதற்கட்ட தகவல்கள் தெரிவிக்கின்றன.
கொள்ளை போன நகைகளின் மதிப்பு சுமார் 50 கோடி ரூபாய் இருக்கும் எனக் கூறப்படுகிறது. இந்த நகைக்கடை திறக்கப்பட்டு சுமார் 15 நாட்களே ஆகும் நிலையில், இதுவரை பெரிய அளவில் திறப்பு விழாவும் நடத்தப்படவில்லை. மேலும், கடையின் உள்புறப் பணிகளும் முழுமையாக நிறைவடையாத நிலை யில் இந்த கொள்ளை சம்பவம் நடைபெற்றுள்ளது.
தகவலறிந்து சம்பவ இடத்திற்கு வந்த எஸ்.எஸ். காலனி காவல்துறையினர் மோப்பநாய் உதவியுடன் விசாரணை மேற்கொண்டனர். தடயவியல் நிபுணர்க ளும் சம்பவ இடத்தில் ஆய்வு செய்தனர்.
கடையில் இருந்த மொத்த தங்கத்தின் அளவில் சுமார் 30 சதவீதம் திருடு போயுள்ளதாக கூறப்படுகிறது.
நகைக் கடையில் நுழைந்த
முகமூடி கொள்ளையன்!
இந்த கொள்ளை குறித்து கடையின் சிசிடிவி காட்சிகளை ஆய்வு செய்த போது ஒரு கொள்ளையன் முகமூடி அணிந்தபடி மூட்டை மூட்டையாக நகைகளை அள்ளிச் சென்றது தெரியவந்தது.
கற்கள் பதித்த நகைகளாக இருந்தால் விற்பனை செய்தால் பணம் குறைவாக கிடைக்கும் என்பதால் கற்கள் பதிக்காத நகைகளை கொள்ளையடித்துச் சென்றுள்ளனர். இந்த கொள்ளையனை பிடிக்க 9 தனிப்படைகள் அமைக்கப்பட்டுள் ளன.
இரும்பு சாரத்தில் ஏறி மொட்டை மாடி ஜன்னல் வழியாக வந்த கொள்ளையன், லிப்ட்டை தாங்கும் இரும்பு கம்பிகளை பிடித்துக் கொண்டு கடையின் தரைதளத்திற்கு வந்துள்ளனர். அங்கிருந்த நகைகளை அள்ளிக் கொண்டு நேதாஜி மெயின் ரோடு வழயாக தப்பி இருக்கலாம் என்று காவல்துறையினர் சந்தேகப்படுகின்றனர்.
அது போல் சில நகைகளை எடுத்தால் சைரன் ஒலி எழுப்பும். அது போல் சைரன் ஒலி எழுப்பாத நகைகளை மட்டுமே அந்த கொள்ளையன் கொள்ளையடித்துச் சென்றுள்ளார். இதனால் நன்கு தெரிந்த நபர்தான் இந்த கொள்ளையில் ஈடுபட்டிருப்பார் என போலீஸார் சந்தேகிக்கிறார்கள்.
இந்த கடையில் பிளம்பிங், எலக்ட்ரீஷியன் உள்ளிட்ட பணிகளை செய்தவர்களை அழைத்து விசா ரணை நடத்தப்பட்டு வருகிறது. அது போல் கடையில் பணியாற்றும் 25 ஊழியர்களிடமும் விசாரணை நடத்தப்படுகிறது. அது போல் அவர்களின் கைவிரல் ரேகைகள் சேகரிக்கப்பட்டுள்ளது. தொடர்ந்து போலீசார் விசாரித்து வருகின்றனர்.