சென்னை, நவ.13–
‘‘கள்ளக்குறிச்சி மாவட்ட பெண் ஆட்சி யருக்கு ஆபாச குறுஞ்செய்தி அனுப்பியது குறித்து த.வெ.க. எம்.எல்.ஏ. மீது ‘பெண்கள் வன்கொடுமை தடுப்புச் சட்டத்தின்’ கீழ் வழக்குப் பதிவு செய்து சி.பி.சி.ஐ.டி. மூலம் விசாரணை நடத்த வேண்டும்’’ என்று கழக அமைப்புச் செயலாளர் ஆர்.எஸ்.பாரதி – தமிழ்நாடு காவல்துறை தலைமை இயக்குனரிடம் (டி.ஜி.பி.) நேரில் மனு அளித்துள்ளார்.
தி.மு.க அமைப்புச் செயலாளர் ஆர்.எஸ்.பாரதி அவர்கள், நேற்று (12.11.2026) காலை, தமிழ்நாடுஅரசின் காவல்துறை தலைமை இயக்குநர் (DGP) அவர்களை நேரில் சந்தித்து, கள்ளக்குறிச்சி மாவட்டஆட்சியர் திருமதி ஜே.இ. பத்மஜா, இ.ஆ.ப.,அவர்களுக்கு பாலியல் தொல்லை அளித்தல், ஆபாசமான மின்னணுச் செய்திகளைஅனுப்புதல், அரசு ஊழியரை மிரட்டுதல் மற்றும் அவரது இல்லத்திற்குள் அத்துமீறி நுழைதல் ஆகிய குற்றச்சாட்டுகள் தொடர்பாக, கள்ளக்குறிச்சி சட்டமன்றத் தொகுதி உறுப்பினர் சி. அருள் விக்னேஷ் (தமிழக வெற்றிக் கழகம்) மீது முதல் தகவல் அறிக்கை (FIR) பதிவுசெய்யவும், நியாயமான, சுதந்திரமான விசாரணை நடத்தவும் கோரும் புகார் மனு அளித்தார்.
அப்புகார் மனுவின் தமிழாக்க விவரம் பின்வருமாறு :-–
தமிழ்நாடு சட்டமன்றத்தின் பிரதான எதிர்க்கட்சியான திராவிட முன்னேற்றக் கழகத்தின் (தி.மு.க.) அமைப்புச் செயலாளராக நான், ஆர்.எஸ். பாரதி, இருக்கிறேன்.ஒரு குடிமகனாகவும், குறிப்பாகப் பெண்களின் பாதுகாப்பு மற்றும் கண்ணியம், குடிமைப் பணிகளின் சுதந்திரம் ஆகியவை தொடர்பான தீவிர பொது நலன் சார்ந்த விவகாரங்களை எழுப்ப அரசியலமைப்பு மற்றும் தார்மீகக் கடமை கொண்ட அங்கீகரிக்கப்பட்ட அரசியல் கட்சியின் நிர்வாகியாகவும் இந்தப் புகாரைச் சமர்ப்பிக்கிறேன்.
இந்தப் புகார், ஆளும் தமிழக வெற்றிக் கழகத்தைச் (த.வெ.க.) சேர்ந்த, கள்ளக்குறிச்சி சட்டமன்றத் தொகுதியின் தற்போதைய சட்டமன்ற உறுப்பினரான
சி.அருள் விக்னேஷ் (இதன்பின்னர் “குறிப்பிட்ட சட்டமன்ற உறுப்பினர்” என அழைக்கப்படுவார்) மீதான தீவிர குற்றச்சாட்டுகள் தொடர்பானது. கள்ளக்குறிச்சி மாவட்டஆட்சியர் திருமதி ஜே.இ. பத்மஜா, இ.ஆ.ப.,அவர்களுக்கு (இதன்பின்னர் “மாவட்ட ஆட்சியர்” என அழைக்கப்படுவார்) வாட்ஸ்அப் மூலமாக ஆபாசமான மற்றும் பாலியல் ரீதியான தகாத செய்திகளை அவர் அனுப்பியதாகவும், மேலும் முன்னறிவிப்பின்றி அவரது அரசு இல்லத்திற்குச் சென்றது உட்பட அவரிடம் தகாத முறையிலும் மிரட்டும் தொனியிலும் நடந்துகொண்டதாகவும் குற்றம் சாட்டப்பட்டுள்ளது.
1.பிணையில் வெளிவர முடியாத குற்றங்களை வெளிப்படுத்துகின்றன!
இக்குற்றச்சாட்டுகள் உண்மையாக இருக்கும்பட்சத்தில், அவை பிணையில் வெளிவர முடியாத (cognizable) குற்றங்களை வெளிப்படுத்துகின்றன. இவை ஒரு பெண்ணின் கண்ணியத்திற்கு இழைக்கப்பட்ட அவமதிப்பு மட்டுமல்லாமல், ஆளும் கட்சியைச் சேர்ந்த ஒரு மக்கள் பிரதிநிதி, ஒரு மாவட்டத்தின் மிக உயர்ந்த நிர்வாக அதிகாரியை மிரட்டும் முயற்சியையும் உள்ளடக்கியது. இத்தகைய நடத்தை நிரூபிக்கப்பட்டால், அது சட்டத்தின் ஆட்சியின் ஆணிவேரையே தாக்குவதுடன், அதிகாரிகள், குறிப்பாகப் பெண் அதிகாரிகள் அச்சமோ பாரபட்சமோ
இன்றித் தங்கள் கடமைகளை ஆற்றும் திறனையும் பாதிக்கும்.